زانت پہ بہاگرگ نہ بیت اے گپ بائد نوں جنگ مہ بیت پرچکہ زانت بہا ہم بیت ءُُ زانت ءِ وڑ وڑیں کیمت اوں است انت ،کسان زانتانی کسانین کیمت ءُُ مز ن زانتانی مزنیں کیمتے است انت ۔ایوک ءَ بہا گروک پکار انت ۔بلکیں ہما گپ شما اِش کتگ کہ’’ بھکتی ہے ہرچیز بھکانے والا چاہئے‘‘ بزاں ہرچی بہا بوت کنت ایو ک ءَ بہا کنوکے بہ بیت۔

انوں وانگ ءُُ زانگ ءِ پڑاں انچیں بہاءُُ زورے بندات انت کہ کس کسی نہ انت ۔ہما سند ءُُ ڈگری کہ پہ لس مردمے ءَ یاکہ انچیں منی ڈولیں بے زانت ءُُ جاہلیں مردمے ءَ پہ واب بوتگ انت مرچی ہرکس گورا است انت ۔

ایشی ءِ ذمہ وار کئے انت ہمے بہا،زوریں مردم ۔مئے انچیں دیار ے کہ مردم چیزاں پہ واہگ ءُُ وتی متاہ ءَ نہ زور اَنت بلکیں پہ شوق ءُُ فیشن ءَ زور اَنت۔دلوتانی رم کہ سر ءُُ دُمب اَنت ایشانی کماشی ءَ کس کنگ ءَ نہ انت بلکیں دلوت زانت ہمے بکش اَنت کہ ایشانی یک سروکے است انت اِناں بلکیں یکے روت دومی آئی ءِ پشت ءَ سیمی آئی ءِ پشت وہدے اوشت اَنت داں شنگ بنت یک نندیت درست نندان کن اَنت اے بے زانتی اِنت ۔ 

مئے چاگرد ءَ کمو ءُُ باز ہمے رنگ اِنت ۔ہرکس ءَ کہ یک چیزے بندات کت داں دومی سیمی ہمائی سر ءُُ دمب بیت ۔ مکران ءَ وہدے آرٹس کلاسانی نودربرانی بے روزگاری گیش بوت داں مہلوک ءَ سائنس پہ وانگ زرتگ ۔

وہدے یکے ءَ میڈیکل کت داں درائیں نودربراں میڈیکل ءِ راہ گپت ایشی ءِ مستریں درور مرچی کوئٹہ ءَ گندگ بیت کہ ہمک در ءُُ دمکے ءَ کہ نودربرے گندگ بیت آئی ءَ اگاں جست بیت کہ چے وانگ ءَ اِت داں آئی پسو یکے ’’ میڈیکل ‘‘کس دگہ گپ نہ جنت۔

ہمے رنگ ءَ ایم اے ،ایم ایس سی ءَ پد نوں دگہ شوق ءُُ نیمونے دیم ءَ اتکگ کہ ایم فل ءُُ پی ایچ ڈی ،من سدکی ءَ گشاں کہ برو سروے بکن ہما کہ پہ پہر ایم فل ءُُ پی ایچ ڈی ءِ نام ءَ گپت ایشاناں ایوک ءَ ہمے لبزانی سرجمیں معنا ءَ جست بہ کن اگاں ایشاں زانت داں من میاریاں ۔۔۔۔ سد مردماں چہ ایوک ءَ دہ ءُُ بست مردم پہ دل ءُُ ستک پہ زانت ءِ گیشی ءَ ایم فل ءُُ پی ایچ ڈی کن اَنت اے دگہ ہپتاد ءُُ ہشتاد درسد مردم پرے ہاترا ایم فل ءُُ پی ایچ ڈی کن اَنت کہ اے دگہ ءَ مردم ءَ کنگ ءَ انت آ پشت مہ کپیت ۔

بلکیں چشیں ہم مردم ہزاراں است انت کہ آ وتی ایم فل ءُُ پی ایچ ڈی ءِ تھیسسزاں اے دگہ مردماں پر ما اَنت کہ نبشتہ اِش بہ کن اِت۔اے گپ دروگ نہ اَنت ہرکس وتی باتن ءَ بچارایت ءُُ وتا جست بہ کنت کہ آ ایم فل ءُُ پی ایچ ڈی پرچہ کنگ ءَ اَنت ،آواناں زبان ءُُ لبزانک دیم ءَ برگی انت ، نوک نوکیں پٹ ءُُ پول دیم ءَ آرگی اِنت ، سائنسی جوڑشت دیم ءَ آرگی اِنت ،چاگرد ی بدلی آرگی انت آ کجام سوک انت کہ آئی ءَ را ایم فل ءُُ پی ایچ ڈی کنگ ءَ مجبور کنگ ءَ انت ،ہما کہ روزگار اَنت آواں جست بگر درستانی گشگ ہمیش انت کہ پنچ ءُُ دہ ہزار پگار ءَ پِر بیت پمشکا ۔۔۔

ہما کہ بے روزگار انت آوان جست بگر داں پسو ہمیش انت کہ دگہ کار نیست ،ہشکیں نندگ ءَ ناہ ءِ گڈگ کنگ ،ءُُ چشیں ہم مردم است کہ آوانی پسو اے بہ بیت کہ فلانی کنگ ءَ ات پمشکا من ہم کنان گوں ۔ منی دل ءَ اے ہم مزن سند ءُُ ڈگریانی کم شرپی اِنت ،اے زانت ءُُ زانگ ءِ میار بار کنگ اِنت۔ 

یک وہدے بوتگ کہ سدءِ تہا یک مردمے ءَ ایم فل کتگ پی ایچ ڈی وَ بلائیں گپے بوتگ۔بلئے نوں سدئے سد ایم فل ءُُ پی ایچ ڈی کنگ ءَ انت نوں بگش کئی زنگ ءَ جنئے ۔۔۔۔

من اے ہم نہ گشاں کہ کس ایم فل ءُُ پی ایچ ڈی مہ کنت بلکیں من ہمے گشگ لوٹ انت کہ اول وَ اے وڑیں سند ءُُ ڈگری مہ گر کہ ایشانی بابت ءَ تو سرپد نئے اگاں تئی واہگ انت گڑاں پہ ستک ءُُ دل ہمے کار ءَ بہ کنت ءُُ انچیں کارے بہ کنت کہ چد ءُُ ساری نہ بوتگ ءُُ آ یک مدتے ءَ ایر بہ بیت مہلوک آئی در ور ءَ بدنت ۔

بلئے بیاکہ ما وَ انچیں بنگپ پہ وت گچین کن اَنت کہ آ ارزانءَ چہ ارزان مہ بیت ءُُ ہما کہ رہشون اِنت آ ہم وتی کاردار ءَ گشیت کہ انچیں بنگپے گچین بہ کنت کہ ارزان ءَ چہ ارزان بہ بیت ۔نوں چشیں راہشون ءُُ چشیں کاردارے ءَ اگاں ما اے امیت کن اَنت مئے زبان ءُُ لبزانک ءَ یاکہ چاگرد ءَ بدلی بئیت انت دانکہ مارا چہ مستریں ۔۔۔۔۔۔۔۔