’’دل ءِ چولاں سر ءَ کش اَنت پہ راہ یے ‘‘اے ہما شرگداری نبشتانک اِنت کہ بلوچی زبان ءِ کوہیں قلات کریم دشتی ءَ عطاشاد ءِ شعر ءُُ آئی ءِ شعری کدءُُ قدرت ءِ بابت ءَ نبشتگ۔بلوچی زبان ءُُ لبزانک ءَ چنائی ءَ گپ کنگ نہ بیت ءُُ منی ڈولیں نودربرے اگاں گپ بجنت داں زانتکار یں مردم باریں چے چے گشنت لہتیں انچیں گپ منی گوشاں کپتگ ات کہ اِداں کنگ نہ بنت بلئے یک روچے کیت کہ نبشتہ الم بنت، سقراط ءَ ہم گشتگ کہ کس کپتگیں سنگ ءُُ ڈوکاں ملام بار نہ کنت ملامی ءُُ ڈوبارگ یا زاہ ءُُ بداے زندگیں مردم کنگ بنت ءُُ من جزماں کہ من زندگاں پرچکہ منی بابت ءَ ہم گپ بوہگ ءَ اِنت حئیر۔۔۔۔۔

گپ بوہگ ءَ اَت کہ بلوچی لبزانک ءَ گپ نہ بیت گپ اے حاترا نہ بیت کہ کس اوپار ءُُ برداشت نہ کنت اے بے گپی مرچیگیں گپے نہ اِنت بلکیں پیش ءَ ہم انچو بوتگ ۔بلئے گپ کنگی اِنت۔۔۔،دانکہ گپ مہ بیت مئے لبزانک دیمروئی کت نہ کنت ءُُ دیمروئی بیدئے شرگداری ءَ بوت نہ کنت ۔اے نبشتانک واجہ کریم دشتی ءِ کتاب ’’ شرگداری ‘‘ ءِ گچین نبشتانک ءَ چہ زورگ ءُُ عطا شاد ءِ کلیات ’’ گلزمین ‘‘ ءَ ہوار کنگ بوتگ ۔

بلئے زانگ نہ بیت پرچکہ اے نبشتانک ءِ لہتیں بہر پرچہ درکنگ بوتگ ؟ اے نبشتانک ءِ سرجمیں حیال گوں ہما بہر ءَ بندوک اِنت بلئے ہما بہرگ ءِ جند درکنگ بوتگ اَنت۔اے گپ بائد ساری ءَ کنگ بوتین اَنت بلئے’’ دیر آئید درست آئید‘‘ نبشتہی دنیا ءَ دو چیز ہچبر بدل بوت نہ کنت یکے پٹ ءُُ پولءَ دومی مردم ءِ حیال کہ ریفرنس ءُُ کوٹ کنگ بنت آ بدل نہ بنت ءُُ دومی رد ءُُ بندی کتابے ءِ مواد بدل نہ بیت پرچکہ آ نبشتہ کارءِ وتی نہ اَنت دومی مردمانیگ اَنت بلئے اے نبشتانک ءِ سرجمیں بہرے درکنگ بوتگ کہ استیں نبشتانکءِ حیال ءَ بے راہ کنت۔

اے نبشتانک ءَ اگاں کسے وانگ لوٹیت داں کریم دشتی ءِ کلیات ’’ دل زریت بولان ‘‘ ءِ تاکدیم 73 بوانیتءُُ پدا گلزمین ءِ ہمے نبشتانک ءَ بوان ایت کہ تاکدیم169 ءَ دئیگ بوتگ آ وت زانت کہ چے چے ءُُ چون کشگ بوتگ اَنت۔ 

کسان کسانیں ردی وَ ہرکتاب ءَ مان بیت انچوکہ اے کتاب ءَ عطا شاد ءِ نام ’’ اتا شات ‘‘ نبشتہ کنگ بوتگ کہ رد انت ءُُ شعر ہم دیم ءُُ پشت کنگ بوتگ انت یاکہ بازیں جاہ ءَ پروف ءِ ردی یے مان آ وَ بنت بلئے اے یک بلائیں ردی یے بائد کہ آئی ءِ ہورت چار ءُُ رد ءُُ بند دئیوکیں مردماں بچار اتیں اگاں اے پہ زانت درکنگ بوتگ اَنت داں ایشی ءِ سوب راج ءَ گشگ بہ بیت ءُُ اگاں پہ ردی دراتکگ داں چشیں ردی عطاشاد ءِ کتاب ءَ اوپار نہ بیت ۔

ہما ردیانی کہ من گشگ ءَ اَنت آوانی بابت ءَ جتا نبشتہ کناں،بلئے پہ درورءَ لہتیں گپ کناں گلزمین ءِ تاکدیم170 ءِ اے شعر کہ دئیگ بوتگ پہ درور بچار اِت،

آفتا ب تازہ پیدا بطن گیتی سے ہوا
آسمان ڈوبے ہوئے تاروں کا ماتم کب تلک

اچ اے شعر ءَ ساری یک ءُُ دو رد، ناں بلکیں سرجمیں سے تاکدیم گار ءُُ اے تاکدیم واجہ کریم دشتی ءِ شرگداری ءِ بنزہ اَنت ۔ہمے تاکدیماں آئی ءَ عطا ءُُ اے دگہ شاعرانی دیم پہ دیمی کتگ ءُُ اے پدر کنگ ءِ جہد کتگ کہ عطا اگاں بلوچی شاعری ءَ نوک گشگ ءَ اَنت ءُُ داں چتور نوک گشگ ءَ اِنت ہمے تاکدیماں واجہ کریم دشتی ءَ عطا شاد ءِ دور ءِ مستریں شاعر چوکہ گل خان نصیر،عبدالرحیم صابر، آدم حقانی، عبدالحکیم حقگو ءُُ اے دگہ شاعرانی شعر پہ درور داتگ ءُُ اے پدر کتگ کہ آ دور ءَ اے مردمانی شعرانی اگاں توسیپ کنگ بوتگ بلئے شعری حساب ءَ آوانی ہچ بستارے نیست انت ۔بلئے گلزمین ءَ اے درائیں درورءُُ اے درائیں گپ در کنگ بوتگ انت۔

زانگ نہ بیت اے پہ زانت درکنگ بوتگ انت انت یا پہ بے زانتی بلئے پہ چیر دئیگ ءَ راست وَ چئیر نہ بیت ۔دومی اگاں کسے ءَ دل زریت بولان یاکہ کریم ءِ شرگداری وانتگ آوَ زانت کہ واجہ کریم ءَ چے ءُُ پرچہ نبشتگ بلئے گلزمین ءَ اے ردانی درکنگءَ یک جستے پہ مدامی ءَ ایر کتگ ۔ابید ایشی ءَ گلزمین ءِ تاکدیم 180 ءِ گڈی رداں حیال ءَ کن اِت کہ ’’ لوزانک(ادب) زند ءِ شرگداری(تنقید) انت تری پہ شاعری یا پہ ردانک (نثر) پمیشہ چہ ہریک شاعرے یاردانکارے ءَ ما ہمے امیت ءَ داروں کہ آ راجی۔۔۔۔۔۔‘‘ 

واجہ کریم ءِ اے نبشتانک ءِ بہر نہ اِنت بلکیں آئی دومی شرگداری نبشتانکے ءِ بہر انت کہ اِداں ہوار کنگ بوتگ۔ واجہ کریم ءِ اے نبشتانک ’’ دل ءِ چولاں سر ءَ کشنت پہ راہ یے‘‘ چہ اے رداں آسر بیت کہ’’ جان رسکن گشیت کہ توا گن زانتکاریں نوشتہ کنوک ءِ چی ءِ وانگ ءَ روئے گڈا وتی زانت ءُُ فہم ءِ کوڈال ءُُ ٹیکماں ہنچو تیز کن کہ گشئے تو کوہ ءِ توک ءَ سہر ءُُ طلا ءِ پٹگ ءَ روگ ءَ ئے‘‘ ءُُ وانوک ئے سرپد نہ بنت اشی ءِ گناہ شاعر ءِ سر ءَ نہ انت ۔‘‘ 

دل زریت بولان،تاکدیم 86،بژنی حبر ایش اِنت کہ اے ہردو کتاب بلوچی اکیڈمی کوئٹہ ءَ چھاپ کرتگ اَنت ءُُ اے بلائیں ردی گرگ نہ بوتگ اَنت بائد انچائیں مردمے ءِ کتاب ءَ ہم اے ردی مہ بوتین اَنت نیکہ عطاشاد وڑیں شاعرے ءُُ کریم دشتی ءِ ڈولیں کامل ءُُ زانتکاریں مردمے ءِ نبشتانکے ءِ گوما چو کنگ بوتگ ۔

بلوچی اکیڈمی استیں دورءَ بلوچ ءُُ بلوچی زبان ءِ مستریں کدگ اِنت پمشکا ایشی ءِ ردی مردماں توریت۔اے نبشتانک پہ زد ءُُ کنّت نبشتہ نہ بوتگ بلکیں اے یک نزوری کہ است انت بائد آ منّگ ءُُ در کنگ بہ بیت ءُُ عطا شاد ءِ گلزمین ءِ اگاں دومی براں چھاپ بوت داں بائد اے ردی درکنگ بہ بنت پرچکہ اے کتاب منی ڈولیں کم زانت ءُُ یک نودربرے ءَ رد ءُُ بند نہ داتگ بلکیں بلوچی زبان ءِ جوانیں ءُُ زانتکاریں مردمانی رد ءُُ بند اِنت پمشکا بائد آوکیں وہد ءَ اے ردی در کنگ بہ بنت۔