گل زمین ءَ داں بچے ودی بیت۔اے شاہدی ءَ دنت کہ اللہ تعالیٰ تینگا چہ بنی آدم ءَ دلپروش ءُُ ناامیت نہ انت ۔ بلوچ ءِ گوستگین ءُُ پیشی مرداں بلوچ ءِ پونز انچو برز ءُُ بلند کتگ کہ آوکیں سدا سالاں بلوچ ءَ پہ وتی گوست ءُُ پیش ءَ جہل جنی لیکہ ءِ آماچ بوہگی نہ انت۔

البت برے برے گمان بیت بے اومیتانی جمبراں ہرچ چاریں نیمگاں چاگرد انگیر کتگ بلئے ہمے جمبرانی شم ءَ کہ روچ ءِ برانزے درا بیت گڑا بلوچ ءِ دل پدا گرکے جنت ، گورت بیت ۔ 

بلوچ انگریزءِ گلامی ءَ پد یکشل ءَ دستءُُ پاد جنان انت ، گامے دیم ءَ گامے پدا ۔ بلئے وشیں گپ ءُُ حال ایش انت کہ موسم ہرچ وڑ بہ بنت بلوچ نہ نشتگ اے یک زندگیں راج ءِ نشانی انت ( ناسرپد انت کہ گش انت کہ بلوچ مردگ پرستیں راجے) بر سیاسیگلے ، برے لبزانکی گلے ءُُ برے چاگردی گلے ، بلوچ ءِ بردستانی ہور تم کنگ نہ زانت ۔

ہمے گلانی درچ ءَ یک نوکیں گلے آغا عبدالکریم امن فاونڈیشن انت۔ عبدالکریم فاونڈیشن ءِ بنگیج ءِ مول ءُُ مراد بلوچ راج ءِ دور ءُُ گستائیں دمگاں مردمان ( میڈیکل) جان سلامتی ءُُ وانگ ءُُ زانگ،ایجوکیشن ءِ پجارینگ انت۔ جان سلامتی ءِ درچ ءَ ایمبولنس ، میڈیکل کیمپ مپت ءَ دارو ءُُ درمان،وانگ ءُُ زانگ ءِ درگت ءَ لائبریری جوڑ کنگ ، کتاب ءِ بہر ءُُ بانگ ، سیمنار ءُُ لکچری مراگش ءِ ہڈ دئیگ انت ۔ 

آغا عبدالکریم ءِ امن فاونڈیشن ءِ بنگیجی باسک ءُُ کاردار اے مردم انت ،عید محمد ،کریم،ندیز کرد،اللہ داد،امیر عباس، اسد اللہ،الہی بخش،وحید اللہ، محمد عالم، حمید اللہ،سمیع اللہ ،رازق،عبدالواحید،عبدالسلام ، افتخار احمد،جاوید احمد،ابرار احمد کرد،بابل یاسین،۔

آغا عبدالکریم ءِ فاونڈیشن ءِ سماکار اں چہ ڈاکٹر سلیم کرد، محمد کرد، ڈاکٹر لعمان حکیم، پروفیسر قاضی قیوم ، نہال خان لہڑی،پدر انت کہاے مردم اے دور ءَ کہ ہرکس چہ وت ءَ گیش نہ انت اے وڑیں مزنیں بارے وتی کوپگاں زرتگ انت اے مردمانی تہ ابازین مردم ہما انت کہ پیش ءَ چاگردی چلوپگ کاری ءَ ہوار بوتگ انت اے نوکیں گامگیج ءَ گوں در ءَ بیت کہ اے مردم انگت چہ بلوچ راج ءِ حذمت ءُُ کمک ءَ دم نہ بوتگ اِش ۔

اے فاونڈیشن ءِ یک جوانیں کارے ایش انت کہ اے یک قبائلی سردارے یا سیاسی سروکے ءِ بدل ءَ یک لس سیاسی کارکنوکےءُُ بلوچی زبان ءِ ادب ءِ کاردارے ءِ نام ءَ ایر کنگ بوتگ۔ 

بلوچ جہد بہ بیت یا بلوچ احوالکاری ءِ پڑ ءَ پٹ بہ بنت یا بلوچ زبان ءُُ لبزانک بہ بیت آغا الکریم امن یک انچیں نامے کہ آئی ءَ ہرکس زانت ءُُ سرپد بیت آئی عبدالکریم بلوچ جہدکارانی دومی دور ءِ ہما مردم یکے کہ آہاں مول ءُُ مراد ءُُ زند ءِ مقصد بلوچ ءِ وشحالی ءُُ دیمروئی ات اگاں اے سنگتاں اے درچ ءَ چشیں گامگیج زرتگ ءُُ وت فاونڈیشن نام واجہ آئی عبدالکریم امن ءِ نام ءَ حبر کتگ گڑا اے پہ عبدالکریم امن ءِ حذمت ءُُ جہدانی مناک ءَ جوانیں گا۔

میجگے ات آغا عبدالکریم امن فاونڈیشن ءَ وت اولی گامیگج ۷ اکتوبر ءَ ماں وڈھ ءَ یک میڈیکل کیمپے ءِ جنگ ءَ گوں کتگ اے میڈیکل کیمپ یک شمبے ءِ روچ ءَ جنگ بوتگ ات کہ ایشیءِ تہا اے ڈاکٹراں بہرزرتگ ات۔

ڈاکٹر مجبوب علی زہری ، ڈاکٹرنوراحمد،ڈاکٹر طارق مری،ڈاکٹر شازیہ بنگلزئی، ڈاکٹر عزرابلوچ، ڈاکٹر حاجرہ رحمان ، ڈاکٹر خان زاوی رحمان ڈاکٹر افضل ، اشتیاق بلوچ ، عمران بلوچ ،نرسنگ اسٹاف ، روبینہ ، درمحمد ، خیرالدین ،عبداللہ، اے مردمانی جہد ءُُ کار ستاکرزانت کہ اشاں وہد ءُُ پاس پہ بلوچ ءِ حدمت ءُُ کمک ءَ داتگ انت ۔

بے اے یک جوانیں کارے بلئے اے کار بید مہلوک ءِ مدد ءُُ کمک ءَ نہ بیت بائدیں بلوچ راج آغاالکریم امن فاونڈیشن اے نیکی کاراں وت ءَ ہوار بگیج ایت۔