بلوچستان تاریخ ءِ حساب ءَ دنیا ءِ قدیمیں ہنداں شمار بیت ۔آئی ءِ تنی وہد ءَ بازیں دمب ءُُ آثاری جاہانی انگت ءَ شوہازی نہ بوتگ بلکیں بازیں جاہ یے انگت ءَ شوہاز ہم نہ بوتگ بلوچستان یورنیورسٹی ءِ یک لائق ستا پروفیسرے واجہ فاروق بلوچ ءَ بلوچستان ءِ کنڈ کنڈ ءِ تر ءُُ گرد کتگ ءُُ بلوچستان ءِ بازیں قدیمی چیز شوہاز کتگ اَنت ۔
کہ آوانی شمار بے قیمت اِنت۔واجہ فاروق بلوچ ءِ گشگ انت کہ اگاں سرکار ءِ کمک ءُُ مدت گون بہ بیت داں بلوچستان ءَ دمب زانتی یک ٹیمے لوٹاینگ ءُُ بلوچستان ءِ گرد ءُُ تر بہ بیت داں بلکیں پہ آثار قدیمہ ءِ حاترا بازیں چیزے چہ بلوچستان ءَ در بئیت ۔
بلوچستان ءَ مادن بزاں کہ میٹر وَ حسابی نہ اَنت بلکیں دنیا ءِ لہتیں انچیں گران بہائیں سیم چہ بلوچستان ءَ درکپگ ءَ اِنت بلئے اے مادن ءُُ سیمانی نپ ءُُ سیت بلوچاں چے حدے ءَ رسگ ءَ اِنت آ دگہ کسہ یے۔چنائی ءَ منی بنگپ گپ اے نہ انت کہ بلکیں منی بنگپ بلوچستان ءِ بن شہر کوئٹہ اِنت کہ یک بلائیں دپترے داریت ءُُ اے تاریخی جاہ ءِ یک چیزے کہ مدام من تکانسر کنت آایشی ءِ بازار ءِ نام اَنت ۔
بلوچستان ءَ بلوچانی ہند اِنت ءُُ بلوچستان ءَ اے دگہ بازیں قوم ءُُ راجے نندوک انت ءُُ بلوچاں گوں کسی دین ءُُ نیکراہاں ہچ وڑیں سروکارے نیست انت ۔کوئٹہ کہ بلوچستان ءِ بنی شہر بزاں کہ کیپیٹل انت بلئے ایشی ءِ بازار ءِ درائیں دمک ءُُ درانی نام بلوچی نہ انت ۔چنائی ءَ من ءَ دیر انت کہ من کوئٹہ ءَ نندوک انت۔
ءُُ اے جست ہچبر منی پگراں نیااتکگ ،کوئٹہ کہ پیش ءَ ایشی ءِ نام شالکوٹ یا شال بوتگ مرچاں کوئٹہ انت یک تاریخی جاہ یے بلئے ایشی ءِ دمک ءُُ درانی نام بلوچ پرچہ نیاں اے گپ ہچبر پگر ءَ نیااتکگ دو روچ ساری منی کستریں برات ءُُ من بازارءَ چیزے گرگ ءَ شتاں آئی ءَ اچ من بازار ءِ دمک ءُُ درانی بابت ءَ جست گران کت من پسو دیان کت کہ اے جناح روڑ انت ،اے فاطمہ روڑ ،اے مسجد روڑ انت ، میزان چون انت ،۔
گورداس روڑ ،پٹیل روڑ،ستار روڑ،حاجی روڑ ، میشن روڑ ، سورج گنج ، فیض محمد روڑ،زرغون روڑ،آرٹ اسکول روڑ ،بانو روڑ،آرچر روڑ ، فاتح محمد روڑ ،شیر محمد روڑ ،شاوکشاہ روڑ،فرنس روڑ،میکانگی روڑ ،شاہ راہے فیصل ،جان محمد روڑ،حالی روڑ، ءُُ اے دگہ من نام گران اِتاں ناگت ءَ آئی ءَ من ءَ گشت کہ اے درائیں دمک ءُُ در دگہ مردمانی نامءَ پرچہ ایر کنگ بوتگ اَنت ؟ زانہ اے دمکاں بلوچ نہ بوتگ؟آئی اے جست ءِ منی گور ءَ پسو نیست انت ،پہ آئی ءِ دل وشی ءَ من پسو دات کہ اے درائیں دمک ءُُ در انی یک تاریخے است انت ءُُ درائیں دمک وتی تاریخ ءُُ دپتر ءِ حساب ءَ نام دئیگ بوتگ اَنت۔
اے پسو ءَ آئی ءَ را متمن نہ کت بلئے منی دل ءَ یک جستے یلہ دات ۔من کہ پگر کت داں نہ ایوک ءَ بازار اناں لیاقت بازار ءِ نام دری مردمانی نامءَ اَنت بلکہ سرجمیں کوئٹہ ءِ مزن راہ ءُُ درءُُ دمکانی نام ہم دری مردمانی نام ءَ اَنت یاکہ انچیں نام اَنت کہ بلوچی چہرایش مان نیست انت چوکہ پتگلی چون،سبزل روڑ،بروری روڑ،سریاب روڑ،اسپنی روڑ،جمال روڑ ،ڈبل روڑ ،گولی مار چوک ، اسمنگلی روڑ ،زرغون روڑ ،کیرانی روڑ، جوانٹ ،منی روڑ،ارباب کرم روڑ،ءُُ دگہ انچیں نام اَنت کہ بلوچی چہر اش مان نیست انت اے نام مرچیگیں نام نہ اَنت بلکیں سد سال کہنین نام انت بلئے اے ہم پگری گپے کہ پرچہ اے راہ ءُُ دگانی نام بلوچی ایر کنگ نہ بوتگ اَنت۔
کوئٹہ ءِ ہما کہ کہنیں نندوکیں مردم اَنت اگاں چرہاں جست بہ بیت کہ کوئٹہ ءِ کہنیں دگانی نام چے چے بوتگ اَنت داں آ بلکیں دگہ نام بہ گش ایت پرچکہ گومن انچیں ویئلے بوتگ اَنت ءُُ منءَ ہم لہتیں انچیں نام گشگ بوتگ اَت من بہہ آ نام نہ اِش کتگ اِتاں ۔
نام ایوک ءَ نامے نہ اِنت بلکیں تئی شناخت ءِ اولی بنزہ اِنت وہدے تو یک درامدے ءَ را وتی ہند ءُُُ ہلک ءَ شون دیئے داں آئی ءَ را وتی ہند ءِ ناماں گشئے آنامانی پشدر اں سرپد کنئے بلئے بلوچستان ءِ بنجاہی شہر ءِ نام انچین انت کہ آوانی پُشدر ءَ چہ باز کم مردم چراہاں سرپد بہ بیت اول وَ نام بلوچی نہ اَنت۔
اے وت کندگی گپے کہ بلوچ ہند انی نام بلوچی نہ اَنت بلئے اے پگری گپے پرچکہ نام تئی پجار اِنت۔اگاں آ کہنیں ناماں بدل کت نہ کناں داں بائدیں آوکیں راہ ءُُ دگانی ناماں ما بلوچ بامرد یاکہ بلوچی تب ءُُ مئیل ءِ حساب ءَ ایر بہ کن اَنت دانکہ مئے آوکیں پدریچ مئے وڑ ءَ حیران مہ بنت کہ اے چونیں نام اَنت۔