درائیں پاکستان ءَ مکران ءِ ہما دمگ انت کہ چہ انسانی بنکی آسراتیاں درستاں گیش زبہر انت مکران ءَ سڑک ءُُ دگانی جاور حال گیگ گوم انت ءُُ ننکہ گیس ،گروک ءُُ ساپیں آپ ءِ آسراتی است انت اگاں کہ مکران ءِ گروک چہ ایران ءَ کیت کہ اودا گروک ءِ ہچ کمی نہ انت۔

بلئے مکران ءَ اوں بے بلا ببات واپڈا ءَ کہ چو پاکستان ءِ ایندگہ شہر ءُُ دمگانی وڑا 12ساہتاں گروکاں بارت ۔ مکران ہما دمگ انت کہ چہ کراچی 900 کلومیٹر ءُُ چہ کوئٹہ ءَ 1100 کلومٹیر دورانت ءُُ مکران ءِ جند ءَ جان سلامتی ءِ ہچ وڑیں آسراتی نگواہ ایت پمشکہ مکران ءِ مردم لاچار انت کہ وتی نادرہ ءُُ ٹپیاں کراچی ءُُ کوئٹہ ءَ بہ بر انت بلئے کشک ءُُ راہ ءِ دوری ءِ سوب ءَ گیشتریں ٹپی ءُُ نادراہ راہ مرگ ءِ آماچ بنت ۔

دومی یک سروے ءِ ردا مکران ہما جاہ انت کہ اودا پاکستان90نقلی ءُُ دونمبریں دوائی سودا کنگ بنت ہمے وڑا ویل ءُُ کزانی نوبت ءَ ہچ دگ ءُُ میتگاں بنداتی جان سلامتی ءِ آسراتی نیست انت تربت ،پنجگور ،گوادر ءِ ہندی (ضلعی) بنجاہی ہسپتال ہم چہ بندری جان سلامتی آسرتیاں زہبر ءُُ محروم انت دگہ بدبحتی ءِ ایش انت۔

بلوچستان ءَ ہچ دوسری( ڈبل وے) دگہ ءُُ کشگ نیست پمشکا چہ پاکستان ءِ ایندگہ دمگاں ( صوبہاں ) گیشتریں راہ ءُُ سفری ویل بلوچستان ءَ بنت ءُُ گیشتریں ٹپی بنکی جان سلامتی آسراتی نہ بوہگ ءِ سوب ءَ بیران بنت ۔

اے درگت ءَ جوان تریں گپ ایش انت مکران ءِ سیئیں ہند پنجگور،کیچ،ءُُ گوادر ءِ ہندی بنجاہی ہسپتالاں سوچک بہرگ(Born Unit) نیست چوکہ مکران ءِ سے ئیں ہنداں ایران تیل ءِ کار وبار بازانت ءُُ دومی آس ءِ کپگ ہنچیں ویلے کہ ہروہد ءَ کپت کنت بلئے حدائی آس ءَ ہوار ءَ مرچاں مکران ءَ تیل ءِ دکاناں آس ءُُ ایل پی جی گیس سلنڈرانی ترکگ بازیں ویلے دیم ءَ پیداک انت پدرا انت کہ بازیں ویل ءُُ کزا بنی آدمءِ دست ءُُ وس دور انت ۔

بلئے بازیں ویل ءُُ کزا پہ دلگوش ءُُ آسراتی کمتر بوت کن انت چوکہ انوگیں شاپک ءَ ایل پی جی گیس سلنڈر ترکگ ءِ ویل کہ آئی ءَ 10 مردم بیران بوت انت چدو پیس ہم اے وڑیں ٹپی کراچی ءَ برگ بوتگ انت بلئے اگاں حکومت وتی ذمہ واریاں پیلو بہ کنت ءُُ اول سے ئیں ہندانی بنجاہی ہسپتالاں سوچک ءِ بہرگ جوڑ بکنت گڑا بازیں ٹپی رک ات کت کنت پرچکہ مکران ءَ ہمے زوتاں سوچک ءِ بازیں ویلانی ٹپی کراچی ءُُ کوئٹہ برگ بوتگ انت ۔

کہ بازینے راہ ءَ بیران بوتگ پرچکہ بنداتی جان سلامتی ءِ بنکی آسراتی ہندی نادراہ جاہاں نیست انت ءُُ دومی مدام گشادی ءُُ اشتاپی ءَ بالی گراب دست نہ کپت ایت ۔ اے انوگیں حکومت ءِ ذمہ واری انت کہ نازرکیں جاوراں بچارات ءُُ بہ ٹپاس ات ءُُ مکران ءَ اگاں درائیں ہندی بنجاہی ہسپتالاں سوچک ءِ بہرگ جوڑ کت نہ کنت گڈا بائدیں مکران ءِ بنجاہ کیچ ءَ یک جوانیں ءُُ مزنیں سوچک ءِ بہرگ ءِ جوڑ کنگ بہ بیت ۔

پرچکہ کیچ گوادر ءُُ پنجگور ءِ میان ءَ انت ۔اے وڑا گوادر ءُُ پنجگور ءِ ہند ءِ مردم زوت یک وڑا رست کناں ۔ایشی ءَ ہوار حکومت ءِ ذمہ واری انت کہ کوسٹل روڑ ءِ سرا یک ءُُ دو جاہ ءَ جان سلامتی ءِ کسانیں سوچک دوار ءُُ ایمرجنسی جوڑ بکنت ہمے وڑا گوادر داں کوئٹہ ،پنجگور ءِ دست ءَ ہم ہمے وڑیں دوار ءُُ بہرگ جوڑ کنگ بہ بنت ۔

پرچکہ اے راہ ءُُ دگ دوسری نہ انت ءُُ یکشاہ انت اشانی میان ءَ ویل ءُُ کزا باز بیت ءُُ انسانی ساہ ءُُ جان ءِ قیمت ارزان نہ انت پمشکہ جہد کنگ بہ بیت کہ بنی آدم ءِ ساہ ءُُ جان رکینگ بہ بیت نوں کہ سی پیک ءِ راہ ءُُ سفر بنا بیت گڑا کوئٹہ ،پنجگور گوادر دگ سک رش بیت دومی اے وہد ءَ ہم بازیں ٹینکر ءُُ ٹیلی گاڑی ہمے راہ ءُُ کشک ءَ کارمرز کن انت پمشکہ مہلوک ءِ لوٹ ہمیش انت کہ اے دگانی سرا بدئدیں حکومت سوچک ، ایمر جنسی ءُُ جان سلامتی ءِ کسان کسانیں دوار جاہ جوڑ بہ کنت اگاں حکومت توکل کت گڑا بنی آدمی ساہ ءُُ جانانی رکگ ءِ حساب گیش بوت کنت ۔