بلوچسان آبادی ءَ پاکستان ءِ کستریں بلئے بیروزگاری ءِ درچ ءَ پاکستان ءِ مستریں دمگ انت ۔گوستگیں وزیراعلیٰ نواب ثنا اللہ زہری ءِ حکومت ءَ چیف سیکریٹری ءَ دپ ء وت گشتگ ات کہ بلوچستان ءَ 37 ہزار نوکری است انت کہ اشاں 2013ءَ اتکگیں حکومت ءَ پر کنگ ءِ جہد نہ کتگ بلئے بدبحتی ایش انت کہ نواب ثنا زہری ءَ ہم وتی حکومت ءِ دور ءَ اے نوکریاں پر نہ کت۔

پدا وہدے قدوس بزنجو ءِ حکومت اتک آئی ءَ ہم جوانیں گامگیجے زرت نہ کت نوکیں حکومت ءَ اے جار پرینتگ کہ بلوچستان ءِ بیروزگاریں ورناہاں 29,000 نوکیں نوکری دئیگ بیت بلئے گپ ہما بیت کہ’’ مہ مرات میشاں کہ بہارے کیت ‘‘ نوکیں حکومت ءِ اے نوکیں جار ءَ پد بلوچستان ءِ ورناہانی گمان ایش انت۔

کہ ہرچ نوکیں حکومتے کہ کیت آ اسل ءَ بلوچستان ءِ مہلوک ءَ چو تپل ءَ تسلہ دئیگ لوٹ ایت بلئے کنگ ءَ ہچی دلمانگ نہ انت ۔ پرچکہ اگاں بنجاہی ءُُ دمگی حکومت پہ بلوچستان ءِ مہلوک ءِ روزگار ءُُ نوکری ءَ دل پہک انت گڑا پیسرا ہما 37,000نوکریاں بدئینت کہ پرائی ءَ بلوچستان ءِ مہلوک پنچ سال انت کہ چمدار انت ءُُ اگاں گوں دل پہکی ءَ ہمے روزگار دئیگ بہ بنت گڈا بلوچستان ءَ بے روزگاری ہلاس بیت ۔ 

اے گپ گیر آرگی انت کہ بلوچستان ءِ آبادی چہ پنجاب، سندھ ءُُ صوبہ خیبر ءَ باز کم انت بلئے اے دمگ ءَ کارجاہ چوکہ ءُُ فیکٹری نیست ءُُ دمگ ءِ مردماں چو طورخم ءَ واہگہ بارڈر ءِ وڑا سیمسری بیپار ءِ اجازت نیست پمشکہ بلوچستان ءَ بے روزگاری ءُُ نیزگاری گیش انت بلئے اگاں بنجاہی ءُُ دمگی حکومت دل پہکی ءَ بلوچستان ءِ مردماں روزگار دئیگ لوٹ انت گڑا بلوچستان ءِ تیابی دمگ،سی پیک،ریکوڈک ، سیندک،حب گولڈ اینڈ مائینز پروجیکٹ حبکو پاور پروجیکٹ ءُُ گڈانی شپ یارڈ ہ انچیں مزنیں پروجیکٹ انت۔

کہ اشانی تہا اگاں بلوچستان ءِ لوکل ءُُ بنکی جامنند روزگار دئیگ بہ بنت گڈا بلوچستان ءَ مردماں سرکاری نوکری ءُُ روزگار ءِ حاجت نہ بیت بلئے بدبحتی ایش انت کہ ہمے پروجیکٹاں بلوچ ءُُ بلوچستان ءِ جاہ منندانی بدل ءَ ڈومیسائل ءُُ افغان مہاجرانی قبضہ انت کہ اے جاہاں بلوچستان ءِ جاہ منندیں مردماں پہ زور نیلگ بیت۔ اے درگت ءَ ہمے ماہ ءِ بازیں حالتاکانی ردا گشگ بوتگ کہ بنجاہی سرکار ءَ پہ بلوچستان ءِ کوٹہ ءِ سرا کارگرگ نہ بوہگ ءَ انت۔

ءُُ دومی چہ بنجاہی حکومت ءِ نیمگ ءَ بلوچستان ءَ اتکگیں 1گریڈ ءَ بگرداں 22 گریڈ ءِ آفیسر ءُُ نوکراں دل ءِ میل ءَ پہ وتی چک ءُُ نماسگ ءُُ سیادی ءُُ عزیراں چہ بلوچستان ڈومیسائل جوڑ کتگ ءُُ بہرکتگ انت اے وہد ءَ بنجاہی نوکری وتی جاگہ دمگی نوکریان چہ ہندی ءُُ بلوچستان ءِ بنکی جاہ مننداں گیش ہمے مردم اے نوکریانی سر ءَ کار ءَ انت ۔ اے درچ ءَ گوستگیں ماہ ءَ ساری بنجاہی حکومت ءَ اے جار ہم پرینتگ ات کہ سی پیک ءَ بلوچستان ءِ ورناہاں 30 ہزار نوکری دئیگ بہ بیت۔


بلئے اے ہم انچیں جارے ات وہدیکہ سی پیک بہ بیت ریکوڈک ، سیندک حبکوپاور پروجیکٹ یا گڈانی شپ یارڈ اے درائیں جاہاں درملکی ءُُ ڈومیسائل کار ءَ انت ۔ حکومت اگاں بلوچستان ءِ ورناہاں روزگار دئیگ لوٹ ایت گڈ بندات 30ہزار،29ہزار ءُُ 37 ہزار نوکریانی جار ءَ یلہ بدانت پیسرا ہمے پروجیکٹاں بلوچ مردماں دارگ ءِ کار ءَ بہ کنت گڈا بلوچستان ءَ بیروزگار وت ہلاس بیت ۔

اگاں ایشی کت نہ کنت کہ آئی ءِ جند ءِ مردم انت گڈا ایران پاکستان سیمسری بیپار پچ بہ کنت چوکہ اے وہد ءَ پاکستان دشمن ءُُ بدوائیں ملک بھارت ءُُ واہگہ بارڈر ءُُ افغانستان ءَ طورخم ءُُ چمن بارڈر پچ انت ایرانی بارڈر ءِ پچ بوہگ ءَ گوں بلوچ ورناہاں دگہ سرکاری نوکری حاجت نہ بیت ءُُ چریشی ءَ سرکاری بار سک کم بیت اے درگت ءَ مستریں ذمہ واری بلوچ ءُُ پشتون جھگیرانی ئیگ انت کہ بنجاہی ءُُ دمگی اسمبلی ءَ نشتگ انت۔

اگاں اے مردم بنجاہی حکومت ءَ زور پر بدئینت کہ چو واہگہ ، طورخم ءُُ چمن بارڈر ءِ وڑا ایرانی بارڈر ءَ پہ بیپار ءَ پچ بکن انت گڈا اے جہگیرانی وتی جند ءِ بازیں جیڑہ ہلاس بوت کن انت ۔