ایران ءِ دری کارانی وزیرجواد ظریف دوروچی تروتابے ءَ 31اگست ءَ پاکستان ءَ اتکگ ات امریکہ ءِ گوں ایران ءَ ایٹمی منگ نامہ ءِ بجگءَ پد ایران ءِ دل گوں ہمساہگیں راجانی نرم تراِتگ اگاں کہ پاکستان ءَ نوکں حکومت ءِ جوڑ بوہگ ءَ پد ایرانی حاکمانی پاکستان ءِ اولی تروتاب انت۔

بلئے امریکہ ءِ یک نیمگی گوں ایران ءَ ایٹمی منگ نامہ ءِ بجگ ءَ ایران یکشل ءَ عالمی تک ءَ فرانس ،روس ءُُ ہندی تک ءَ پاکستان ءُُ ترکی ءَ گوں وتی سیادیاں یکبرے محکم کنگ ءِ پدا کپتگ ۔اے گپ گیر آرگی انت کہ ایران دنیا ءِ ہما اولی ملک ات کہ آئی ءَ پاکستان ءَ ماں دنیا نکشہ ءِ سرا ملکے ءِ درچ ءَ من ات پدا ہما ایران انت کہ آئی ءِ دوستی ءُُ سنگتی گوں پاکستان ءَ برجاہ انت ۔

1971بنگلہ دیش جوڑ بوہگ ءَ پد ءُُ ذولفقار علی بھٹو ءِ حکومت ءِ دور ءَ ایران ءِ سنگتی مدد یک درچ ءَ گوں پاکستان ءَ برجاہ بوتگ بلئے لہتیں مدت ءَ کہ پاکستان ءِ سیادی گوں سعودی عرب ءَ سک محکم بوت ءُُ دومی دست ءَ پاکستان ءَ ایران دشمنیں گل جنداللہ ءِ کار ءُُ کرد دیم ءَ اتک انت گڈا ایران ءِ پیسریگیں محکمیں سیادی گوں پاکستان ءَ برجاہ نہ منت دومی دست ءَ پاکستان ءِ گوں امریکہ ءَ سیادی ءَ ہم ایران ءِ دلگرانی گیشتر کت انت ۔

بلئے اے درگت ءَ مستریں بدگمانی چہ سعودی عرب ءِ سنگتی ءَ ودی بوت انت نوکیں نوبت ءَ وہدے گوستگیں سالءَ پاکستان ءَ گرے لسٹ ءِ تہا ہوار کنگ بوت ءُُ پدا امریکہ ءِ ہما منگ نامہ کہ گوں یورپین یونین ءِ ہواری ءَ گوں ایران ءَ ایمٹی جیڑہانی سرا کت انت بجگ ءَ پاکستان ءُُ ایران یکبرے پدا یکجاہ ءُُ ہوار کپتگ انت ءُُ ہمے ہواری ءِ آسر انت۔

کہ ایران ءِ دری کارانی وزیر جواد ظریف حکومت ءِ جوڑ بوہگ ءَ گوں پاکستان ءِ تروتاب ءَ اتکگ کہ آئی ءَ گوں آرمی چیف ،دریکارانی وزیر ءُُ ایندگہ واکداراں گند ءُُ نند کرتگ ءُُ پاکستان ءَ ہندی جیڑہانی بابت ءَ ایران ءِ لیکہ ءُُ حیال گشتگ انت اگاں یک نیمگے ایران چہ امریکہ ءَ ایٹمی منگ نامہ ءَ بجگ ءَ پد سک تکانسر انت۔

تا دومی دست ءَ پاکستان ءَ گرے لسٹ ءَ ماں بلیک لسٹ ءَ روگ مزنیں ترسے دل ءَ انت اگاں اے دست ءَ پاکستان مالیاتی جاورگیگ نہ انت گڑا ایران ءِ جند ءِ ریال ءِ ہم بے حال انت کہ نوکیں نوبت ءَ سک کپتگءُُ اگاں امریکہ ءَ ایران ءِ سرا گیشتر پابندی ءُُ بندش جت گڑا ایران چدوگیش مالیاتی جنجالانی آماچ بیت ۔ 

بلئے یک گپے تچک انت کہ اگاں پاکستان امریکہ ءُُ سعودی عرب سربگوزایت ءُُ ایران ءِ ہمراہ داری بہ کنت گڈا دوئیں ملک یک حدے ءَ امریکہ ءِ دیم ءَ اوشتات کن انت اے درچ ءَ مستریں گپ ایش انت کہ پاکستان گوں ایران ءَ وتی سیمسراں پچ بہ کنت تنکہ ایران ءِ زلورت ءِ سازوسامان پاکستان ءُُ پاکستان ءِ ایران ءَ شت بہ کن انت۔

بائدیں پاکستان وتی مالیات ءَ گیشتر کنگ ءِ حاترا واھگہ بارڈر،سندھ بارڈر، ءَ چہ بھارت ءِ نیمگ ءَ بند بہ کنت ءُُ ہمے بیپار ءَ چہ ایران ءَ بنا بہ کنت گڑا پاکستان ءُُ ایران ءَ امریکہ ءِ بدواہی باز تاوان بار کت نہ کنت بلئے پرے حاترا پاکستان ءَ را سیمسراں ایران دشمنیں گل دارگی ءُُ بندگی بنت ہمے وڑا ایران ءَ را ۔۔!