دگہ چار پہ گچین کاریاں منتگ ءُُ بلوچستان ءَ ہوار سرجمیں پاکستان ءَ نوکیں گچین بوتگیں اگدہ دار کاینت ءُُ راج ءِ قوم ءِ دیمدار بنت۔بلئے باز مردمانی گمان ہمیش اِنت کہ اے بری گوستگیں وہد ءِ وڑا الیکشن پہ نام بیت ءُُ مردمانی گچین پہ سلیکشن بیت۔بزاں ہما کہ گوں خلائی مخلوقانی تب ءُُ مزاج ءِ وڑا بہ بیت ہماآنی حکومت کیت ۔

بلئے لس مہلوک نوں شیوار اِنت بائد انت آ وتی نمائندگ ءَ وت بہ چکاسیت ءُُ پہ وتی باندات ءِ گہتری ءَ ہمائی ءَ گچین بہ کنت کہ گوں آئی ءَ چیزے واہگ بندوک بہ بنت ۔سیاسی چست ءُُ ایر نوں وتی گڈی سیمسراں سر بوتگ اَنت ،مردمانی دہہ ءُُ زوری دور ہم نوں آسر اِنت باز وتی نمائندگ گچین کرتگ ءُُ باز ہمے شش ءُُ پنچ ءَ اِنت کہ کیا وتی نمائندگ گچین بہ کنت چیزے ءَ وَ ووٹ ءِ جند بائیکاٹ کتگ چہ سیاسی پیشونکانی نزوری ءَ بلئے چش نہ اِنت۔

اگاں کسے وتی حق ءُُ مزءَ گرگ ءُُ پہ وت ءَ یک جوانیں بانداتے ءِ واہگ داریت داں آئی ءَ الم اِنت کہ پہ حاکمی ءَ انچیں مردمے گچین بہ کنت کہ پرائی ءَ کارے کت بہ کنت اگاں ناں گڈا وہد پہ کس ءَ شر نہ بوتگ کہ باری تئی ءُُ منی بہ بیت۔

یکے نیمگے ملک ءِ جتا جتائیں دمگاں ( صوباہاں ) الیکشن ءِ چست ءُُ ایر بوہگان اَنت ءُُ دومی نیمگ ءَ نواز شریف گوں وتی چک ءَ زندان ءَ بندی اِنت ءُُ چہ احوالکاراں دزبندی کنگ ءَ انت کہ آئی جاور ال ءَ دنیا ءَ پیش بدار اَنت بلئے کس آئی گپ ءَ گوشدارگ ءَ نہ اِنت۔

،عمران خان اے بری وتی سرجمیں زور ءَ گوں الیکش ءَ اوشتاتگ ءُُ مزن وزیری ءِ اگدگ ءَ وتا چکاسگ لوٹیت ،دومی نیمگ ءَ پی پی پی ءِ ناک روزگیں نہال واجہ بلاول بھٹو لوگ پہ لوگ اِنت کہ آئی ءَ را ووٹ دئیگ بہ بیت ۔یک نیمگے ترس ءُُ بیم ءِ چاگردے اوں مانشانتگ مستونگ ءِ وئیل ءَ بازیں لوگ ویران کتگ اَنت۔

ءُُ بازیں چراگے کشتگ بائد گوں ہما مردگان ءُُ آوانی کہولاں گوں سیاست مہ بیت بلئے اے سیاسی مردم چے زان اَنت کہ مرگ ءُُ مراتی چے اِت؟بلوچستان ءَ اے بری پاری ءِ حساب ءَ الیکشن ءِ گرمی گیش اِنت بازیں نوکیں مردم سیاست ءَ پیداک اِنت ءُُ راج امیت وار انت کہ اے سوبمند بنت ءُُ پہ راج ءَ کارے کت کن اَنت۔

ہمے لڑ ءَ جان محمد دشتی این اے 271 ءَ قومی اسمبلی ءِ حاترا اوشتاتگ کہ پہ بلوچستان ءِ مہلوک ءَ جوانیں مستاگے اگاں آ اے بری سوبمند بہ بیت داں پہ بزگیں راج ءَ بلکیں راہ ءُُ درے پچ بہ کنت۔

چش نہ انت کہ اے دگہ پارٹیانی مردم کار کنگان اَنت بلئے سرجمیں چمشانکے انوگیں الیکشن ءِ دئیگ بہ بیت داں بلوچستان ءِ لس مہلوک ءِ واہگ ءُُ واہش گوں بی این پی ءَ گوں بندوک اِنت، بی این پی ءَ وتی وہد ءَ کہ اگدگ ءَ اتکگ بلئے وتی باریگے سرجم نہ کتگ بلئے ہمے کم وہد ءَ آانچیں کار کتگ کہ دائم ءَ مردماں یات ءُُ یاتگیری ءَ است اَنت ۔

اگاں اے برے پہک ءُُ ساپیں الیکشن بہ بنت ،خرید ءُُ فروخت کنگ مہ بیت ءُُ سلیکشن مہ بیت داں قوم ءِ امیت گوں بی این پی ءَ گوں بندوک اَنت۔

بلوچستان ءِ جیڑہ ءُُ جنجالانی حساب وَ نہ بیت بلئے یک مستریں جیڑہ یے بے روزگاری اِنت گمان دوہازدہ لکھ ءَ گیش مردم بلوچستان ءَ انوں بے روزگار اِنت ءُُ اے لڑ سال پہ سال گیش بوہگا ن اِنت،اگاں اے جیڑہ انگت ءَ گیش بہ بیت داں ایشیءِ گرءُُ دار نہ بوتگیں گپے بیت۔