سال ءِ موسم وتی حساب ءَ بدل بنت بلئے لہتیں سال انت کہ بہارگاہ گشئے زاہر انت بارین کدین وش بیت بارین کئی منّت ءُُ دزبندی ءِ لوٹوک انت ۔۔۔بازیں دگہ چنت سال انگہ پہ اوست ءُُ رہچاری گوزیت ءُُ باریں تاں کد مئے کشار شہ زرد ترّگ ءَ ساری درد ترانت ۔۔۔۔

پیلشنت ءُُ پُربنت ۔باریں تاں کد باگپان ءِ دل ءَ قیامت برجاہ مانیت ۔۔۔۔باریں تاں کدمئے ڈل دیم بے گدان بنت ءُُ تاں کدمئے مال ءُُ دلوت بے کہچر بنت ۔۔۔؟اینزکانی ڈوڈ تاں کد منّہ آنی پلاں جنگ بنت کہ کدی حال ءِ زنک بیت ،شیر ءُُ شیلانچ بیت ۔۔۔۔دنیا پہ اوست پہ برجاہ انت ۔۔۔۔بلئے مئے اوستانی کلات روچے سد وار ڈلیت ءُُ پد ا من وتی وابانی پراں نزاریں کہ اگہ زندگ بوہگی انت گڑا زندگی ءِ سکی ءُُ سوری آں سگگ لوٹیت ۔۔۔

باریں تاں کد ۔۔۔آئی جیڑگ جیڑگ ءَ سر پہ سرجاہ ءَ ایر کرت کہ آ ہم وخت ات انت کہ گوات ہم پرآئی امبازاں ہدوناک ات ءُُ ہلک ءِ دمک ءُُ در پہ پادرشپ یے ءَ مرادی ات انت ۔اے ہم وختے کہ کسے نہ گواہیت ءُُ آئی انگہ پہ راہچاری ءَ دم نہ برتہ ءُُ ہمے اومیت داریت کہ کیت روچے کہ منی واباں ہم مانا رسیت ۔۔۔اوستانی درچک برکاریت ۔۔۔مہرانی پُل ترک انت ءُُ جہان آتار بیت ۔۔۔

سمین وشبوہاں زوریت ءُُ ہر گور ءَ رسین ایت ۔۔۔وشی ءُُ شاتکامی بیت ۔۔۔۔کوہسراں بستگیں جمبر گوار انت ءُُ کور ءَ شیپ ہارکن انت ءُُ ہرگس ءَ پدا نازینک جسکنت تہ ناگتہ آئی دل ایر رگست ۔واب ءَ گندیت کہ آیک اجبیں دنیا یے ءَ انت کہ ادا نہ پریاتے ۔۔۔نہ موتکے ۔۔۔نہ ہیسکارگے ۔۔نہ گژن ءُُ تن یے۔ہر آسراتی برجاہ انت ءُُ ہردپ پرکندگ انت ۔۔۔ہرکسی وتی دنیا یے ۔

اماں ۔۔۔اماں ۔۔۔آ پچ لرز انت تہ گندیت کہ آئی کش ءِ وپتگیں زہگ میچینگ لوٹ ایت ۔۔۔۔ءُُ آ انگتہ نیاہتگ انت کہ آوانی یاتاں آ چو چراگ ءَ روک انت بلئے تہاری شہ آئی ءِ بالاد ءَ ہرش یے پٹک انت ۔