بیست ءُُ یک جنوری ءَ بیلہ ءِ نزیک ءَ چہ کراچی ءَ آوکیں مساپری کوچے ءَ گوں ٹیلی ٹینکرے ءَ ڈکّر وارتگ ات کہ چہ آئی ءَ ٹیلی ٹینکر ءُُ کوچ یکجاہ سوتکگ ءُُ پر بوتگ ات انت ۔ چرے ویل ءَ 27 مردم بیران بوتگ انت کہ اے درہانی سیادی گوں پنجگور ات۔

اگاں کہ پہ بلوچ راج ءُُ بلوچستان ءِ مہلوک ءَ اے کسانیں ویلے نہ ات ءُُ دومی دست ءَ اولی رند ءَ اے ویل ءِ پد گوانک قومی اسمبلی ،سینٹ ءُُ بلوچستان اسمبلی ءَ اشکنگ بوتگ ات بلئے ایشی ءِ ہمراہی ءَ اے گپ ہم ناراست نہ بیت کہ اے ویل وتی دروشم ءُُ رنگ ءَ بلوچستان ءِ یکین ءُُ یکتائیں ویل نہ بوتگ ، چریشی ءَ مستریں ویل دوسالے ءِ میان ءَ ماں گڈانی بوتگ انت کہ اودا سدانی حساب ءَ مزور بیران بوتگ ات ا نت بلئے روچ ء مرچی گڈانیءَ گرءُُ دلگوشی گامیگج زورگ نہ بوتگ انت ءُُ ننکہ پنجگور ءِ اے بس ءِ ویل ءِ یک ءُُ دو ماہ ءَ پد حکومت ترانگءَ بیت کہ ٹرانسپورٹ گر ءُُ دار کنگی انت ۔ اے ویل ءَ حکومت ءَ ہما درائیں گامگیج زرتگ انت ۔

انچوکہ اے وڑیں ویلانی بوہگ ءَ پد زورگ بنت ۔ انچوکہ پیسری حکومتاں وتارا وہدی ساہت ءُُ دماناں چہ رسانک در ءِ زد ءَ رکینگ ءِ حاترا گامگیج زرتگ ۔ اے حکومت ءَ ہم ہمے کتگ۔البت اے حکومت گوں وتی نوکیں ٹیکنالوجی ءِ کارمرزی ءَ گامے دیم ءَ اے وڑا بوتگ کہ اے پنجگور ءِ بس ءِ ویل ءَ پد حکومت ءَ وتی درائیں ذمہ داری ٹرانسپورٹرز ءُُ ڈیزل مافیا ءِ سرا مشتگ انت ءُُ وتی چپیں دست وتی چپیں گوش ءِ چیر ءَ کتگ ءُُ وپتگ ۔

اے بابت ءَ چد ءُُ پیش ہم اے وڑیں ویل دیم ءَ اتکگ انت بلئے ہچ حکومت چہ وتی ذمہ واریاں چو پراموش نہ بوتگ اگاں کہ بلوچستان ءِ مزنیں دگانی سرا بیدء ڈیزل گاڑی ہم کپتگ انت ءُُ مزنیں ءُُ نامداریں مردم ہم بیران بوتگ انت بلئے اے گپ ءَ کس گشت نہ کنت کہ اے شخصی گاڑیاں ایرانی ٹیل مان بوتگ ،چوکہ گوستگیں ایم این اے ءُُ نیشنل پارٹی رہشون واجہ ڈاکٹر یاسین بلوچ، گوستگیں ڈپٹی ایڈوکیٹ جنزل سلیم بلوچ کہ بلوچ دپتر ءِ مزنین نام بوتگ انت ۔

اے وڑیں دگہ بازویل انت ایشی ءَ ہوار بساں ٹیلانی برگءُُ آرگ ءَ دیر نہ انت بلئے اے ٹیل ءِ کاروبار ءَ پیسر ہم بلوچستان ءِ دگانی سرا ویل ءُُ حادثہ کم نہ بوتگ انت کہ ایشیءِ مستریں سوب بلوچستان ءَ جوانیں دگانی نہ بوہگ انت ۔ اے وہد ءَ بلوچستان ءِ شرتریں دگ آرسی ڈی سی ءُُ ایم 8ءُُ ایم 9 انت ۔ اشانی توسیپ ءَ حکومت ءِ مردمانی دپ آپ دنت بلئے سرپدیں مردمانی گشگ ایش انت موٹرویانی واہندانی لنک روڑ ہم چہ چرے دوئیں دگاں شاہیگان ءُُ شرتر انت ۔

دومی کراچی داں گوادر ءِ کوسٹل روڑ انت کہ آئی ءَ را وت بلوچ پارلیمانی باسکاں نامدار کتگ کہ’’ کوسٹل ہائی وے‘‘ کہ ناں ہائی انت ءُُ ننکہ ’’ وے‘‘ گشگ بوت کنت دومی بد بحتی ایش انت کہ بلوچستان پاکستان ءِ یکیں دمگ انت کہ یک ’’ ڈبل وے ‘‘ یے نہ نگواہ ات اگاں پنجاب ، سندھ، ءُُ خیبرءِ سفر کنگ بہ بیت گڈا مردم گند ایت کہ دراج ءُُ دور سریں دگ’’ ڈبل وے‘‘ جوڑ کنگ بوتگ انت کہ آئی ءِ ہر دونیمگاں سے سے ءُُ چا ر چار گاڑی یکپارگی تتک کنت بلئے بلوچستان ءَ کہ ہمے دگ ءُُ سڑکاں کہ ’’ کوسٹل ہائی وے‘‘ ءُُ آر،سی ، ڈی سی ءُُ ایم ایٹ ءُُ ایم نائن ءِ نام دئیگ بوتگ اشانی پہ مشکل ءُُ مرادے دوگاڑی یکیں وہدءَ (کراس) ءَ گوست کت نہ کنت ءُُ جاہ یے جاہ یے اے سڑک ہنچو بنت اگاں ہر گاڑی گوزگ ءَ بہ بیت گڈا ایوک ءَ ہر ’’پکائیں سڑک‘‘ ءِ سرا بلکیں بہ بیت بلئے ہر گاڑی ءِ دوئیں پرگ چہ’’پکا‘‘ ءَ جہل بنت ۔

نوں اے وڑیں تنک ءُُ بے سریں دگ ءُُ سڑکاں ویل ءُُ حادثہ نہ بنت گڈا کجا موٹرے وے‘‘ ءُ’’ُ ہائی ویانی‘‘ سرا بنت ؟ گپ ایش نہ انت مئے گیشی کہ بس ایرانی ڈیزل بار بنت اگاں حکومت ءِ دست ءَ بوت کنت بائدیں مساپر گاڑیاں اے کار بند کنگ بہ بیت بلئے اے ڈیزل گیشیں نپ ءُُ سیت ہرکس زانت کہ کوچ ءِ واہنداں گیش کیا سربوہگ ءَ انت؟ پمشکہ بنجاہی ءُُ دمگی حکومت ذمہ واری انت کہ اے ویل ءِ ڈبہ ءَ ایوکءَ ڈیزل ءِ کاروباریانی سرا ملڈ انت ءُُ بنگ مہ ورنت ءُُ ایمن مہ بنت بلکیں وتی اے نزوری ءَ ہم بہ من انت کہ گوستگیں 71 سال ءَ دگ ءُُ سڑکی دیمروئی ءَ بلوچستان پاکستان ءِ ہمراہ نہ بوتگ ءُُ پدا اے گپ ءَ را چیر دئیگ مہ بیت کہ بس ءُُ کوچ چہ مکرانءَ ڈیزل کارانت چہ کراچی ءَ ناں ۔۔۔