اللہءِ بکشاتگیں ملک ءَ رسانک در ءِ آجوئی ءُُ آزاتی چہ بندات ءَ جیڑ ہ یے بوتگ بلئے نوکیں نوبت ءَ رسانک در ءِ آجوئی ءِ جاور حال گنتر بوتگ انت اگاں کہ چاگردی جیڑگانی زانتکارانی گپ ءُُ حال ایش ات انت۔

کہ چاگردی رسانک در ءِ دیمروئی ءَ گوں اے ملک ءِ واک دارانی وس ءَ دریں شے یے کہ آ حال ءُُ حالکاری ءِ آجو ءُُ آزاتیں راہ ءَ داشت بکن انت بلئے ملک ءَ نوکیں گچین کاریانی وہدءَ لس ءُُ چاگردی رسانک در ءِ حال مہلوک ءِ دیم ءَ ات کہ ملک ءِ حاکم ءُُ واکداریں تبک چے وڑا رسانک در ءَ گر ءُُ دار ءُُ بندوک کن انت ؟

ملک ءَ گچین کاری چے وڑ ءَ بوت انت ایشیءِ حال پاکستان ءِ مزن نامیں حالکار سلیم صافی ءَ گوں وتی یک اوتاگے ءَ دات انت کہ چرائی ءَ پد گوں آئی ءَ چے وڑ ءُُ چون کنگ بیت ،اے گپ زوت دیم ءَ کیت ! اگاں کہ مردمانی گشگ ایش انت کہ مشرف ءِ دور ءَ پد پاکستان ءِ حالکاری آجوئی ءُُ آزاتی گیش بوتگ بلئے بندر ءَ اے وڑ نہ انت بلکیں ملک ءَ واکداراں رسانک در ءَ را کنڑول ءُُ بندوک کنگ ءِ وتی راہ ءُُ رہبند بدل کتگ انت۔

کہ ہنچائیں مردمانی پہم ءَ درانت نوکیں رہبند اے کنگ بوتگ کہ چو ملک ءِ ایندگہ ادارگ ءُُ گلانی وڑا ( حالانکہ چاگردی) رسانک در ءَ وتی ’’ بھتہ واریں ‘‘ مردم دارگ بوتگ انت کہ ہمے ادارگانی بنگپ ءُُ مول ءُُ مراداں ہمے ادارگانی واہگ ءُُ تما ءِ رد ءَ سرجم کن انت پمشکہ واکداراں اے مردماناں گر ءُُ دار ءُُ بندش ءِ چہ بن ءَ ہچ زلورت نہ انت ءُُ اگاں اے درگت ءَ مہلوک اے وازمندگ انت کہ واکداریں ادارگ رسانک در ءِ ادارگانی بندش ءُُ گر ءُُ دار ءَ گامگیجے زور انت۔

گڑا اے باتلینے ! بلئے اے درچ ءَ اے وڑ ہم نہ انت کہ رسانک در ءِ درائیں ادارگ ءُُ مردم ملک ءِ واکدار ءُُ تیاریں حاکمانی واستیگ ءُُ کاری انت حدامرزی صدیق بلوچءَ کہ چہ بلوچستان ءَ انگلش روتاک بلوچستان ایکسپریس بندات کتگ ات۔

گڈاآئی ءِ مول ءُُ مراد ہمیش ات کہ بلوچ مہلوک ءُُ بلوچستان ءِ زبہریانی حال ءَ دنیا ءُُ ملک ءِ واکداراں سر بہ کنت اے درگت ءَ آئی ءَ 11اگست1990 ءَ ماں کوئٹہ ءَ بلوچستان ایکسپریس درکت کہ روچ ء مرچی یکشل ءَ درکپگ ءَ انت ’’ بلوچستان ایکسپریس‘‘ ءِ بابت ءَ بلوچستان ءِ یک مزنیں راجکارے ءِ گشگ ایش انت کہ صدیق بلوچ ءَ بلوچستان ایکسپریس ءِ سرا پہ بلوچ ءُُ بلوچستان ءَ ہما کار کتگ کہ آہاں گوں وتی راجکاری تاکت ءُُ ذکت ءَ کت نہ کتگ انت ۔

بلوچستان ایکسپریس ءِ ہواری ءَ صدیق بلوچ ءَ 11اگست 2000 ءَ روتاک ’’آزادی‘‘ چہ کوئٹہ ءَ درکت کت کہ بلوچستان ایکسپریس ءِ ہواری ءَ داں روچ ء مرچی بلوچستان ءُُ بلوچ اولس ءِ توار انت ۔ ’’ ساچینک‘‘ کہ اے وہد ءَ روتاکی حالکاری ءَ بلوچی ءِ مستریں تاک انت ،صدیق بلوچ ءِ گشگ ءِ رد ءَ 2016 ءَ بنا کنگ بوت کہ اے وہد ءَ درائیں دنیا ءَ بلوچ ،بلوچی ءُُ بلوچستان ءِ راجکاری ءُُ لبزانکی تاک انت کہ تنیگا ہچبر کزا نہ بوتگ ۔

اے تاک ءُُ روتاکانی کشگ ءَ صدیق بلوچ ءِ مستریں مول ءُُ مراد ہمیش بوتگ کہ بلوچ ءُُ بلوچستان ءِ زبہریانی حال دنیا ءَ سر بہ کنت ۔2016 ءَ صدیق بلوچ ءَ گوں اے واہگ ءَ چہ آزادی ءَ ہپتگی ’’ ساچینک‘‘ بنا کت کہ دیمترا وتی اردو روتاک ءَ بلوچی روتاکے کنت ۔

اے وہد ءَ ہپتگی ساچینک ءِ کارکنوکیں مردمانی ہم واہگ ءُُ مراد ہمیش انت کہ ساچینک ءَ بلوچی ءِ روچی تاکے بکن انت اے درگت ءَ اگاں صدیق بلوچ ءَ را حدا ءَ روچ ءُُ مرادے بدات انت گڈا بلکیں اے کار تنیگا سرجم بوتگ ات بلئے آئی ءِ نادراہی ءُُ پدا بیرانی ءَ اے کار تنیگا مہتل انت ۔

بلئے ہمے کم گشادی ءُُ نادزرسی ءَ وشنیاتکانی ،نادلسریاں ابید ہم بلوچستان ایکسپریس ءُُ روتاک آزادی ءُُ ہپتگی ’’ساچینک‘‘ ءَ وتی راجی ءُُ گلزمینی ڈبہ جوانیں وڑے ءَ کوپگاں زرتگ ذی کہ 11اگست بوتگ ہمے درچ ءَ مئے ذمہ واری ءُُ ڈبہ انت کہ ما صدیق بلوچ ،آئی ءِ حالکاری ءُُ زانشی جہد ءُُ جفاہاں گیر بیاریں کہ آئیءَ گوں ملک ءِ حاکم ءُُ واکداراں چے وڑا بلوچ ءُُ بلوچستان ءِ توار ءِ رکینگ ءِ توجیل کتگ ۔