دو سئے روچ پیش چیف جسٹس ثاقب نثار ءَ بلوچستان ءَ ورگی آپ ءِ باروا تران کت کہ بلوچستان ءِ مردم پہ ورگی آپ ءَ حر ءُُ اُشترانی سرا چہ دؤر ءَ آپ کار انت۔ پدا اے آپ کہ چہ کور ءُُ شیپاں آرگ بیت انچو لُرد انت کہ ورگی نہ انت۔ ہمے جیڑہ ءِ باروا نیشنل پارٹی ءِ سروک ءُُ سینیٹر کبیر محمد شہی ءَ ماں اخباری بیان ءِ وسیلہ ءَ گُشتگ کہ بلوچستان ءَ کہ انوں ورگی آپ ءِ کمی انت دیمترا اے ناپید بیت۔

اگاں سرکار کسانیں ڈیم مہ بندیت گڈا بلوچانی زمین ءَ آپ پہ ورگ ءَ دست نہ کپیت۔اے درگت ءَ بلوچسان ءِ سروزیر ءَ گشتگ ات کہ گوستگیں 5سال ءَ سی پیک (CPEC) ءِ سرا 20ارب ڈالر حرچ بوتگ بلئے چریشاں بلوچانی بہر ءَ کلدارے نہ کپتگ ءُُ نئیکہ گوستگیں سرکاراں ورگی آپ ءِ پہازگ ءُُ کارمرزی ءِ باروا کردے پیشداشتگ۔

وہدیکہ ٹی وی ءُُ روتاکاں رخشان ڈویژن ءِ ڈکّالی ءِ حال شنگ بوت گڈا شنگکاری ءِ وزیر ظہور بلیدی ءَ گُشت کہ سرکار ءَ راشن ءُُ دگہ آسراتیانی لہتیں ٹرک ماں رخشان ءَ دیم داتگ۔ آئی ءَ اے ہم گُشت ’پی ڈی ایم اے ‘ کہ چاگردی جیڑہانی گیشواری ءُُ رکینگ ءَ جوڑ کنگ بوتگ آئی ءِ گورا ہچّ وڑیں راہبند نیست ءُُ اے بابت ءَ پلاننگ (Planning) ءِ کنگی انت۔

دہ ءُُ دوازدہ سال انت کہ پی ڈی ایم اے ءِ ادارہ جوڑ کنگ بوتگ۔ اے دؤران ایوکا بلوچستان ناں پاکستان ءِ ایدگہ دمگاں ہم بازیں وئیل ءُُ آفت اتکگ انت بلئے بقول ء وزیر انگت ءَ آئی ءِ گورا ہچّ راہبند نیست کہ ملک ءِ مردماں چوں چہ قدرتی آفت آں رکّینگ بہ بنت۔ پدا دہ ءُُ بیست راشنانی ٹرک چنچو غریب ءُُ بزگانی شُد ءَ کم تر کنت۔بُرز ءِ نبشتگیں گپّاں اگاں ملک ءِ سرکار ءُُ آئی ءِ واکدارانی گوست ءَ دیم پہ دیم بہ کنیں گڈا آوانی گپ سرجم ءَ بٹاک انت۔

بلئے من کہ وہدے ہمے کوہ پروشیں گپ اِش کت اَنت گڈا من ءَ وتی زہگیءِ دؤرگیر اتک ۔ بیست سال ءَ ساری من کہ دشت ءِ یک کسانیں میتگے ءَ جہہ منند اتاں گڈا ہر روچ یک برے گوں وتی ہمبلاں حر ءِ سرا دو ڈَبُک لڑ اِت ءُُ چہ کؤر ءَ آپ آؤرت۔

مئے پیریناں ہم ہمے وڑا پہ وتا آپ پیداک کتگ۔ آ گپ ءَ مرچی بیست سال انت اے دؤران ءَ بازیں حاکم ءُُ واکدار گوستگ انت، مزنیں زرّ ءُُ مال حرچ کنگ بوتگ بلئے آپ ءِ جیڑہ انگت ءَ ہما رنگ ءَ اِنت۔ بنی آدم ءَ پہ وتی زند ءِ گوازینگ ءَ نوک نوکیں آسراتی پیداک کتگ بلئے مئے بلوچ انگت ءَ پہ پِٹّے آپ ءَ تلوسگ ءَ انت۔ورگی آپ ءِ کمّی ءَ ابید دگہ یک مزنیں چاگردی جیڑہے ءَ بلوچاں گور جتگ آ ڈکّال انت۔مرچی ہشت نوہ سال انت کہ بلوچستان ءَ ہؤر نہ بوتگ۔

ہؤر کہ نہ بیت آپ چہ کجا کئیت؟ ہمے وڑا بئیدء آپ ءَ کشت ءُُ کشار نہ بیت۔ بلوچ ءِ دلوت آئی ءِ مال ءُُ مڈی انت، ہور ءُُ شرتگا نی نیستی ءَ آ چریشاں زبہر انت پمشکا بلوچ وار ءُُ لنگڑ انت۔بازیں رپورٹانی رِدا بلوچستان ءِ 12ڈسٹرکٹ ڈکّال ءِ آماچ انت۔ بلوچانی دمگ کیچ ، پنجگور، خاران، واشک ءُُ نوشکی ایشی ءِ زَد ءَ اتکگ انت۔

(پداگشگ ہمے بیت کہ بلوچستان ءَ 52درسدبلوچ زہگاں ورگ نہ رسیت ءُُ ورگے نیستی ءَ آوانی ردوم پہ وڑ نہ بوہگ ءَ اِنت بزاں Mal-nutritionءِ آماچ انت۔ ہمے وڑا جنین آدمانی جیڑہ انت۔ صافیں ورگی آپ ءُُ شریں نان ءُُ نفقہ ءِ نہ رسگ ءَ 49فیصد جنین بیماریانی آماچ انت۔

رپورٹانی ردا بلوچستان ءَ اے وہد ءَ غریبی ءِ کساس 42فیصد انت ءُُ خاص واشک ءِ 72فیصد مردم وار ءُُ لنگڑ انت۔اے دراہیں جنجال ءُُ مصیبت کہ مرچی بلوچانی سرا کپتگ انت آہانی سبب یکے وَ آئی ءِ بدبحتی انت دومی آئی ءِ سرا مُشتگیں حاکمانی میار انت۔ پہ زرّ ءُُ مال ءِ دئیگ ءَ ووٹ ءُُ سیٹ گرگ ءَ اے مردم مئے حاکم جوڑ کنگ بوتگ انت۔وتی لائقی ءُُ بودناکی ءِ ذمہ وار ہر کس وت انت بلئے باید انت مئے حاکماناں پِٹّے آپ مان بہ بیت ءُُ اگاں آ کہ وت بلوچ انت وتی لنگڑ ءُُ گژنگیں براتاں چرے جیڑہانی رکینگ ءَ توجیلے بہ کن اَنت بلئے اے باوری گپ ءِ نہ انت۔