بلوچستان ءِ نوکیں گچین کاریاں بلوچستان عوامی پارٹی بزاں باپ ءَ درستاں گیش ووٹ کٹ اِتگ ءُُ اولی پوزیشن ءَ رستگ دومی پوزیشن ءَ متحد مجلس علم ءُُ سیمی پوزیشن ءَ بی این پی مینگل ءِ اتکگ۔گچین کار ءَ ساری درائیں بلوچستان ءِ گپ شنگ اَت ءُُ ہر کس ءُُ ناکس ءِ دپ ءَ اَ ت کہ اے برے بی این پی منگل اولی پوزیشن ءَ کئیت انت۔
بلئے گچین کاری ءُُ ووٹ ءُُ الیکشن انچین چیز انت کہ گڈی روچ ءَ داں زانگ نہ بیت کہ کئے باج بارت ءُُ کئے ببا دنت ۔مہلوک ءِ واہگ ءُُ واہش دگہ پارٹی ءُُ دگہ مردم اِتاں بلئے سوبمندی دگہ مردمانی ءُُ دگہ پارٹی یے بوت۔مہلوک ءِ واہگانی پیلوئی ءَ اگاں اے پارٹی ءُُ اے مردم بہ کن اَنت داں ایشی ءَ ہچ باکے مان نیست بلئے اگاں اے پارٹی ءُُ اے مردم سوبمندی نہ بوتاں گڑا؟؟؟بلوچستان ءَ انوگیں سروزیر ی ءِ حاترا ءَ دونام کہ گیشتر گرگ بوہگ ءَ اِنت یک جام کمال اِنت ۔
ءُُ دومی واجہ اخترجان مینگل اِنت۔نوکتریں حالانی رد ءَ بی اے پی ءِ واکدارانی ہم واہگ اِنت کہ بلوچستان ءِ سروزیری اختر جان مینگل ءَ بہ رست بلئے انگت ءَ اے گپ پہک انت بوت کنت آوکیں سے چار ءَ روچ ءَ اے گپ پہک بہ بیت ۔
مہلوک ءِ اگاں واہگ چارگ بہ بیت داں اختر جان مینگل یک جوانیں سروزیری بوت کنت پرچکہ آئی ءَ را پیسرا ہم ہمے اگدگ ءَ کار کتگ اَت ءُُ آئی ءِ گچین کار انگت ءَ پہ درور مثالاں آرگ بنت ۔بی این مینگل ءَ را مرچی گمان بیست سال ءَ پد چشیں موہ یے دست کپتگ اَت بلئے ۔۔۔۔۔
آوڑ کہ ایشانی واہگ اَت آ وڑ نہ بوت نوں پارٹی ءِ مردمانی سرا اِنت کہ آ حکومت ءَ ہوار بہ بنت ءُُ حکومتی بہ کن اَنت یاکہ اپوزیشن ءَ بہ نند اَنت ۔دومی نیمگ ءَ پاکستان ءِ بنجاہی حکومت ءِ مزن وزیری ءِ اگدگ ءَ نامینتگیں امیت وار واجہ عمران خان ءِ ہمے واہگ انت۔
کہ ہردو پارٹیانی یکجائی ءَ حکومتے جوڑ بہ کنت۔نوں ہمے چارگی اِنت کہ بلوچستان ءَ چتوریں حکومتے جوڑ بیت یکجائیں حکومتے جوڑ بیت یاکہ اختر جان ءَ را پنچ سالانی ہاترا سروزیری دئیگ بیت یابی این پی ءِ مردم کہ بازءِ گشگ اِنت کہ الیکشن ءَ بازیں دھاندلی یے بوتگ پمشکا ایشانی ووٹ کم کنگ بوتگ انت آ حکومت ءِ بہر نہ بنت بلکیں اپوزیشن ءَ نند اَنت ۔ راج ءِ قوم ءَ وتی واہگ ءِ درشانی گوں ووٹاں کتگ آوانی ہرکس کہ دوست ءُُ نادوست بوتگ۔
آئی ءَ وتی ووٹ ءِ سرا وتی دوستی ءُُ نادوستی درشان کتگ ۔کسے چہ مہلوک ءَ جست بہ کنت داں پسو درائیں مردمانی ہمیش بیت کہ حکومتی ءُُ کماشی ہما مردم ءَ را دئیگ بہ بیت کہ آ پہ بزگیں راج ءَ چیزے کت بہ کنت ،ایوکیں قول ءُُ ایوکیں سوگند ءُُ ایوکیں دروگیں وعدہی نا بلکیں چیزے بہ کنت ءُُ پیشبدار یت ۔چشیں مردم انگت ءَ اے پدمنتگیں راج ءَ را دست نہ کپتگ باریں آوکیں وہد ءَ اے راج ءَ را چشیں یک سروکے دست بیت کہ نہ بیت۔
جاوری حرابی ،ایمنی ءِ جاورالاں چہ ہرکس سہی ءُُ سرپد اِنت کہ ایشی ءِ پد ءُُ رند ءَ کئی دست ءُُ پاد ہوار اَنت،کس ہچ گشت نہ کنت ایوک ءَ ہمے عرض ءُُ فریات بوت کنت کہ آوکیں سال ءُُ نوکیں حکومت بلوچستان ءِ جاوراں اگاں گہتر کت نہ کناں داں چد ءُُ حراب ترے مہ کناں ۔بلوچستان ءِ جنجال باز اَنت ءُُ نوکیں جنجالے کہ آپ ءِ نیستی اِنت ،بائد نوکیں حکومت ،وتی اگدگانی سرا آیگ ءَ گوں پیسر ءَ ہمے کار ءَ بہ کنت کہ آپے ءِ جیڑگ ءَ گیشوار بہ کنت ۔
اے گپ راست انت کہ آپ ءِ جیڑہ گوں ہور ءُُ جمبران انت بلئے ہور وہدے بیت آئی ءِ آپ ءِ دارگ ءَ ڈیم بندی الم اِنت کہ سرکار ءَ اے کار نہ کتگ ءُُ ہور ءِ موسماں سرجمیں آپ زر ءَ روت ءُُ ہوار بیت یاکہ زمین زیر بیت بلئے یکجا مچ نہ بیت۔
مردمانی بور جنگ ءُُ زمین ءِ جہلی ءَ آپ ءِ درکنگ ءَ چہ پیسری ءَ سک باز بوتگ ءُُ اگاں ہمے حساب ءَ اے گیش بہ بیت داں یک روچے کیت کہ بلوچستان ءَ آپ ءِ اوں بحران بیت انچوکہ بجلی ءِ بحران اِنت۔