گوستگیں روچاں مکران ءِ بنجاہی شہر تربت ءَ یک دگہ سلینڈرے ءِ ترکگ ءَ اسکولی کسانیں بچک ءُُ جنکاں ہوار بازیں راہ گوزی مردمے ٹپی بوتگ ءُُ حالانی ردا اشانی تہا انگت 8ٹپی بیران بوتگ انت ۔

اے ویل ءَ یکیں کہول ءِ چار زہگ بیران بوتگ انت ۔ پدرائیں گپے کہ اے پہ کہول ءَ سکیں پر درد ءُُ نہ وشیں گپے ۔ بدبحتی ایش انت کہ اے تربت ءَ ایوکیں ویل نہ بوتگ بلکیں 12ماہانی نیام ءَ اے سیمی ویل انت کہ گواتینکی سلینڈر ءِ ترکگ ءَ بوہگ ءَ انت ایشانی تہادو ویل ہنچین انت کہ یک ماہے ءِ سرجمی ءَ ساری بوتگ انت گوستگیں ماہ ءَ شاپک ءَ یک سلینڈرے ءِ ترکگ ءَ یکیں کہول ءِ 15 مردم بیران بوتگ ات ءُُ یک کہولے ءِ گس ءِ درائیں جنین آدم بیران بوتگ انت ۔

نوں اے چونیں پُر دردیں گپے کہ لوگے ءَ جنین آدم مہ بیت؟ چریشی ءَ مستریں دردناکیں گپ ایش انت کہ اے انچیں ویل انت کہ اشاناں بنی آدم پہ دلگوش ،ہوش ءُُ بود ءُُ پہ گر ءُُ دار گیشوار کت کنت بلئے نادلگوشی ءِ سوب ءَ یکیں ساہت ءَ یکیں بازار ءُُ یکیں کہول ءُُ کٹم ءِ پانزدہ پانزدہ مردم یکجاہ بیران بیت اگاں ہورت چارگ بہ بیت اے ایوک ءَ کہول ءُُ کٹمی نکس ءُُ تاوانے نہ انت بلکیں چاگردی ءُ راجی تاوانے کہ بائدیں ایشی ءِ گر ءُُ دار کنگ بہ بیت ۔

اگاں چارگ بہ بیت گڈا اے چشیں گرانیں کارے نہ انت پرچکہ مرچی اے سائنسی دور ءَ مہلوک ءَ یک نیمگے زمین جمب ءُُ سونامیانی دیم داشتگ ءُُ دومی نیمگ ءَ ہار ءُُ شرتگ ءُُ توپانانی ہم پمشکہ اے دور ءَ دو سلینڈر ءِ دیم ءِ دارگ مزنیں گپے نہ انت بلئے خدا ہندی ،دمگی ءُُ بنجاہی رہشون ءُُ کماشاں توفیق ءُُ نیکیں نیت بدنت اے درچ ءَ بائدیں دمگی اسمبلی ءِ باسک ہندی بندو بوج کنوکیں واکداراں کھڈن بکن انت کہ آ دمگ ءَ حرابیں ءُُ نزوریں کوالٹی ءِ سلینڈرانی بہا ءُُ بیپار ءَ بند بکن انت۔

پرچکہ گیشتریں ترکوکیں سلینڈرانی کوالٹی نزور بیت ءُُ دومی اے درائیں سلینڈرانی کارمرزکنگ ءِ یک میادے بیت ۔ مردماں سرپد کنگ بہ بیت کہ سلینڈرانی زورگ ءَ ساری سلینڈرانی سرانبشتگیں میاد چارگ بہ بیت ءُُ ہچ سلینڈر گیش چہ گیش 10سال ءَ گیشتر کارمرز کنگ مہ بیت ۔

اے کار ءَ ہندی بندبوج کنوکیں واکدار وت ہم کت کن انت ۔ ہما دکاناں کہ سلینڈر پُر کنگ بنت یا سلینڈر بہا کنگ بنت اودا ہندی بند ءُُ بوج کنوک وہد پہ وہد وت برواں ءُُ سلینڈرانی کوالٹی ءُُ آہانی میاد ءَ بچار انت ۔ دومی اے سلینڈر ءِ بہا ءُُ بیپار کنوکاں کھڈن کنگ بہ بیت کہ سلینڈر پُر کنوک ءُُ بہازوروکاں سلینڈر ءِ زورگ ءَ پیسرجوانین کارمرزی ءِ ہیل کاری کاری بدئینت تنکہ آ سلینڈر ءِ ترسناکیں جاوراں بزان انت ۔ اے وڑا کم چہ کم اے بوت کنت کہ کامرز کنوک اے زان انت کہ سلینڈر کجام وہد ءَ ترساک بوت کن انت۔

ایشی ءَ ابید اے حکومت ءِ ذمہ واری انت کہ مکران ءِ ڈویژنل بنجاہ تربت ءَ سوچک ءِ یک بہرگے جوڑ کنگ بہ بیت پرچکہ گوستگیں سےئیں ویلاں مردمانی بیرانی ءِ مستریں سوب ہمیش بوتگ کہ سلینڈرانی ترکگ ءَ پد سوچک ءِ بہرگ نہ بوتگ ۔یکے وَ کوئٹہ ءُُ کراچی چہ تربت ءُُ گوادر ءَ 900کلومیٹر دور انت پدا انسان ءِ سوچک ءَ پد چوکہ مردم ءِ پوست سچ ایت ءُُ ہلاس بیت پمشکہ آئی ءَ انفکشن ءِ ترس سک باز بیت ءُُ اگاں اے سوتکگیں مردم چہ تربت ءَ زورگ ءُُ کوئٹہ ءُُ کراچی ءَ آرگ بہ بنت۔ 12ساہتاں اے نادراہ بیدء شک ءَ انفکشن ءِ آماچ بنت بلئے اگاں نزیکیں ہسپتالاں سوچک ءِ بہرگ جوڑ کنگ بہ بیت۔

گڑا اے نادراہ چہ انفکشن رک ات کن انت ۔ ءُُ پرے سوچک بہرگ ءِ جوڑ کنگ ءَ چشیں زرے ہم نہ لگ ایت اگاں ہورت چارگ بہ بیت کہ گوستگیں سالے ءَ بلوچستان ءَ لیب ، گوازیءُُ جشنانی سرا کہ ہرچ ءُُ درچے کنگ بوتگ اگاں اشانی چارکے تربت ءَ سوچک ءِ بہرگ ءِ جوڑ کنگ ءِ سرا ہرچ کنگ بوت انت بلکیں یکیں سال ءَ 30 مردم ءِ کساس ءَ مردین ءُُ جنین آدم ءُُ زہگ بیران نہ بوت اَنت بلئے گپ ایش انت کہ حکومت دل پہک ءُُ نیک نیت بہ بیت ءُُ جہگیراں مہلوکءِ زند ءِ سد ءُُ سما بہ بیت ۔