سید گنج بلوچی زبان ءِ مستریں بزانت بلداں چہ یکے زانگ بیت۔اے بزانت بلد ۲۱ اپریل کّرا ۲۰۰۰ ءَ چاپ ءُُ شنگ بوتگ ۔اے بزانت بلد ءِ درستی تاکدیم ۹۲۸ انت ۔بلوچی زبان ءِ اے یکیں بزانت بلد انت کہ ایشیءِ تہا واجہ سید ہاشمی ذگریں بلوچی لبز ہوار کتگ انت ۔

لبز بلد ءِ تہا ۱۶۲۱۶ گال ہوار کنگ بوتگ ۔سید ہاشمی اے لبز بلد ءِ جوڑ کنگ ءَ مزنیں جہد ءُُ کوشست ءِ کتگ آئی ءِ دل ءِ مراد بوتگ کہ من یک انچیں لبز بلد ے جوڑ بکناں کہ نوکیں دور ءِ لبز بلد انی گوں ہمگام بہ بیت بزاں بلوچی زبان ءَ گوں نوکیں دور ءِ ءُُ رہبندانی رد ءُُ دیمروئی دئیگ بہ بیت ۔اے ہاترا نوک جوڑ بوتگیں چیزانی نام ءُُ نوکیں گالجوڑ (تراکیب) جوڑ کنگ بہ بنت ۔

سید ہاشمی ءَ داں مزنیں ہدے ءَ اے کار دیم ءَ برتگ پمشکا ماگوشت کنیں کہ سید گنج بلوچی زبان ءِ ہما محکمیں لبز بلد انت کہ ایشیءِ سرا بلوچی ءِ پڑ مڑائیں ماڑی اوشتات کنت۔سید ہاشمی اے لبز بلد ءِ جوڑ کنگ ءَ مزنیں سکی ءُُ سوریانیدیمپان بوتگ ۔آ وتی زند ءَ ہچبر چہ ’’ سید گنج ‘‘ ءِ کار ءَ شموشکار نہ بوتگ ۔۲۱ اپریل ۱۹۶۲ ءَ حاجی احمد زہیر ءِ نام ءَ وتی نمدی ءِ تہ ءَ نبیس ایت کہ ’’ بلوچی بزانت۔

بلد ءِ جست ءَ کن ئے ! چہ وتی ساہ ءَ بے ترانگ بوت کناں بلئے چہ ’’ سید گنج ءَ بے ترانگ بناں ‘‘۔داں زانگ بیت کہ سید ہاشمی ءَ بلوچی زبان ءُُ سید گنج لبز بلد ءِ کارانی سک باز پگر بوتگ پمے سوب بوتگ کہ سید ہاشمی وتی زند ءِ مستریں بہرے پہ بلوچی زبان ءُُ سید گنج لبز بلد ءِ کارانی سرا گوازینتگ ۔اے گپ ءَ ہر کس زانت ءُُ سر پد انت کہ سید ہاشمی ءَ وتی زندے کساس ۲۰ سال ءَ چہ گیش ’’ سید گنج‘‘ لبز بلد ءِسرا جہد کتگ۔

سید ہاشمی ءِدل ءِ مول ءُُ مراد ہمیش ات کہ ’’ سید گنج‘‘ لبز بلد آئی ءِ زند ءِ روچاں چاپ ءُُ شنگ بہ بیت بلئے چوش نہ بوت۔سید ہاشمی ،سید گنج ءِ کار ءِ گرانی وتی نادراہی ءُُ راج ءِ بے سمائی ءِ جوانی ءَ سما ات ۔پمشکا وتی ارواہ ہکاریں جہداں رند ہم ماں وتی زندماں ءَ ایشیءِ چاپگ ءَ ناامیت ات ۔ایشی مستریں سبب سوب ایش انت کہ یکے سید ہاشمی ءَ کرا مالی جیڑہ است دومی سید ہاشمی اے دور ءَ سک باز نادراہ ات بلئے ہمے نادراہی ءَ ابید سید ہاشمی ءَ سید گنج ءِ کار جوانیں رنگی ءَ برجم داشت ۔

داں زندءِ گڈی روچاں واجہ ءَ بازیں جہد ءَ پد اے گرانیں کار سرجم کت ۔یک جاگہہ یے سید ہاشمی نبشتہ کنت کہ ’’ سید گنج‘‘ ءِ سرجم کنگ ءَ ہررنگین سکی ءُُ سوری ءِ دیمپان بوتگاں اگاں بے زری ءَ زرشان مہ کتیں ایشی ءِ اولی بہر دیری سنگ بوتگ ات بلوچ راج ءِ تہا مرچی انچیں سکیں سرین مردم ہست کہ چہ ایشاں یک مردمے پہ آسانی اے کتاب ( بزانت بلد) ءَ چاپ کرت کنت ۔

سید ہاشمی گیشر وہد ’’ سید گنج‘‘ ءِ کارانی تہا گوازینتگ ۱۹۶۹ سید ہاشمی گوں جرمن اسکالر ڈاکٹر اسر ءِ ہمرائی ءَ ہندوستان ءِ نامیں پٹ ءُُ پول بنجاہ دکن کالج ( پونا) ءَ شت اود ءَ اے دوئیناں بلوچی زبان ءِ سر ءَ کار کت اودا ڈاکٹر این ایس شکلا ءَ گوں دوچار کپت اے واجہ ءَ را سسنکرت ءُُ اوستائی زبانانی سر ءَ مزنیں دسترے است ات ءُُ پونا یونیورسٹی ءَ اوستا ءِ پروفیسر ات ۔سید ءِ پٹ ءُُ لوٹ ءِ بنزہ ہم اوستائی سنسکرت ءُُ پہلو ی بوتگ انت ۔

اد ءَ سید ہاشمی ءَ اوستا ( دگنیا ءِ کوہن تریں نیکراہی وانگی) گوں وتی بندریں سیاہگ ءَ دربرت ہمے رنگ ءَ آئی ءَ چہ سسنکرت ءُُ پہلو ی ءِ کدیمی پائدگ زرت ۔پمشکا سید ہاشمی بلوچانی تہا اولی مردم ات کہ آریائی زبانانی ءُُ گیشتر انڈو آرین زبانانی مزنیں بلد کارے بوتگ واجہ ءَ وتی بزانت سید گنج ءَ را اوستا،سسنکرت ءُُ پہلو ی ءِ بندریں سیاہگ کارمرد کتگ اَت ۔داں زانگ بیت کہ اے لبز بلد ءِ تہا سید ہاشمی ءَ ہر وڑیں گال ہوار کتگ ۔

سید ہاشمی ءَ زند ءِ بازیں تک ءُُ پہناتاں گالبند درگیتکگ ءُُ سازتگ۔کشت ءُُ کشاری زمین ءُُ مالداری سک ءُُ مذہب زر ءُُ کور ءُُ شیپ لیب ءُُ گوازی ،نادراہی ءُُ علاج زبان شناسی ءُُ سائنس ٹیکنالوجی ،چاگردی زندمان ءُُ دگہ بازیں جہد کرتگ کہ اے لبز بلد ءَ ہوار بہ بنت۔سید ہاشمی ہرہما لبز اے بزانت بلد ءِ تہا ہوار کنت انت کہ بلوچ راج ءِ زندمان ءَ گوں ہمگرنچ انت اے گپ وانوکانی دیم ءَ آرگ لوٹیت کہ ’’ سید گنج‘‘ بزانت۔

بلدے تہا چونیں چونیں بتکس ہوار کنگ بوتگ ۔’’ سید گنج‘‘ بزانت بلد بلوچی زبان ءَ اولی بزانت بلد انت کہ آئی ءِ تہا بازیں بتکش بزاں (picture) ہوار کنگ بوتگ ات ۔اے عکس ہما انت کہ سید گنج ءِ تہا گوں لبزاں ہوار انت ۔سید گنج بزانت بلد ءِ تہا ۶۷۷ عکس ہوار کنگ بوتگ۔ایشانی تہا درچک ،سول بوٹک ،ولانی ،ماہگانی،جناورانی،ءُُ دگہ بازیں چیرانی عکس ہوار اَنت ۔

گڈ سرا من ہمے گوشگ لوٹاں کہ سید گنج بلوچی زبانءِ یک محکمیں لبز بلدے زانگ بیت بلوچی زبان ءِ اولی لبز بلد انت کہ سائنسی رہبندے رد ءَ سید ہاشمی ءَ نبشتہ کتگ اے لبز بلد ءِ تہا سید ہاشمی گوں جوانیں رنگی ءَ ذگریں بلوچی لبز کارمرد کتگ انت کہ پہ وانوکاں یک جوانیں لبز بلدے زانگ بیت ۔سید ہاشمی ءَ بلوچی زبان ءِ دیمروئی ءِ ھاترا بے دروریں جہد کتگ واجہ ءِ جہد پہ بلوچی زبان ءَ سک باز اَنت کہ ستا کرز انت ۔