من وھدے بلوچی ساز ءُ زیمل یا سَوت ءِ گوشدارگ بندات کُتگ گُڑا چہ ھمے مزنیں سوتاں۔ ایشانی تہ ءَ داستان، کسّہ، گْوستانک، پازل ءِ پلسپہ، بلوچ ءِ مھمانداری، بلوچ ءِ مھر، بلوچ ءِ مھری چاگرد دْرست مان بوتگ اَنت۔

اے شَیر پر من ءَ چو لیلو ءِ ھساب ءَ بوتگ اَنت۔ انچوش کہ یک ماتے وتی چُکّ ءَ داستانی سوتے گْوش اِیت ھمے وڑ ءَ ایشانی گوشدارگ ءَ اے سما بوتگ۔ سید ھاشمی ھم ھمے گپّ ءَ منّ اِیت کہ اگاں بلوچی ءِ کْوھنیں مڈّی زندگ اِنت گُڑا ھمے پھلوانانی برکت ءَ۔ اگاں ایشاں اے شَیر پر ما سر مہ کُتین اَنت نبشتھی دْروشم ءَ اے مارا ھچبر دست نہ کپتگ اِت اَنت۔ بزاں مئے لبزانک ءِ مستریں مڈّی شُتگ اَت۔

ءُُ پد ءَ سید آیانی ستا ءَ باز کنت کہ آیانی کمال ایش اِنت کہ آیاں اے دْرستیں شَیر مزن مزنیں شَیر پہ دل یات بیتگ اَنت۔ سیدیک جاھے بژن ھم کنت ءُُ گْوش اِیت کہ ایشانی بیرانی ءَ بلوچی ءِ بلاھیں مڈّی یے ایشانی ھمراھی ءَ شُتگ گوں۔ پرچا کہ ایشاں بلوچ ءِ گْوستانک ءِ مستریں بھر گون بوتگ۔ ایشانی سینگ چہ زانت ءَ چکار بوتگ بلے بد بھتی کہ گُلامی ءِ سانکلاں بستگیں راجءَ آئی ءَ چہ نپ چست کُت نہ کُتگ۔

آیانی بیرانی ءَ گوں آیانی دل ءِ تہ ءِ سرجمیں مڈّی کبر بوتگ اَنت۔ من مُدام مُلّا کمالان گوش داشتگ۔ یکّے ایش اِنت کہ سُروز ءُُ تمبورگ ءِ لزّتے انچیں کہ من ءَ سک وش بوتگ ءُُ انگت ھم وش بیت۔

من چہ میوزک ءَ تھنا مُلّا کمالان ءِ پیت بند زُرتگ اَنت گوش داشتگ اَنت۔ پیگمبری ھم باز گوش داشتگ چوش کہ مھتر الی? ءُُ اے دگرانی داستان۔ بلے من تھنا کمالان زانتگ۔ پد ءَ وھدے کہ من روایرشتی بلوچستان ءَ شُت آں گُڑا اود ءَ من بازیں نامے اُش کُتگ۔ کادر بکش ءُُ دگہ لھتیں نام کہ انّی منی زھن ءَ نہ اَنت۔ بلے کادر بکش نامداریں پھلوانے ۔ ھمیشانی تہ ءَ گیشتر ما گْوستانک ونتگ۔

ھانی ءُُ شے مرید زانتگ اَنت، جاڑو جلب زانتگ۔ بیبگر زانتگ، چاکر زانتگ، گْوھرام زانتگ دْرست چہ ھمیشاں ما زانتگ اَنت۔ ھمیشاں مئے گْوستانک بیان کُتگ۔ بلوچی ءِ مزن نامیں جُھدکار واجہ پکیر شاد ءَ یک باز جْوانیں کارے کُتگ کہ چہ اے چیزاں نپ چست کُتگ ءُُ مرچی اے نبشتاری دْروشم ءَ واجہ پکیر شاد ءَ نمیران کُتگ اَنت۔ اے جُھد ءَ بلوچی زُبان واجہ پکیر شاد ءِ ھر وھد ءَ منّتوار بیت۔

ءُُ ما زان ایں کہ چشیں کارانی کنگ ءَ چنچو وھد چنچو پٹّ ءُُ پول لوٹ اِیت، واجہ پکیر شاد ءَ اے پڑ ءَ باز کار کُتگ۔ باید ایش اِنت کہ ما وتی لبزانک ءِ اے دَور ءَ آشنا بہ بہ ایں۔ پرچا کہ مئے لبزانک ءِ بندات چہ ھمود ءَ اِنت۔ مئے لبزانک ءِ اگاں تو بندات ھمے دَور ءَ بہ کن ئے رد نہ بیت۔

اے مڈّی باید اِنت مئے رنگانی تہ ءَ مارا گون بہ بیت۔ سید ھاشمی وتی کتاب 146146بلوچی زُبان ءُُ لبزانک ءِ گْوستانک 145145 ءِ تاکدیم شانزدہ ءَ گْوش اِیت کہ ’’اے منی ایمّان اِنت کہ نوکیں بلوچی شائری ءِ دیمروی ءُُ گہبودی ءِ واست ءَ بلوچی کْوھنیں شائری یکّے راہ اِنت۔

ءُُ اے مئے چم دیست اِنت کہ انّیگیں دَور ءَ نوکیں شائری ءَ سوبمندیں تریں شائر ھما اَنت کہ آیاں بلوچی ءِ کْوھنیں شائری ءَ چہ شرّی سر ءَ نپ چست کُتگءُُ ھما شائراں کہ زیرگ ءَ میار کُتگ آ داں مرچی دست ءُُ پاد جنگ ءَ اَنت145145سید ھاشمی اد ءَ کْوھنیں شائری ءِ امپورٹنس ءَ بیان کنگ ءَ اِنت۔

اد ءَ چہ مارا ھمے سما بیت کہ اے بھر مئے ھاسیں بھر اِنت۔ مُلّا کمالان ھم ھما ازمکاراں بیتگ کہ بلوچی ءِ یک مزنیں بہرے آئی ءِ امانت بیتگ۔ ءُ آئی ءَ یک شرّیں وڑے ءَ یک پیگمبرے دْروشم ءَ راج ءَ سر کُتگ اَنت۔

مُلّا ءِ توار منی جند ءَ سک وش بیت۔ دومی ایش اِنت کہ مُلّا ءَ گال گیشّینتگ ءُُ گْوشتگ اَنت، بزاں درشانداب آئی ءِ سک وشّ اِنت۔ گوش دارگ ءَ لزّت مان۔ مُلّا ءَ بازیں پیت بندے پُر کُتگ ءُُ شنگ کُتگ۔ بلے من آئی ءِ اے چیزاں انٹرنیٹ ءَ گندگ ءَ نہ آں۔ آئی ءِ اِنچو پیت بند کہ بیتگ اَنت باید اِنت آ اپلوڈ بہ بنت انٹرنیٹ ءَ یک پولڈرے تہ ءَ دْرست سیو کنگ بہ بنت ءُ باید اِنت شنگ بہ بنت۔

توار ءِ شکل ءَ بازیں شَیرے ما شوھاز کن ایں نیٹ ءَ نہ رس اِیت باید اِنت اے کار کنگ بہ بیت آئی ءِ ھمنچو پیت بند کہ شنگ بیتگ آ پھریزگ ءُُ پہ ھر کس ءَ ایر کنگ بہ بنت۔ اے بلوچ ءِ گْوستانک اَنت۔ ھمیشانی تہ ءَ راج ءِ بنداتی چاگرد مان اِنت۔ ھمے گْوستانک بلوچ ءَ یک سیکیولر راجے پیش دار اِیت۔ ھمے گْوستانک ھانی ءُُ شے مُرید ءِ مہری داستان ءَ ترا گْوش اِیت۔ اے باید اِنت پھریزگ بہ بنت ءُُ ایر کنگ بہ بنت۔

مُلّا کمالان ءِ سر ءَ باید اِنت اود ءِ گلّاں ھم شرّیں وڑے ءَ کار بہ کُتیں داں کہ مُلّا کمالان ءِ وڑیں مردمے پٹّ ءُُ پول ءَ کسے در کَیت در گیجگ پر آئی ءَ گْران مہ بیت۔ انچوش کہ شہید سبا دشتیاری ءَ کُتگ اَت 146146سیدھاشمی ریفرنس کتابجاہ145145 ءِ دروشم ءَ۔ مُلّا کمالانءِ وڑیں ازمکار مئے لیجنڈ اَنت۔ مئے گْوستانک ءِ مارا سرکنوک اَنت۔

باید اِنت آئی ءِ سر ءَ گیشتر پٹّ ءُُ پول بہ بیت ، آئی ءِ نبشتگیں چیز یکجاہ کنگ ءُُ شنگ کنگ بہ بنت۔ گیشتر ھمے نیمگ ءَ دلگوش دیگ بہ بیت کہ آئی ءِ پیت بندیک یکّ ءَ سائیٹے ءَ اپلوڈ بہ بنت۔

اے مزنیں کارے بیت پہ بلوچی ءَ ھما سنگتانی کہ دزرس ءَ یا واجہ ءِ کھول ءِ تہ ءَ ھست کہ آ ایشاں یکجاہ بہ کنت ءُ رد ءُ بندی شنگ بہ کنت۔ مُلّا نمیران اِنت۔