اے چیر ءُُ اندریں گپے نہ انت کہ بلوچستان دنیا ءِ سیر ءُُ آبادتریں سرڈگارں چہ یکے ءُُ ننکہ اے گپ چہ دنیا ءَ چیرءُُ اندر انت کہ بلوچ راج دنیاءِ وارتریں راجاں یکے ۔ دنیا زانت کہ پاکستان ءِ ارزشتی بالاد گوں بلوچستان ءَ بندوک انت ۔

بلئے وت پاکستان ءِ تہا بلوچستان ءِ ہچ وڑیں ارزشت ءُُ بستارے نیست بدبحتی ایش نہ انت کہ بلوچ راج معاش ءُُ مالیاتی رنگ ءَ وار ءُُ نیزگار انت بلکیں بدبحتی ایش انت کہ بلوچ راہشون ءُُ راہدربری دروشم ءَ ہم سک وار ءُُ بزگ انت۔

پرچکہ نواب اکبر خان بگٹی ءُُ نواب خیر بخش مری ءَ پد بلوچستان ءَ چشیں رہشون ءُُ سرے دز نہ کپتگ کہ چہ وتی سر ءَ سر بگوزایت ءُُ بلوچ راج ءِ حق ءُُ درورسیلہانی گپ ءَ بجنت ۔

ہرچ چشیں سرے کہ چست بوتگ حاکماں آئی ءِ سر بورینتگ پمشکہ چیزے رہشوناں حق ءُُ انصاف ءِ گپ یلہ داتگ ءُُ چیزے ءَ ہما گپ بنا کتگ کہ حاکمانی گپے بوتگ انت پمشکہ سیندک ، ریکوڈک ءُُ حب گولڈ اینڈ مائنز پروجیکٹ بلوچ ءِ راج ءِ ہچ در ءَ نہ شتگ انت ۔چہ بنجاہی حکومت ءِ نیمگ ءَ سوئی گیس رائیلٹی سیندک ءُُ ریکوڈک ءُُ حب گولڈ پروجکیٹ ءِ رائیلٹیاں دئیگ ءَ جہندم کتگ بلوچستان ءِ رہشون بلوچستان ءِ حقءِ گروگ ءُُ بنجاہی حکومت ءَ بلوچستان ءِ ہستیں نوکریانی کوٹہ ءِ گرگ ءَ ہم سوبین نہ بوتگ انت ۔

نواز شریف ءِ دور ءَ بنا بوتگیں سی پیک( کہ عالمی حاکمانی واہگ ءُُ تماہ انت ) ءِ بر ءُُ ثمر ہم بلوچستان ءَ سر نہ بوتگ انت نوں اے گپ وت عمران خان ءِ حکومت ءَ پدر کتگ کہ اے پروجیکٹ ءُُ زر ءُُ مال چین ءِ حکومت ءَ ماں پاکستان ءَ سی پیک ءِ در ءَ آؤکیں دمگ ءُُ ہندانی بابت ءَ نامینتگ انت کہ دمگ ءُُ ہندانی مردمانی سرا ہرچ کنگ بہ بنت بلئے نواز شریف ءُُ ن لیگ ءِ حکومت ءَ اشاناں چہ بلوچ راج ءُُ سی پیک ءِ راہءَ کپتگیں بزگیں مہلوک ءِ حق ءِ دامن ءَ پل اتگ ءُُ لاہور ءُُ میانی پنجاب ءَ ہرچ کتگ انت ۔

بل ایشیءَ ءُُ بزور آئی ءَ کہ نہ گوں نواز شریف ءَ گلہ ءُُ زنگے بیت ننکہ شگان ءُُ پیگورے بلئے بلوچستان ءَ نامی ئیں راج دوست ءُُ بقول دونمبریں دانشوران پراسس ءَ چہ آتکگیں بلوچ راج کاراں ہم پہ میان ءِ پنجاب ءِ دیمروئی ءُُ شوکُکیں نواز شریف وشی ءُُ رزا ءُُ نہ ایوک ءَ بگلگ جتگ بلکیں چو سوتیاں وتی گٹ ءِ تل برتگ کہ بنی آدم بن دپترءَ ایوک ءَ نواز شریف تچک ءُُ ایمانداریں رہشون انت۔

بلئے مادیست کہ بلوچستان ءَ راج دوستیں سرانی حکومت ءِ ہلاسی ءَ یو۔ین۔او ۔رپورٹ اتک کہ بلوچستان دنیا ءَ وار ءُُ نیزگارتریں سرڈگار انت ۔ بلئے لج نہ کنت کلیر ءَ کہ بے تاک ءَ بر کنت ،اشاں چو کلیر ءَ لج نہ کنت ءُُ گش انت کہ ما وتی 5سالاں بلوچستان ءَ ہمنچک دیمروئی داتگ کہ گوستگیں 65 سالاں دئیگ نہ بوتگ ۔ اشانی دیمروئی ہمیش انت۔

وتی کس ءُُ عزیزانی 2ءُُ 3ارب کلدارءِ ٹھیکہ ئیگ انت کہ آہانی باپشت ءَ یک کلو میٹرءِ روڑ ءُُ یک دو کالج جوڑ کنگ بوتگ ۔ اے وہد ءَ اوں بلوچستان ءَ سی پیک ءِ نوکیں پروجیکٹانی بجبجارگ انت ءُُ عمران خانءِ جندے گشتن انت۔

کہ نواز شریف ءَ سی پیک ءِ بلوچستان حق ءُُ مز میانی پنجاب ءَ بکشاتگ انت ءُُ آ گوں سعودی عرب ءِ سی پیک ءِ ہواری ءَ بلوچستان ءَ تاجے سرا ءُُ پونزے دیمءَ دنت بلئے گندگ بیت کہ نوکیں حکومت ءِ نوکیں پاکستان ءِ نوکیں اوگام ءُُ نعرہ پہ بلوچ مہلوک ءَ ہچ وڑا نوک نہ انت ۔ سیندک و ریکوڈک ،حب ءُُ وندر ءِ مہلوک انگت شپ ءَ ہمشام انت ءُُ روچ ءَ ہم ناری۔

گوادر ءِ مہلوک انگت پہ ترمپے آپ ءَ تلوس ایت ءُُ کیچ،پنجگور ،خاران ، دالبندین ءِ ورنا پہ بے روزگاری ءَ وت کشی کنگان انت ۔ ناں زیکیں حکومت ءَ پہ بلوچستان ءَ دردے لاپ ءَ بوتگ ءُُ ننکہ مرچگیں حکومت ءِ گوش ءَ پرے گپ ءَ مورے وارت ۔بلوچ نواز شریف ءِ حکومت ءَ وار ءُُ بزگ بوتگ ءُُ بلوچ عمران خان ءِ حکومت ءَ ہم وار ءُُ بزگ انت ۔

زی چہ سی پیکءَ ریکوڈک ،سیندک ءُُ حب گولڈ اینڈ مائنز پروجیکٹ ءَ چین ءُُ میانی پنجاب ءِ لاپ سیر بوتگ انت مرچی چین ءُُ سعودی عرب ءِ لاپ بنت ۔ہور گواریت کہ بلوچ ءِ نگن کپے ءُُ نگواریت کہ ۔۔۔۔۔۔