اے گپ دائم ءَ اِش کنگ بوتگ کہ اگاں مردمے جوانیں کارے کنت داں آئی ءِ دست گرگ ءُُ آئی ءِ ہمے کارانی دلبڈی کنگ ءُُ آئی ءِ کاراں گیش کنگ ءَ راہ ءُُ در پچ کنگ بنت ۔بلئے اے اولی بریں کہ یک ادارگے ءِ جوانیں کارانی صلہ ءَ آئیءِ راہ ءُُ در بند کنگ بوہگ ءَ انت۔

اے ہم اش کتگیں گپے کہ وہدے گپ یک مردمے ءُُ قومے ءِ نیام ءَ کیت داں ہر وڑ بہ بیت مردم قوم ءِ حق ءَ کیت انت بلئے اے بری قوم یکر کنگ ءُُ یکیں مردم ءِ پلہ گرگ بوتگ۔بلوچی اکیڈمی ءِ دپتر ءُُ آئی ءِ پیش ءِ کتہ کاریاں بل کہ پہ بلوچی زبان ءُُ لبزانک ءَ آئی ءِ چے کردے بوتگ بیا انوگیں حال ءَ ایوک ءَ بچار کہ ہمے گونڈیں گرانٹ ءَ گوں آئی ءَ چے چے کتگ ،۔

لوگ پہ لوگ ،ادارگ پہ ادارگ ،ہمک بلوچ ءُُ در بلوچ،ملک ءَ ءُُ چہ ملک ءَ ڈن بلوچی اکیڈمی ءِ چھاپ کرتگیں درائیں کتاب اکیڈمی ءِ ایرکنگ ءِ بدلہ یاکہ چہ کتابانی عوض ءَ زر ءُُ مال گرگ ءِ جاہ ءَ مپت کتابانی بہر ءُُ بانگی،بلوچی زبان ءُُ لبزانک ءِ مستریں ڈکشنری ءِ جوڑ کنگ ءُُ مہلوک ءِ دست ءَ دئیگ ،بلوچی عہدی شعرانی گچین ءُُ نوکیں ترتیبے ءَ گوں دیم ءَ آرگ ،بلوچی کتابانی پی ڈی ایف جوڑ کنگ ءُُ انٹرنیٹ ءَ شنگ کنگ دانکہ درائی مردم چہ ایشی ءَ سرپد بہ بنت ۔

بلوچستان ءِ دپتر ءَ اولی براں بلوچی انسائیکلوپیڈیا ءِ جوڑ کنگ ، وتی اکیڈمی ءِ پولکاری جنزل بلوچستانیات،بلوچی ٹو انگلش ڈکشنر ی ءِ کار بل ایشاں بلوچ اسکالرانی کمگ ءَ یک ریفرنس لائبریری ءِ جوڑ کنگ ،ءُُ بلوچ ءُُ بلوچی ءِ سرا کارکنوکاناں اسکالرشپ دئیگءَ ابید یک ادبی کدگے پہ ادیب ءُُ شاعراں یک بنزہ یے اے کار کم انت کہ کتابانی چھاپ ءُُ چھاپ ءِ مُز دئیگ اگاں اے کار المی نہ اَنت ،ءُُ حکومت لوٹیت کہ اے کار مہ بنت وَ گپ حئیر انت بلئے بلوچ مہلوک ءُُ بلوچ کلمکار پرے کاراں سک وش اَنت ۔

ہمک ماہ ءَ بلوچی اکیڈمی ءِ کارداراں پہ ہمے کارانی پداں ملک ءُُ درملکءَ چہ مبارکی نمدیانی آئیگ مردمانی ہمے کارانی توسیپ کنگ وت ہمے چیز ءِ باہند انت کہ بلوچی اکیڈمی جوانی ءَ کار کنگ ءَ انت ۔

ابید چہ ایشی ءَ بلوچ ءُُ بلوچی تاریخ ءُُ لبزانک ءِ بابت ءَ کلاں گیش کتاب ہمے اکیڈمی ءِ چھاپ کرتگین اَنت اگاں اکیڈمی ءِ چھاپ بند بہ بنت یاکہ وتی کاراں بدارایت داں لبزانک ءَ یک بلائیں نکسے ءُُ تاوانے رست کنت اگاں حکومت لوٹیت کہ اے نکس ءُُ تاوان بئیت انت داں جوانیں گپے کہ حکومت ءَ بلوچی اکیڈمی ءِ ہمے کمیں گرانٹ ہم نیم کتگ ءُُ داتگ۔بلوچستان ءِ بنجاہی شہر کوئٹہ ءَ دگہ دو اکیڈمی است انت براہوئی اکیڈمی ءُُ پشتو اکیڈمی سرکار وت یک ٹیمے جوڑ بہ کنت ءُُ ہر سے ایں اکیڈمیانی کار ءُُ کرداں بچار ایت رند ءَ اکیڈمیانی گرانٹاں کم بہ کنت ۔اے کار اختر منیگل ءَ دیستگ ءُُ اکیڈمی ءَ را یک ماڑی یے ءُُ گرانٹ ءَ دہ لکھ کلدار داتگ ۔

رند ءَ نواب رئیسانی ءَ اے کار نہ آ وہدے نہ بوتگ اَنت بلئے ایشانی بابت ءَ گشگ بوتگ اَت آئی ءَ ہم گرانٹ گیش کت ءُُ پنجاہ کت وہدے ڈاکٹر ملک ءِ حکومت اتک آئی ءَ را چنائی ءَ اے دگہ اکیڈمیانی گرانٹ گیش کنگی اَنت آئی ءِ اے درگت ءَ بلوچی اکیڈمی ءِ ہم گرانٹ گیش کت آ دگہ گپے کہ بلوچی اکیڈمی ءِ گرانٹ ءِ گیشی چہ آ دوئیں اکیڈمیانی گشاد ءَ کم اَت ءُُ بلوچی اکیڈمی ءِ کار گیش اِتاں بلئے پدا اوں ۔

نوں بلوچی اکیڈمی ءِ لوٹ ہمیش اَت کہ آئی ءِ گرانٹ ءَ انگت ءَ چیزے پر کنگ بہ بیت دانکہ آ زبان ءُُ لبزانک ءِ کاراں چد ءُُ گیشتر بہ کنت بلئے حکومت ءَ را اے گپ وش نہ بوتاں زانہ پمشکہ آئی ءَ را ایوک ءَ گرانٹ ءِ گیش کنگ ءِ سےء ائیں پروفوزل کہ گم کنگ بوتگ اَنت آ گپ ءَ نوں سالے پیلو اِنت آ اوں شموش کار کت اَنت بلکیں اکیڈمی ءِ استیں گرانٹ ءَ را ہم کم کنگ ءِ جار جتگ اَت ۔ادبی اکیڈمی ءُُ ادبی مردمانی نیمگ ءَ اے کارپد ءِ سک باز ملامتی کنگ بوتگ ءُُ انگت ءَ گپ پہ زار شانی ءَ نہ شتگ بلئے گپ دیم پہ زارشانی ءِ نیمگ ءَ روگ ءَ انت۔

ایشی ءَ پیسر کہ آپ چہ سر ءَ سر گوز بہ بیت حکومت بائدوتی کارپد ءِ سرا دوارچاری بہ کنت چوش مہ بیت کہ آپ سر گوز بہ بیت ۔مرچی انٹرنیٹ ءَ درملکاں نشتگیں مردماں ہم اے گپ ءِ سرا وتی زارشانی درشان کتگ ءُُ حکومت ءِ اے گامگیج ایر جتگ ۔ حکومت بائدانت کہ ہما اکیڈمی کہ جوانی ءَ کار کنگ ءَ اَنت آئی ءِ دست ءَ بہ گپت پرچکہ بئید ئے حکومتی کمک ءَ ہچ ملک ءَ کار بوت نہ کنت بلئے مئے حکومت دستِ وت وتی روتگانی برگ ءَ دلمانگ انت گڑا چون کنئے ۔

بلوچی اکیڈمی ءِ واکدار ءُُ بلوچی زبان ءُُ لبزانک ءِ دوستداروکانی ہمے لوٹ انت کہ حکومت نہ ایوک ءَ وتی ہمے گامگیج ءَ واپس بزور ایت بلکیں آ استیں گرانٹ ءَ گیش بہ کنت ءُُ اکیڈمی ءَ بہ چکاسیت کہ آ گوں گیشیں گرانٹاں چونیں چونیں کار کرت کنت۔ قومانی زبان ءُُ لبزانک ءِ دیمروئی دئیگ ءَ اکیڈمیانی کرد درستاں زیات انت بلئے چاپ یک دستے توار نہ کنت یکے نیمگے حکومت کمک ءِ باری ءَ گرانٹاں کم کنت ءُُ پدا بہتام ہم جنت کہ اکیڈمی زبان ءِ دیمروئی ءَ کار نہ کنت ۔پمشکا عطا ءَ گشتگ کہ 

درآمدے کہ ترا عزت ءُُ شرپ بکش ایت
وتی ہما کہ تئی گاری ءِ پدءَ کپتگ