بلوچی اکیدمی اے وہد ءَ بلوچی زبان ءُُ لبزانک ءِ مستریں ادارگ انت ۔بلوچی اکیڈمی کہ مرچی اے جاہ ءُُ کچ ءَ سر بوتگ یکیں روچ ءَ نہ بوتگ بلکیں ایشی ءِ جوڑ کنگ ءُُ دیمروئی ءَ بازیں مردمانی جہد ءُُ جفا ہوار انت ۔

بلوچی اکیڈمی وہدے 1961 ءَ جوڑ کنگ بوت گڈا ایشیءَ را ماڑی ءُُ جاھے است ات ءُُ ننکہ گرانٹ ءُُ فنڈے ! بلئے وہدے بلوچی اکیڈمی ءِ کماشی ءِ ڈبہ واجہ جان محمد دشتی ءِ کوپگاں دئیگ بوت گڈا آئی ءَ بلوچی اکیڈمی ءِ دیمروئی ءُُ محکمی ءِ حاترا گران ءُُ سنگین گامگیج زرت ۔

آئیءِ دزبندی ءِ سرا بلوچستان ءِ آ وہدءِ سروزیر اختر مینگل ءَ نہ ایوک ءَ بلوچی اکیڈمی ءِ حاترا زمینے زرت ءُُ دات بلکیں آئی ءِ ماڑی ءِ را ہم جوڑ کت ۔ایشی ءَ ہوار بلوچی اکیڈمی ءِ سالانہ گرانٹ کہ دہ ہزار ات ایشی ءَ را دہ لکھ کت کہ چریشی ءَ بلوچی اکیڈمی ءِ پہ زبان ءُُ لبزانک ءَ کار ءُُ گامگیج پراہ ءُُ شاہگان بوت انت ۔

پدا وہدے 2008 ءَ اسلم رئیسانی ءِ حکومت اتک گڑا نواب اسلم رئیسانی ءَ گوں بلوچی مڑاہ ءَ بلوچی اکیڈمی ءِ گرانٹ چہ دہ لکھ ءَ زرت ءُُ 50لکھ کلدار کت ۔

چرے گرانٹ ءَ بلوچی اکیڈمی ءِ کارانی تہا سک باز دیمروئی اتک اے وہد ءَ بلوچی اکیڈمی ءِ بازین مراگشاں ہوار انسائیکلوپیڈیا بلوچستانیکا ، بلوچی انگلش ڈکشنری ، انگلش بلوچی ڈکشنری بلوچی رہبند ءُُ کتابانی پبلشنگ ءِ سرا کار ءَ انت ۔

بلوچی اکیڈمی ءَ کلیات عطاشاد، کلیات گل خان نصیر ،گچین شعر انی کتاب عنایت اللہ قومی ءَ ہوار بلوچی کلاسیک شاعری، بلوچی عہدی کسہانی سرا کتاب چاپ کتگ اے وہد ءَ بلوچی اکیڈمی ءِ چاپ کرتگیں کتابانی لڑ کساس پنچ سد بیت کہ ایشی ءِ تہا بلوچی ڈکشنری ہم ہوار انت کہ دو وار چاپ کنگ بوتگ ۔

اے گپ گشگ نا راست بیت کہ بلوچی اکیڈمی دنیا ءِ درائیں اکیڈمیاں چہ جوان تر کار انت بلئے گپ راست انت کہ بلوچی اکیڈمی چہ پاکستان ءِ ہچ اکیڈمی ءِ پد ءَ نہ انت اگاں بلوچی اکیڈمی ءِ کار ءُُ گامگیج براہوئی اکیڈمی ءُُ پشتو اکیڈمی پشاور ءُُ کوئٹہ ءِ دیم پہ دیم کنگ بہ بنت گڑا بلوچی اکیڈمی ءِ کار ءُُ گامگیج مستر ءُُ برز تر یں جاہ ءَ ایر کنگ بوت کن انت ۔ اے گپ ءَ وت پشتو ءُُ براہوئی گپ کنوک ءُُ نبشتہ کنوک من انت ۔

ایشی ءَ ہوار بلوچی اکیڈمی ءَ را سالانہ ہرچ گرانٹے کہ دئیگ بیت آئی ءِ ہمک سال آڈٹ کنگ بیت ءُُ اے آڈٹ رپورٹ ہمک سال سرکاری ہزانگ ءِ بہرگ ءَ جم کنگ بیت اے حاترا اے گشگ بوت نہ کنت کہ بلوچی اکیڈمی ءِ گرانٹ چہ بلوچی زبان ءُُ لبزانک ءَ در دگہ نیمگے ءَ ہرچ بوہگ ءَ انت پمشکا بلوچستان ءَ ہر چ نوکیں حکومتے ءَ ہچبر بلوچ اکیڈمی ءِ گرانٹ۔

کم نہ کتگ ۔ گوستگیں حکومت ءِ سر وزیر ءَ وہدے براہوئی ءُُ پشتو اکیڈمی ءِ گرانٹ ءَ 90 لکھ گیش کت ءُُ آہانی گرانٹ چہ دہ لکھ ءَ یک کروڑ کلدار کت گڈا ہمے وڑا بلوچی اکیڈمی ءِ گرانٹ ہم ودینت ءُُ بلوچی اکیڈمی ءِ گرانٹ ءَ را 50 کلدار پر کت ءُُ ایشی ءَ را یک کروڑ کلدار کت ءُُ پشتو ءُُ براہوئی اکیڈمی ءِ برابری ءَ آورت اگاں چارگ بہ بیت گوں ہمے گرانٹ ءَ بلوچی اکیڈمی وتی وس ءُُ واک ءَ کار ءَ انت۔

بلئے وزیر اعلی جام کمال یوسف عالیانی ءَ گوستگیں روچ ءَ یک پرمانے ءِ سرا بلوچی اکیڈمی ءِ گرانٹ ءَ را 25 لکھ کلدار کم کتگءُُ بلوچی ادبی اکیڈمی ءِ نام ءَ داتگ انت سروزیرءِ چرے گامگیج ءَ بلوچی زبان ءُُ لبزانک ءِ وانوک کلمکاراں مزنیں دلپروشی یے درشان کتگ گچینی چاگردی رسانک در بلوچستان ءِ سروزیر ءِ اے گامگیج ءَ را سک ایر جنگ ءَ انت بلوچی نبشتہ کارانی گشگ ایش انت کہ اگاں سروزیر یک مردمے ءَ یا یک گلے ءَ گرانٹے یا فنڈے دئیگ لوٹ ات گڈا وتی دست ءُُ دلاں پچ بہ کنت۔

ءُُ بہ دنت بلئے سروزیر ءِ کرا مزنیں حکومتی فنڈ ءُُ مالے است بلوچی اکیڈمی ءِ گرانٹ ءِ کم کنگ نہ ایوک ءَ درکانودی گامگیجے بلکیں زبان ءُُ لبزانکی دشمنی یے ہم ۔پرچکہ یک نیمگے حکومت ءَ جار پرینتگ کہ ہندی زباناں دیمروئی دئیگ لوٹ ایت بلئے دومی نیمگ ءَ دمگی حکومت ءِ کماش ءِ نیمگ ءَ ایوک ءَ ہما اکیڈمی ءِ گرانٹ کم کنگ بنت۔

کہ آئی ءِ سیادی گوں بلوچ ءُُ بلوچی ءَ انت چدو ساری کہ بلوچ مہلوک نیمگ ءَ مزنیں زہرشانی یے دیم ءَ بئیت بائدیں بلوچستان ءِ سروزیر اے گامگیج ءِ سر ءَ چار ءُُ بچار بہ کنت ءُُ اگاں انوگیں بلوچ کلمکار ءُُ مہلوک ءَ رازی کت نہ کنت کم چہ کم ءَ دلگران ءُُ دلپروش مہ کنت ہمے وڑا بائدیں آ ہم چو ڈاکٹر عبدالمالک ،نواب اسلم رئیسانی ءُُ اختر مینگل ءِ وڑا اکیڈمیانی گرانٹاں گیش بہ کنت۔