بلوچی اکیڈمی ءِ پہ بلوچی لبزانک ءِ گیش کنگ ءَ یک بلائیں کردے است انت کہ کس ایشی ءَ چہ انکار کت نہ کنت ۔ مروچی ہما جاور انی کہ بلوچی اکیڈمی دیمپان بوتگ ءُُ است انت بائد سرجمیں راج پاد بئیت ءُُ گوں اکیڈمی ءَ یکجائی بہ کنت ۔

بلوچی اکیڈمی ءِ بابت ءَ بازین مردم نہ وشیں تران کنت داں منی دل حراب بیت کہ پرچکہ من بلوچی اکیڈمی ءِ زیک ءُُ مرچیگ ہردو دیستگ اَنت بلوچی اکیڈمی ءِ اگدار زی آواں پہ بلوچی زبان ءُُ لبزانک ءَ چتوریں کار کتگ ءُُ انوگیں اگدہ دار چتوریں کار کنگان اَنت ۔ 

بلوچی اکیڈمیءِ نوکیں اگدہ دار کہ اتکگ انت ایشانی کتہ کاری درائیں جہان ءِ دیم ءَ پدر انت دومی گپ ایش انت کہ اے انوگیں کار کنوکیں اگدہ دار درائیں بلوچی زبان ءِ نامداریں نبشتہ کار انت چوکہ واجہ ممتاز یوسف انت کہ آئی ءَ را ہر زانت آئیءِ شعر بلوچی زبان ءِ درائیں گشندہانی دپ ءَ اَنت ءُُ بئید چہ آئی شعر ءَ سرجم لیکگ نہ بنت ءُُ آئیءِ درائیں شعر مردماں پہ دل یات اَنت۔

بلوچی اکیڈمی ءِ کماشی ءِ اگدہ ہمے واجہ ءَ دئیگ بوتگ کہ آ وت لبزانک ءِ مردم اِنت دومی مردم کہ من آئی ءِ نام ءَ گرگ لوٹاں آ واجہ سنگت رفیق اِنت آ وت مزن شاہ در جاہ ءَ یک استادے ءِ جہت ءَ وانینگ ءَ اِنت ءُُ لبزانک ءِ پڑ ءَ آئی ءِ نام ءَ ہرکس زانت ءُُ سرپد اِنت،آئی ءِ دست چیری ءَ درکپتگیں بازیں شاگردے مرچی بلوچی لبزانک ءَ کار کنگ ءَ اَنت ،چیزے شاعر بوتگ ءُُ چیزے آزمکار۔

اے واجہ ءَ را بلوچی اکیڈمی ءِ نائب کماشی ءِ اگدہ دئیگ بوتگ ۔ سیمی مردم ءِ کہ من نام ءَ گرگ لوٹاں آہم بلوچی زبان ءِ یک بلائیں شاعرے زانگ بیت آئی ءِ شعرانی دو سے کتاب ہم چھاپ بوتگ اَنت وتی دائم ءَ گوں بلوچی ءِ کاراں گلائیش اِنت ورنائیں شاعر مدام وتی شعرانی اصلاح کنگ ءَ ہمے واجہ ءِ گورا کائینت ءُُ آ پہ دلِ ستک آوانی کمک ءَ کنت اے واجہ بلوچی اکیڈمی ءِ جنرل سیکریٹری اِنت۔

یک ورنائیں نامے کہ من آئی ءِ کرتگیں کارانی باز ستاءَ کناں آ ورنا بالاچ حمید نور اِنت کہ وت یک شاعرے ، پولکارے،جوانیں سنگتے ءُُ دائم ءَ اکیڈمی ءِ کاراں گوں دست گٹ انت ءُُ نودربرانی سرو سوج ءِ کار ءَ مشگل اِنت۔

ابیدچہ اے اگدہ داراں بلوچی اکیڈمی ءِ اگاں نوکیں کتہ کاریاں بچار اِت داں آئی ءِ وتی درائیں چھاپ کرتگیں کتاب کہ لوگ لوگ ءَ سر کتگ اَنت ءُُ ہرکتا ب ءَ بلوچی وانوک ءَ پہ مپت دئیگ ءَ اِنت اے وت مزنیں راجی کارے کہ ہرچی ستا بہ بیت کم اِنت ۔ بلوچی اکیڈمی ءَ وتی کتاب نہ ایوک ءَ نودربراناں داتگ اَنت بلکیں اسکول ءُُ کالج ءُُ کتابجاہاں ہم داتگ اَنت ۔

انوگیں چھاپ کتگیں مستریں کاراں چہ یکے بلوچی زبان ءِ مستریں ڈکشنری ءِ چھاپ کنگ کہ اے واجہ جان محمد دشتی ءَ چھاپ کتگ ءُُ بلکیں مردم سہی نہ اَنت کہ ایشی ءَ یک کلدارے پہ وتی جہد ءِ چہ اکیڈمی ءَ نہ زرتگ ،دومی کتاب وش اِتاں عہدی دوربلوچانی ،کہ دوجلدانی تہا چاپ بوتگ اے پہ بلوچی لبزانک ءِ وانوکاں سدگنجیں سوگات انت ۔اے اکیڈمی ءَ نوک باہندیں ورناءُُ پولکار ہم دلبڈی داتگ انت ءُُ ایشانی کار گرگ ءَ اِنت ۔

پیسرا کس ءَ اکیڈمی ءَ اتک نہ کتگ مرچی اکیڈمی ءِ رش ءُُ کشی وت اے گپ ءَ پدر کنت کہ زیکیں مردمان اکیڈمی چون کتگ ءُُ انوگیں اگدہ داراں اکیڈمی ءَ را پہ بلوچ ءُُ بلوچی لبزانک ءِ یک مرکزے جوڑ کتگ۔دومی ہر دری مردمے کہ اکیڈمی ءِ سئیل ءَ اتکگ آئی ءِ نہ ایوک ءَ کمک کنگ بوتگ بلکیں آئی ءَ اکیڈمی ءِ چھاپ کرتگیں کتابانی سوگات ہم دئیگ بوتگ ۔