سی پیک ءَ آہگ ءِ اوگام ایش ات کہ اے پاکستان ءِ نام ءَ بدل کنت پہ پاکستان ءَ دنیا ءَ نوکیں راہ ءُُ در پچ بنت ۔اے درچ ءَ نہ ایوک ءَ پاکستان ءِ وام دئیگ بنت بلکیں پاکستان وشحال بیت ۔

ایشی ءَ ہوار اے ہم گشگ بیت کہ چین پاکستان ءِ مستریں دوستیں ملک انت کہ ایشیءِ دوستی چہ ہمالیہ برز ترانت ءُُ بحر بلوچ ءِ جہلانکی ءَ چے جہل ترانت۔چین ءِ دوستی ءَ گوں اے گشگ بوتگ ات کہ امریکہ ءِ دوستی ءَ پاکستان ءَ را ہچ نپ ءُُ سیت نداتگ ءُُ امریکہ ہرچ جنجال ءُُ مصیبت ءِ وہد ءَ درشتگ چرآئی ءَ چے دنیا ءَ پاکستان ءِ نام ءُُ توار حراب بوتگ ۔ 

پرے گپ ءَ مہلوک گل ءُُ شادان ات کہ ملک ءَ جوانیں دوست ءُُ دوزواہے رستگ دومی دست ءَ ہمے تبلیغ ءِ پشت ءَ بلوچستان ءَ سیندک ءُُ حب گولڈ اینڈ کاپر پروجیکٹ چین ءِ حوالہ ءَ کنگ بوت انت ۔

ہمے میان ءَ ریکوڈک ہم چین ءَ دئیگ جار پرینگ بوت ءُُ پدا سی پیکءِ مزنیں پروجیکٹ ءِ حال اتک بلئے درائیں پروجیکٹانی چین ءِ حوالہ کنگ ءَ پد گپ ہمے دیم ءَ اتک ’’ زامات کہ نوک انت وسی گنوک انت‘‘ پیش ءَ اگاں امریکہ پاکستان ءِ مدد ءُُ کمک نہ کتگ بلئے چہ پاکستان ءَ گولڈ ءُُ کاپر ءُُ ایندگہ مادن ارباں ڈالرانی حساباں نہ برتگ انت ۔

بلئے چین بلوچستان ءَ سالے ارباں ڈالر ءِ مادن ءَ درکنت ءُُ بارت ءُُ کس ءَ را ایشی ءِ ھساب ءَ نہ دنت ءُُ ماراوتی دوستی ءِ گواجار ءَ ہم دنت بلئے دومی نیمگ ءَ ہمے پروجیکٹانی پشت ءَ پاکستان ءَ را 30ارب کلدار ءِ وام دار کتگ ۔ 

پیش ءَ پاکستان ءِ نوکیں وزیراعظم عمران خان اوگام ءُُ گپ ہمیش انت کہ آ چہ آئی ۔ایم۔ایف ءُُ ایندگہ ادارگاں وام ءُُ شام نہ کنت بلئے انوں لہتیں روچ انت کہ پاکستان ءِ نوکیں حکومت ءِ عمران خان ءِ کماشی ءَ آئی۔ایم ۔ ایف ءِ دروازگ ءِ دپ ءَ اوشتاتگ ءُُ واہ زاری کنگ ءَ انت ۔

مہلوک ءِ گپ ایش انت کہ اگاں چین دوستی گوں پاکستان ءَ چہ ہمالیہ ءَ برز تر ءُُ چہ بحر بلوچ ءَ جہل ترانت گڑا پرچہ اے مصیبت ءِ وہد ء۔ گندگ نہ بیت وہدیکہ چین پاکستان ءِ صوبہ بلوچستان ءَ گوادر پورٹ ، سیندک، حب ءُُ ریکوڈک ءِ ارباں ڈالرانی کٹ ءُُ کمائی ءَ انت اگاں چین پاکستان ءِ گیشتریں واماں دات نہ کنت گڑا پاکستان ءِ ہمے پروجیکٹانی ارباں ڈالر ءِ واماں بائدیں بدنت۔ 

وہدیکہ دومی دست ءَ گوستگیں روچاں وہد ءِ عمران خان ءِ حکومت ءَ گوں آئی ۔ ایم ۔ایف ءِ گل ءَ ماں بالی گندو نندکرتگ ات ءُُ چرآئی ءَ لوٹ کتگ ات کہ پاکستان ءِ مالیات ءِ گہتر کنگ ءِ حاترا وام ءُُ مالے بدنت گڈا آئی ایم ایف ءِ لوٹ ءُُ گپ ایش ات انت کہ پاکستان ءِ گیشتریں وام سی پیک ءِ بابت ءَ چین ئیگ انت، اے گپ اے حاترا جنگ بوتگ ات کہ آئی ۔ایم ۔ایف ایوک ملکے راجی ءُُ چاگردی دیمروئی ءِ حاترا ملکے وام دنت وہدیکہ دگہ ملکے ءِ وامانی دئیگ ءِ حاترا وام دات نہکنت ۔ 

اے درچ ءَ اے گپ گیر آرگی انت کہ سی پیک ءِ پروجیکٹاں پہ پاکستان ءِ دوست ءُُ دوزواہانی حاترا دئیگ نہ انت بلکیں پہ وام دئیگ انت کہ آہاں گوں سٹ ءُُ لوٹ انت بلئے گوستگیں نواز شریف ءِ حکومت ءَ اے بابت ءَ مہلکو ءَ گوں دروگ بستگ ۔ اے درچ ءَ بلوچستان ءِ راج دوستیں حکومت ہم گوں نواز شریف ءِ اے دروگاں ہوار بوتگ انت نوں آوکیں آئی ایم ایف ءِ ٹیم پاکستان ءَ کیت گڑا 2015 ءَ ملک ءَ نواز شریف ءُُ بلوچستان جوڑ بوتگیں آ وہد ءِ حکومت ءِ درائیں دروگ پدر بنت ۔

اے بابت ءَ حدامرزی صدیق بلوچ ءَ مدام وتی شونگالاں اے گپ نبشتہ کتگ انت کہ چین گوں سری لنکا ءُُ بنگلہ دیش انچو کتگ ءُُ اے وہد ءَ گوں پاکستان ءَ ہم کنگ ءَ انت ۔ آ مدام پہ اے گپ ءَ بژنیگ انت کہ بائدیں بلوچستان ءِ راج دوست نواز شریف ءِ دپ دروگ مہ بند انت ۔

بالی ءُُ آئی ایم ایف ءَ ڈل ءَ گوں پاکستان ءِ حکومت مردمانی گندو نند ءَ یک روچے رند امریکہ ءِ دری کارانی وزارت ہم یک ترانے دیم ءَ آورتگ کہ آئی ءِ تہا گشگ بوتگ کہ چین دنیا ءَ ہما ملک انت کہ کستریں ملکاں واجہ دنت ءُُ وتی لوپ کنت ءُُ پدا آہاں مجبور کنت کہ آ وتی مادن ،زر ءُُ تیاب ءُُ ایندگہ مادناں ہمائی ءِ حوالہ بکن انت ۔

امریکہ ءِ گشگ ات چین ءَ مدام ایندگہ واجہاں بلیک میل کنگ ءِ اجازت دئیگ بوت نہ کنت ۔ اے درچ ءَ اگاں نوکیں حکومت واج چہ آئی ایم ایف زورت وَ بزورایت بلئے بائدیں نوں اے گشگ بہ بیت کہ چین پاکستان ءِ دوست ءُُ دوزاہ انت دوستیں دوزواہی ہچ جاہ چش نہ بوتگ۔