یک دورے بوتگ کہ مردمانی است ءُُ نیست ءِ مانزمان ہما ملک ءِ حاکم ءُُ بادشاہ بوتگ اَنت بلئے نوکیں دور ءُُ باریگ ءَ اے حاکم ءُُ بادشاہی حکومت ءُُ سرکار ءَ گون اِنت ،پاکستان ءَ را چشیں سرکار ءُُ حکومتے نہ رستگ کہ لائق ستا بہ بیت۔ہمک دور ءُُ باریگ ءَ چہ گندگ ءَ گندگتریں حکومتے پاکستان ءَ را رستگ ءُُ اے گپ ءَ کس میاریگ نہ بیت کہ وہدے آپ چہ بنزہ ءَ لرد بہ بیت داں نیام ءَ آپ ءِ پالگ ءَ آپ صاپ بوت نہ کنت ۔ءُُ دمگی حکومتانی مسال ہمیش اِنت ۔

ہردے بنزہی حکومت جوان نہ بیت داں ہچبر جہلی حکومت جوان بوت نہ کنت ۔پاکستان ءِ 65سال ءِ دپتر ءَ پٹ ءَ بیدئے یک ءُُ دو حکومت ءَ چشیں عوام ءُُ دوست ءُُ جیڑگانی گیشوار کنوکیں حکومتے اے حدادادیں ملک ءَ را نصیب نہ بوتگ ۔ 

ہمک دور ءِ حکومت اتکگ آئی ءَ ایوک ءَ وتی جند ءِ کیسگ پُر کرتگ ءُُ شپانی شپ عرباں کلدارانی واجہ بوتگ ءُُ بزگیں لس مہلوک چہ غریبی ءِ سیمسراں ہم جہل کپان ءُُ کپان۔۔۔انوگیں حکومت ءِ اگاں گپ بہ بیت داں ایوکیں گُرگ اَنت ،اے حکومت ءَ نہ ایوک ءَ وتی بنداتی سدیں روچانی کول ءُُ سوگند پیلو کتاں ،نیکہ وتی حکومتی پیش بندیانی کار۔۔۔۔۔مزن وزیر ءَ گشتگ اَت کہ دانکہ من ملک ءِ تہی کاراں گیشوار نہ کناں من درملکی سفراں نہ رواں بلئے بیاکہ آ مدام راہ آن اِنت برے سعودی ،برے امریکہ ،برے لند ن ءُُ برے دگہ ملکے ءَ روت ءُُ کیت ۔

ہمے زوتاں واجہیں مزن وزیر ءَ انچیں گپے گوں راج ءَ جتگ اَت کہ اے گپ وت پدر بوت کہ ایشی ءِ بود ءُُ لائقی چے انت۔اگاں ملکے پہ مرغی ہیک ءَ دیمروئی یے کت بہ کتیں داں ہچ وڑیں ملکے پدمنتگ نہ بوتگ اَت ۔

بل ایشی بلوچستان کہ پاکستان ءِ دل اِنت ہر حساب ءَ آئی ءِ دیمروئی ءِ وابستگی گوں ہمے دمگ ءَ بندوک اَنت بلے اے دمگ ءَ چہ پاکستان ءِ اے دگہ دمگاں گیشتر پد منتگ ءُُ پشت ءَ اِنت کجام جیڑہ نہ انت کہ اے دمگ ءَ نیست انت ،غریبی ،لوڈشیڈگ،بے روزگار ی ،فیکٹری ءُُ خارخانہانی نیستی ،گیس ءِ نیسی ،آپ ءِ نیسی ،وانگی کدگانی نیسی ،بے رہبندی ءُُ ہروڑیں عیبے کہ ڈکشنریاں درکیت آ اے دمگ ءَ است انت بلئے وائے قسمت کہ نیکہ بنجاہی حکومت سرے سرینت ءُُ نیکہ دمگی حکومت دست ءُُ پادے جنت ۔نیام ءَ لس مہلوک بزگ ءُُ وار اِنت ۔

نوں وَ حدائی برکتاں ہم اے دمگ ءَ را شمشتگ دہ سال اِنت کہ اے دمگ ءَ نئے ہورے بیت ءُُ نیکہ کہ وشیں موسمے کیت ءُُ یک روچے کیت مردم چہ ڈکال ءُُ آپ نیستی ءَ درانڈہ بیت ۔ ڈیمانی آپ حشک اَنت ،چاتاں آپ نیست ،ءُُ مہلوک ءَ رابورنگ پہ بورنگ جنّگ۔

بلوچستان ءَ آپ ءِ تنگی ءَ پد دومی مستریں کہ جنجال اِنت آ بے روزگاری اِنت ءُُ ایشی ءِ جاور پرے گپ ءَ وت پدر بیت کہ ہمک سال ءَ بیروزگاری ءَ پنچ ءُُ دہ ہزار مردم ءِ گیشی بیت ۔ وہدے پوسٹ کہ کاینت داں جمع کنوکانی حساب سد درسد گیش اِنت ۔

گوستگیں پی سی ایس ءِ چکاس ءَ پہ شش ءُُ ہفت پوسٹانی حاترا ءَ چہ بلوچستان ءَ یازدہ ہزار مردماں گیش فارم جمع بوتگ ءُُ اے درائیں نوکیں فارگ بوتگیں نودربر بوتگ اَنت آواں بل کہ چار ءُُ پنچ سال اِنت کہ فارگ اَنت ءُُ پہ روزگار ءِ شوہاز ءَ بنجاہی شہرءَ اے دفتر ءُُ پرا دفتر انت۔

بلئے اے جیڑگانی سدے نئے بنجاہی حکومت ءَ است ءُُ نیکہ دمگی حکومت ءَ پمشکا مردم برے برے حیران ب انت کہ آکیبت چتور بیت ،دل ءَ پہ واجہ ءَ بدی نیست انت بلئے ترس ءِ حدایے وَ بائدبہ بیت۔