یک جستے کہ بلوچ ءِ مستریں دژمن کئے اِنت داں بازیں مردمے ءِ لیکہ دری مردمانی سرا اَت بلئے اصل ءَ بلوچ ءِ مستریں دژمن آئی ءِ جند اِنت ۔اگاں بلوچ وتی محرم ءُُ وتی دوست وت بہ بیت داں کس آئی ءَ تاوان دات نہ کنت ۔
بلئے بد بحت ہمیش اِنت کہ بلوچ وتی دژمن وت اِنت ۔ہمے زوتاں یک دگہ درورے بلوچ دژمنی ءِ دپتر ءَ گیش بوت کہ یک بلوچے ءَ چون پہ وتی جند ءِ واہشے ءَ سرجمیں راج ءَ را جنجالے ءَ دور داتگ ۔بلوچی اکیڈمی کوئٹہ نہ ایوک ءَ کوئٹہ ءِ بلکیں سرجمیں بلوچستان ءِ نمائندگ اِنت اگاں کسے گوں اے اکیڈمی ءَ دگہ بازی بہ کنت یاکہ ایشی ءِ ایرجنی ءَ بکنت بزاں آسرجمیں راج ءَ را ایر جنگ ءَ اِنت۔
انوں کہ سرکار ءِ نیمگ ءَ بلوچی اکیڈمی ءِ گرانٹ ءَ یک ءُُ دو لکھ ناں بلکیں سرجمیں بیست ءُُ پنچ لکھ کلدار کم کنگ ءُُ انچیں ادارگے ءَ را دئیگ ءِ جار جنگ بوتگ کہ آئی ءِ کتہ کاری وتی جاہ ءَ آئی ءِ عمر انگت ءَ سالے نہ اِنت اگاں اے زر سرکار ءَ دئیگی اِتاں داں بلوچستان ءِ انچیں ادارگے ءَ را بداتیں کہ آوانی کتہ کاری پہ بلوچ راج ءَ باز اَنت ءُُ عمری باوست ءَ بازیں سالاں کار کنگ ءَ اَنت۔
بلوچی اکیڈمی ءِ کتہ کاری چیر نہ اَنت بلکیں آئیءِ انوگیں کتہ کاریاں چہ بازیں مردم نالان ءُُ دلگران اَنت پرچکہ بلوچی اکیڈمی وتی کتاباں بہا نہ کنت بلکیں پہ مفت بلوچاں سر ے کنت ۔
چشیں ادارگ سرجمیں ملک ءَ نیست انت کہ وتی کتاباں اول مفت ءَ بدنت بلکیں اے دگہ ادارگاں چہ حرچ ءُُ درچ ءَ کتاباں روان ہم بدنت بلوچی اکیڈمی ءَ انوں داں پنچ سدنودربراں وتی کتاب مفت داتگ اَنت ءُُ بلوچستان ءِ درائیں ادارگ،اسکول ، کالج،یونیورسٹیاں وتی کتاب دستِ وت سرکتگ اَنت ۔
اگاں ہمے یکیں کار اکیڈمی ءِ دیم ءَ کنگ بہ بیت داں بس اِنت پہ راج دوستی ءَ ایشی ءَ بل کہ چہ درستاں گیش کتابانی رائیلٹی ہم اکیڈمی دئیگ ءَ اَنت ۔بلوچی اکیڈمی ءَ وتی لائیبریری ءَ کوشش کتگ کہ وتی چھاپ کتگیں کتاباں ابید ہما درائیں کتاباں جاگہ بدنت کہ آ بلوچ ، بلوچی ،ءُُ بلوچستان ءِ بابت ءَ بہ بنت دانکہ وانکءُُ اسکالراں گیشءَ چہ گیش کمک ءُُ مدت رست بہ کنت ۔
اے اکیڈمی ءَ را بائد اِنت سرکار چہ درستاں گیش مدت ءُُ تاوان بہ کنت پرچکہ اے دگہ صوبہاں وتی ادارگانی گیشتر مدت کتگ بلئے بلوچستان ءَ ہمے یکیں ادارگ انت کہ اگاں ایشی ءِ جوانی ءَ تاوان کنگ بہ بیت ہمے یک ننگ ءُُ نامے سرجمیں دنیا ءَ بلوچ ءَ را دات کنت ۔مرچی اگاں دری ملکاں بلوچی زبان ءَ را کسے زانت داں آ ہمے اکیڈمی ءِ چھاپ بوتگیں کتابانی سوب ءَ ءُُ آئی ءِ کتہ کاریانی سوب ءَ زانتے ۔
سرکار ءَ بلوچی اکیڈمی ءِ گرانٹ کہ کم کنگ ءِ جار جتگ آ ئی سرا درائیں راج ءَ وتی زار شانی درشان کتگ ءُُ انگت ءَ دلگران انت ءُُ اے زارشانی ءُُ دلگران تاوہدے آسر نہ بیت دانکہ سرکار وتی پرینتگیں جار ءَ بدل نہ کنت ءُُ اکیڈمی ءِ گرانٹ ءَ گیش نہ کنت ۔
سرکار یکبرے گرانٹ ءَ گیش بہ کنت ءُُ بچارایت اگاں اکیڈمی ءَ ہما گپ کہ جتگ اَت آوانی چہ دو ہمنچو کار نہ کت داں آ نہ ایوک ءَ اکیڈمی ءِ گرانٹ ءَ کم بہ کنت بلکیں گرانٹ ءِ جندے مہ دنت۔بلئے انوگیں گرانٹ ءِ کم کنگ ءُُ انچیں کاغدی ءُُ بے نامیں اکیڈمی ءَ را دئیگ کہ آئی ءِ راہچ کتہ کاری ءِ جند نیست انت اے وت پہ حکومت ءَ جوانیں گامگیجے نہ اِنت۔
پرے گپ ءَ بلوچ راج ءَ وتی زارشانی سوشل میڈیا ءَ کتگ اَنت ءُُ روتاکانی بیان ءُُ کالماں چہ وت پدر انت کہ بلوچ راج ءَ را اے راج دژمنیں کار دوست نہ بوتگ ۔مئے گوں حکومت ءَ دستبندی اِنت کہ آ اے جار ءَ واپس بزور ایت ءُُ اکیڈمی ءِ گرانٹ ءَ گیش بہ کنت ۔