ہردے بلوچستان ءِ گپ بیت ءُُ آہود ءَ اگاں فاروق بلوچ ءِ گپ مہ بیت چو بوت نہ کنت ۔بلوچستان ءِ دپتر ءِ بابت ءَ فاروق بلوچ ءِ کار درستاں دیم ءُُ سہر ا اَنت ۔میر حمزہ ءَ را دپتر ءِ دنزاں چہ در کنگ ءُُ مہلوک ءِ دست ءَ آرگ ءِ کار ہم ہمے واجہ ئیگ اِنت۔

بلوچانی بابت ءَ بازیں مردمانی ہما لیکہ کہ نسلے بوتگ یاکہ چہ در ءَ اتکگ اے درائیں لیکہانی بدل کنوکءُُ بلوچاناں ہمے ہندءِ حاکم گشوک ءُُ دپتر ءَ را نوکیں لیکہ یے بکشوک ہمے واجہ اِنت فاروق بلوچ ءِ بابت ءَ بلوچستان ءِ مردماں ابید اِدا کوہ ءُُ گیاب ہم گپ جن اَنت کہ حاس چلتن ءِ کوہ ءَ گشتگ ات کہ اے چونیں مردمے کہ ہرکس ایشی ءِ دیوان ءَ نندایت آئی ءَ بلوچانی دپتر ءِ بابت ءَ سرپد دنت ءُُ آئی ءَ را وتی جند ءِ زمین ءِ مہرءَ پرمائیت‘‘‘اے گپاں بل واجہ نوکیں کتاب ءُُ آئی ءِ دپتر ی پنچمی کتاب’’ بلوچستان اور برطانوی مورخین‘‘ کہ سرجمیں یک سد ءُُ یازدہ تاکدیم ءَ اِنت۔

کتاب ءِ بچار ءُُ آسر یاکہ سرشوناں چہ پدر انت کہ اے یک پٹ ءُُ پولی کتابے،ءُُ ایشی ءَ را بلوچی اکیڈمی ءَ چھاپ کتگ اے کتاب آئیءَ کسی نام ءَ کتگ کہ مئے ندکارانی دود اِنت اے مزنیں مردمانی یک نشانی یے نوں بیا کتاب ءِ بابت ءَ چندے گپ کنیں:

اول سراں واجہ فاروق بلوچ ءَ برطانیہ ءِ بلوچستان ءِ قبضہ گیری ءِ بابت ءَ نبشتگ کہ آ سئیل ءُُ سواد ءَ اتکگ اَنت کہ بلئے بلوچستان ءِ جاسوسی اِش ہم کتگ ءءُُ اے بابت ءَ بازیں کتابے اوں نبشتہ کتگ بلئے اے درگت ءَ انگت ءَ بازیں چیزے ءِ نبشتہ کنگ پکار اِنتءُُ اے کتاب ءِ سرجم کنگ ءِ بابت ءَ ہما درائیں سنگتانی ہم منت گپتگ۔

اولی در ءَ آئی ءَ بلوچستان ءِ حد ءُُ ابیلانی بابت ءَ تران کتگ دومی آئی ءِ برطانیہ ءِ جاسوسیءُُ بلوچستان ءَ آئیگ ءِ بابت ءَ نبشتہ ،سیمی در ءَ برطانیہ ءِ جاسوسانی مول ءُُ مرادانی بابت ءَ نبشتہ ،چارمی در ءَ آئی ءَ ہما درائیں چیزانی بابت ءَ سرجمی ءَ تران کتگ کہ برطانیہ ءِ مردمانی اصل مول ءُُ مقصد بوتگ اَنت ۔

کتاب ءِ گڈی در ءَ آئی ءَ درائیں درانی یکجائی ءَ ہمے گپ ءِ گیشواری کتگ کہ د ر ملکی مردمانی بلوچستان ءَ آئیگ ءِ مول نیک ءُُ اِدا نندوکان جوانیں مستاگے نہ بوتگ بلکیں آئیءَ را بلوچستان ءِ زمین ءِ پکار بوتگ کہ چریشی ءَ آ افغانستان،ایران،سندھ ہند ءَ ارزانی ءَ ارش کرتگ ءُُ ہمے مول ءِ سرجم کنگ ءَ پیسر ءَ گرانت۔

پوٹینگر ءُُ کرسٹی ءَ روان دئیگ بوتگ اَت ءُُ ایشانی کار بلوچانی چہ تہ ءَ پروشگ بوتگ ءُُ ایشانی اے کار پہ جوانی ءَ کتگ ہمے کاراں چندے اے بوتگ اَنت کہ بلوچ ءَ را زبانانی سرا یکے دومی ءَ چہ جتا ءُُ گستا بہ کن،بلوچانی اصل بنزہ ءَ چہ مہر گڑھ ءَ بہ سند ءُُ حاکم ءُُ ارشکارانی پدریچ بگش،(رند ءَ فاروق بلوچ وڑیں دپترزانتاں اے گپ دروگ کتگ انت) برطانیہ ءِ ہمے مردماں بلوچانی وت ماں وتی قبائلی جنگانی آس دئیگ بوتگ،ءُُ دنیا ءِ کہن تریں ءُُ با عزتیں قوم ءَ را دز ءُُ ڈنگ گشتگ ءَ اے مردمانی کار بوتگ ۔ ابید چہ ایشی ءَ ہمے مردماں بلوچانی مال ءُُ دولت ءِ سرا ہم ارش کنگ ءِ جہد کتگ بلوچانی بندی نشانی بزاں سواستیکا(رک) ءَ را وتی نشان گشگ،بلئے اے کتاب ءَ واجہ فاروق ءَ ایشانی اے درائیں مکاری ءُُ دروگ ءُُ پندل پدر کتگ انت۔

اے درائیں چیزانی بابت ءَ واجہ فاروق بلوچ ءَ باز جوانی ءَ گوں نبشتہ کتگ ءُُ اے گشگ رد نہ بیت آ ئی ءَ وتی دپتر نویسی ءِ پداں اے گرانیں کار پہ جوانی ءَ آسرے ءَ سر کتگ ءُُ واجہ ءِ ہمے لیکہ کہ بلوچ ہمے ہند ءِ نندوک بوتگ ءُُ است انت گوں سرجمیں دلیلاں پدرکتگ ءُُ اے یک بلائیں گپے ،پرچکہ گوستگیں بازیں سالاں ہمے لیکہ کہ بلوچ چہ در ءُُ ڈن ءَ اے دمگاں اتکگ نہ ایوک ءَ ڈنی نبشتہ کاراں بلکیں لہتیں بلوچ نبشتہ کاراں ہمے لیکہ ءَ را راست گشتگ ءُُ ہمیشی ءِ باور کتگ بلئے نوں واجہ فاروق بلوچ ءِ برکت ءَ اے لیکہ رد کنگ بوتگ ءُُ بلوچ ہمے ہند ءِ نندوکیں یک قومے ءُُ اے یک نسلے نہ انت۔

واجہ فاروق بلوچ ءِ اے کتاب ہمک بلوچ ءَ را وانگ لوٹیت دانکہ آ زانت بہ کنت کہ ڈن ءُُ دری نبشتہ کاراں بلوچاناں چے نام داتگ ءُُ بلوچانی دپتر چے ڈول نبشتہ کتگ ۔اے کتاب ءَ را اکیڈمی ءَ چنائی ءَ باز ساری بائد اِنت چھاپ بہ کتیں پرچکہ منی اش کنگ ءَ اے کتاب ءَ را سال ءَ را برز اِنت کہ اکیڈمی ءِ گشادکارانی گورا ایر اِنت بلئے فارسی ءَ گشنت کہ دیر آئد درست آئد ،اکیڈمی ءِ کارانی دیم ءَ اے دیر ی اوپار کنگ بیت پرچکہ بلوچی اکیڈمی کوئٹہ بلوچانی ہما یکیں ادرگیں اِنت وتی کمے زراں چہ بازکارکنگ لوٹیت ۔

گوستگیں روچاں سرکار ءَ ہمے اکیڈمی ءِ گرانٹ ءَ را کم کتگ ءُُ یک مردمے ءِ ذاتی اکیڈمی ءَ را دئیگ ءِ ردی کتگ اَت بلئے نوں حال اتکگ کہ سرکارءَ بلوچی اکیڈمی ءِ گرانٹ ءَ را واپس کنگ ءِ جار چینی کتگ ۔

اگاں اکیڈمی ءِ گرنٹ گیش کنگ بہ بیت داں واجہ فاروق بلوچ وڑیں یک زانتکارایں دپتر نویسی یے اے دگہ کتاب ہم زوت وانوکانی دست ءَ کائینت ءُُ ماودار کناں کہ واجہ فاروق بلوچ ءِ نوکیں کتاب بلوچ دپتر ءِ کجام پہنات ءِ رازے دیم ءَ کاریت۔بلوچی اکیڈمی ءِ من منت واراں کہ آئی ءَ وتی چھاپ بوتگیں کتابانی یک سوگاتے من ءَ داتگ ءُُ جہد کناں کہ آوکیں وہداں ہما درائیں کتابانی سرا کسان کسانیں چمشانکے دیم ءَ بیار اَنت۔