بلوچستان ءِ بازیں جیڑہاں چہ یک جیڑہ یے شاہ دربرجاہانی اِنت ۔یک وہدے ءَ ایوک ءَ کوئٹہ ءَ یونیورسٹی آف کوئٹہ ، شاہ دربرجاہ بوتگ ءُُ انگت ءَ بلوچستان ءِ گیشتریں بار ہمے شاہ درجاہ ءِ کوپگان اِنت۔
اگاں اے بار ءِ سبکی تربت ءِ شاہ دربرجاہ ءَ کتگ بلئے بلوچستان ءِ آباتی ءُُ وانگ ءِ دیمپانی ءَ یک دو ءُُ شاہ دربر جاہ ءِ وس ءَ ڈن اِنت ۔ بائدیں حکومتی واکدار اے نیمگ ءَ ہم حیال گور بہ کن اَنت ءُُ بلوچستان ءِ مزن شاہ دربرجاہانی گیشی ءِ بابت ءَ گامگیج بزور اَنت۔ہمے زوتاں بلوچستان ءِ حالرسانکی وزیر ظہور احمد بلیدی ءَ گوں اے دگہ واکدارں گوں گندءُُ نند کتگ ءُُ اے گپ جتگ کہ بلوچستان ءَ بائدیں دگہ مزن شاہ دربرجاہ پچ کنگ بہ بنت۔
گواچن ءَ اے جوانیں گپے ءُُ اے ہم جوان اِنت کہ اگاں مزن شاہ دربرجاہ ئے جوڑ کنگ بیت داں بلوچستان ءِ بے روزگاری ءِ باز سبک تر بیت ءُُ ہزاراں لکھاں وانندگیں بے روزگاریں ورنا ہاں چہ چیزے روزگار بیت بلئے انچو کہ اے گامگیج روزگ بہ بیت ۔
بلوچستان حکومت ءِ نہ بلکیں بنجاہی حکومت ءِ کرتگیں درائیں قول ءُُ کراراں چہ تنی وہد اں ہچیءِ سرا کار کنگ نہ بوتگ ۔ بلکیں سد روچانی ہما ٹاسک کہ بنجاہی حکومت ءَ وتی گشتانک ءَ گشتگ اَت چراہاں یکے ءِ سرا ہم کار نہ بوتگ ۔ نیکہ دمگی حکومت ءِ کارگشاداں وتی قول ءُُ کراراں اوشتاتگ اَنت ۔
من زیات دور نہ رواں واجہ ظہور بلیدی ءِ وتی جند ءِ بنکی ہنکین بلیدی ءِ شاہ دربرجاہ ءِ کار چنچو اِدا شتگ ؟ اے گپ ءَ درائیں مردم سہی ءُُ سرپد اَنت کہ چاکر خان یونیورسٹی ءِ ماڑی ءِ مک بوہگ ءَ پد تنی وہد ءَ کار پرچکہ دیم ءَ نہ شتگ اَنت ۔ چیزے سال ایوک ءَ چاکر خان ءِ نام ءِ سرءَ جیڑہ بوتگ اَت کہ یونیورسٹی ءِ نام پرچکہ چاکر خان اِنت، اڈے میر چاکر خان رند ءِ زمین سبیّ ءِ یونیورسٹی ءِ نام دگہ چے بہ بیت؟ حکومتی مردماں انگت ءَ اے گپ گیشوار کت نہ کتگ ،تربت یونیورسٹی ءِ وَ جوڑ اِنت بلئے انگت ءَ درائیں سبجکٹ وانینگ نہ بنت۔
ءُُ مردمانی بھرتی ہم پہ سفارش اِنت میرٹ پادمال کنگ بوتگ ءُُ انگت ءَ مردمانی زارشانی برجاہ اِنتءُُ حکومتی واکدار گش انت کہ ما نوکیں شاہ دربرجاہ جوڑ کن اَنت ،بائداِنت آ وتی استیں شاہ دربرجاہانی جاوراں گیشوار بہ کن اَنت پدا نوکیں شاہ دربرجاہانی گپ ءَ بہ کن اَنت ۔بلوچستان ءَ شاہ دربرجاہاں چہ گیش پرائمری ءُُ ہائی اسکولانی پکار اِنت ، اگاں جاہ یے پرائمری ءُُ ہائی اسکول است اَنت داں آہود ءِ استاد ڈیوٹی نہ دینت بائدانت کہ سرکاری مردم پیسر ہما استاداں کہ وتی اسکولاں ڈیوٹی نہ دینت آوانی حساب داد بہ بیت ۔
اگاں انچیں جاہ کہ آہود ءَ جاور نہ گیگ اَنت داں سرکار ایشانی رکینگ ءِ جہد بہ کنت ءُُ ایشاں سیکورٹی بہ دنت ،بازیں انچیں اسکول است انت کہ چہ ماڑی ءَ زبہر اَنت کسانیں نودر ڈن ءَ گرم ءُُ سردی ءَ اوپار کن اَنت ،ہمے وڑیں اسکولاں ماڑی ءُُ چار دیواری بہ دنت۔ بچکانی وانگ است ءُُ نیست اِنت یاکہ گشادءِ کچ ءَ است بلئے جنکانی اسکولانی کچ نیستی ءِ حساب اِنت،یکبرے بائد ہمے جنکانی حاترا اسکول جوڑ بہ کنت ۔
نوں وتی آوکیں گامگیج ءَ پہ شاہ دربرجاہاں بہ کنت ۔چو نہ اِنت کہ واجہ ظہور بلیدی ءِ اے گامگیج جوان نہ اِنت شر اِنت بلئے اے وہد ءَ نہ پرچکہ آئی جند ءِ وتی ہندی ہلک ءِ جاوراں آ جوانی ءَ سرپد اِنت آ جست بہ کنت کہ آئی جند ءِ ہلک ءِ شاہ دربرجاہ پرچکہ اسٹیبل نہ اِنت؟ آئی ءَ جست بہ بیت کہ آئی ءِ دمگ ءَ چنچو جنکانی اسکول است انت ءُُ چنچو بچکی اسکول اَنت۔
پدا ہمے اسکولاں استادانی ڈیوٹی ءِ وڑ ءُُ پیم چے اِنت داں اے گپ وت گیشوار بیت کہ مزن شاہ دربرانی بلوچستان ءِ مردماں چنچو پکار اِنت بلکیں مئے وَ گشگ گوں سرکاری واکداراں ہمیش اِنت کہ شمئے داتگیں پیسری اسکول ءُُ شاہ دربر راج ءَ بس اَنت آ دگہ اوپار کت نہ کنت ۔
مپتیں بٹاگ ءُُ گپ جنی ءَ حرچے وَ نیست اِنت بلئے اے ایوکیں وہد زوالی بائد سرکاری کارگشاد وہد زوالی ءَ یلہ بہ کن اَنت ءُُ گوں دل ءَ یک یک درسد ہم کار بہ کن اَنت داں بلوچ راج ءَ بس اَنت بلئے من زان اَنت کہ اے جمبر ہورے ترمپے مان نیست ،میش ءِ لٹک مپت ءَ ٹال اِنت۔