اے وہد ءَ ریاست دنیا ءَ ماتے ءِ رنگ ءَ زانگ ءُُ پجارگ بیت بلکیں اگاں بگشے کہ ریاست یااستان چہ ماتے ءَ دیم ءَ ترانت گڑا زبان کزا نہ بیت پرچکہ استان ءِ واک ءُُ توان چہ ماتے ءِ دست رس ءَ گیش انت ۔ 

اے وہد ءَ دنیا ءَ نوکیں استان ءِ لیکہ ہمیش انت کہ آ وتی جاہ منندانی گورسی ءَ بکنت بلئے ہما استان ءُُ ملکاں کہ بلوچ جاہ منندانت اے درائیں ریاست ءُُ استانانی درور چہ مات ءِ بدل ءَ ماتوئے ئیگ انت پرچکہ اے ملک ءُُ استان جہندم چہ نوکیں دور ءِ تماہ ءُُ طلباں انسان ءِ بنکی لوٹ ءُُ گزرانی پیلو کنگ ءَ بے سوب بوتگ انت کہ اشانی تہا سپائیں آپ،جان سلامتی ،وانگ ءُُ زانگ ءُُ انسان ءِ ساہ ءُُ مال ءِ رکینگ ہوار انت بلئے اے درچ ءَ بلوچ کلمکار چہ درستاں گامے ءَ دیم ءَ انت ۔

ہرکس سہی ءُُ سرپد انت کہ نوکیں دور ءَ دنیا ءَ کلمکار ءُُ لبزانکی مردم سک آسودگ ءُُ وشحال انت پرچکہ دنیاءِ دیمروئی کرتگیں ملکاں کلمکار ءُُ لبزانکی مردمانی مزنیں بستار ءُُ ارزشتے پرچکہ ملک ءُُ راجانی نام ءُُ ننگ ءُُ پہر ءُُ شان ءِ مانزمان ہمے کلمکار ءُُ لبزانکی مردم انت ۔

اگاں راجے ملکے دومی راج ءُُ ملک ءِ نام ءُُ پجار ءَ سہی ءُُ سرپد انت گڑا اشی ءِ ءِ تہا مستریں دوست ہمے کلمکار ءُُ لبزانک مردمانی ئیگ انت فرانس چہ وتی جنگی ساز ءُُ سامانانی بدل سارتر ءُُ والٹر ءُُ روسو ءِ نام ءَ زانگ بیت ہمے وڑا روس ٹالسٹائی ءُُ دوستوفسکی ءِ پشدر ءَ زانگ بیت ءُُ اے گپ ءَ دیمروئی کرتگیں ملک جوانی ءُُ شری یے سرپد بنت پمشکہ اے ملک ہچبر نیل انت کہ اشانی کلمکار ءُُ لبزانکی مردم لنگڑ ءُُ نیزگار ءُُ واز ماندگ بہ بنت بلئے وہدے ما افغانستان ،ایران ءُُ پاکستان ءَ چاریں گڈا اے ملکاں بلوچ کلمکار ءُُ لبزانکی مردم سک تنگ دست ءُُ وار ءُُ بزگ انت انچو گمان بیت کہ اے ملکاں بلوچ کلمکار ءُُ لبزانکی مردماں پد جنوک نیست اے ملکاں بلوچ لبزانکی مردم چو بے ماتیں چورہ ءَ انت ۔

مراد ساحر ءَ بگرداں اکرم صاحب ءُُ انور صاحب خان ءَ بیا درائیں شاعر ءُُ ازمکار یں مردماں وتی درائیں زند پہ بلوچی زبان ءُُ لبزانک ءَ داتگ بلئے ما نہ دیستگ کہ استیں سرکار ءُُ ملک ءِ حاکماں کدی پہ بلوچ کلمکاراں چشیں کارے کتگ کہ آ وتی زند ءَ تیلت بکن انت ۔

اگاں اے لبزانکی مردم ءُُ کلمکارانی زند چارگ بہ بیت اشانی تہ اگیشتر وتی چکاں وانینت ہم نہ کن اَنت ءُُ وہدے وت کہ بیمار ءُُ نادراہ بنت گڑا اشانی دراہی ءُُ علاج ءِ حاترا ہم سرکار ءُُ حکومت ءِ کارداراں کمکے نہ کتگ اگاں کہ اے وہد ءَ دنیا ءَ کلمکار ،شائر ءُُ لبزانکی مردم سک وشحال ءُُ آسودگ انت ۔

کہ اشانی تہا مستریں نام کوئلو پائلو ئیگ انت کہ لاطینی امریکہ کلمکارے کہ آ نبشتہ ءُُ ابید دگہ ہچ نہ کنت بلئے اے ہم راستی یے کہ اے وہ دءَ لاطینی امریکہ گیشتریں گہبودی گلاں حیرات دیوک ہمے کوئلو پائیلو انت کہ چہ آئی ءِ ذر ءُُ مالاں بازیں اسکولے ءُُ ہیل کاری ادارگے جنزگ ءَ انت بلئے مئے کر ءَ مئے پہلوان نہ وتی چکاں اسکولاں وانینت کن انت نیکہ نادراہ جاہ یے برت کن انت ۔

اے وہد ءَ مستریں درور نور محمد نورل ئیگ انت کہ آئی ء، چک اے وہد ءَ کینسر ءِ نادراہ انت بلئے آئی ءِ وس نہ روت کہ چے وڑا وتی چک ءِ علاج ءَ بکنت اے درچ ءَ اگاں حکومت بلوچ کلمکار ءُُ لبزانکی مردمانی حاترا گچینی ذر ءُُ مالے ایر بکنت کہ پرآئی ءَ چکانی وانگ ءُُ آہانانی جند ءِ کہول ءِ علاج ءُُ دراہی ءِ کار ءَ بیا انت۔

اے بابت ءَ بلوچ سیاسی ءُُ لبزانکی واکداریں مردم بائدیں ترندیں گامگیجے بزور انت دانکہ غریب ءُُ بزگیں ندکارے چو بزگ مہ بیت کہ وتی جند ءِ لاپ ءِ ھاترا ءَ وتی ازم ءَ بہا بہ کنت ءُُ وتی چکانی وانینگ ءَ وتی کلمکاری ءَ یلہ بہ کنت ءُُ دگہ کار ءُُ روزگارے ءَ سر ءَ دور بہ دنت ۔

اگاں درائیں لبزانکی مردم وتی ازم ءُُ ازمکاری ءِ جاہ ءَ وتی لاپ ءُُ روز ءِ گم ءَ بزور اَنت داں یک وہدے انچیں کیت کہ بلوچستان ءَ پدا سید،عنقا ،کریم، عطا ءِ ڈولیں شاعرءُُ لبزانتاں بِل انچائیں لبزانکارے ءَ ہم چم تلوسنت ۔