بلوچی لبزانک ءِ پشتی دور ءُُ باریگ ءِ گپاں بل کہ آئی ءِ دپتر ی تاریخ بوت کنت ہزاراں بہ بیت بلئے ہمے کہ استیں مواداں کہ دسترس ءَ است اَنت یاکہ کتابی دروشم ءَ چھاپ ءُُ شنگ بوتگ اَنت آوانی گمان اگاں باز ناں داں سد سال بجن۔۔۔بلئے سد سال ءِ سفر ءَ بلوچی لبزانک ءَ چنچو دیمروئی کتگ ؟ہرچ زانتکاریں مردمے ءَ را جست بہ بیت داں آئی ءِ گشگ ہمیش انت کہ کتابانی چھاپ وَ باز بوتگ بلئے کارانی ارزشت ءِ حساب ءَ انگت ءَ ہچی کنگ نہ بوتگ ۔
انگت ءَ درو رہما پیشی سرانی دئیگ بنت کہ بوتگ اَنت دگہ نوکیں حبر ءُُ حالے بلوچی لبزانکی کتاباں گند نہ بیت ۔بلوچی لبزانک ءِ دیمروئی نہ کنگ یک سوبے وَ ہمیش اَت کہ ہما کتابانی حاجت اِنت آ وانی چھاپ بوہگ ءَ نہ اِنت ۔ دومی ہما مردم کہ اصل لبزانکی مردم اَنت آ دیم ءَ آرگ نہ بنت بلکیں انچیں مردم دیم ءَ آرگ بنت کہ آ وت لبزانکی مردم نہ اَنت ءُُ نیکہ آواناں گوں لبزانکءَ سرو کارے است انت انت ،ہمے سوب انت کہ لبزانک دیمروئی کت نہ کنت ۔
یک دگہ سببے ءَ بلوچی لبزانک ءِ دیمروئی نہ کنگ ءِ ایش اوں است انت کہ مردم نہ وان اَنت بلئے ہما چیز ءِ بابت ءَ گپ ءِ جنگ ءَ پرما ءُُ بچار ۔۔۔اے یک زانتگیں گپے کہ مردم ہرچیز ءَ زانتکار بوت نہ کنت بلوچی لبزانک ءِ یک مستریں نزوری ہمیش اِنت کہ کس اے منّگ ءَ ساڑی نہ انت کہ آ درائیں چیزانی بابت ءَ نزانت بلئے درست استادی یے رند پداں کپتگ اَنت،بزاں کس اے گپ ءِ گشگ ءَ ساڑی نہ انت کہ واجہ من اے بابت ءَ سرپد نیاں یاکہ نزاناں تو پلان مردم ءِ گورا برو آ ترا شرتر سرءُُ سوج کت کنت ۔
اِناں اِ دا سرجم ءَ چپ اِنت ،ادا اگاں تو من یلہ دات ءُُ دگہ یک مردمے ءَ چہ زانت زرت داں بزاں تو گناہ اعظیم کت ۔چے بیت اگاں کسے ءَ ہما چیز کہ نہ وانتگ آئی ءِ بے سریں جوابے ءِ دئیگ ءِ جاہ ءَ اے بہ گش اِیت کہ واجہ ا ے بابت ءَ من ہچی نزاناں ۔۔۔۔۔پرے گپ ءَ دگہ باکے وَ مان نیست اِنت ءُُ نیکہ اے گپ ءَ کسے کم شرپ بیت ۔
یک دگہ اوں عیبے است آ ایش کہ بلوچی لبزانک ءِ لبزانت وتی زانت ءَ بہر کنگ اوں نلوٹ اَنت بزاں آ اے گشگ اے حاطر ءَ نہ لوٹ اَنت کہ اگاں من ترا تئی درائیں جستانی جواباں بدیاں ءُُ تو بلد بہ بئے گڑاں منی بستار کم بیت بلئے بدبخت اے چیز ءَ چہ بے حال بنت کہ زانت پہ دئیگ ہلاس نہ بیت بلکیں گیش بیت ۔ابید چہ اے نزوری ءَ بلوچی ءِ دگہ یک نزوری یے بلوچی لبزانک ءِ ایش اِنت کہ اِداں تنقید نیست ءُُ بید تنقید ءَ ہچ لبزانکے ،ہچ زبانے دیمروئی کت نہ کنت ،بدبحتی بلوچی ءَ تنقید نیست اِنت۔
آں شپ ءُُ روچ مردم یکے دومی ءِ پچوکان انت زاہ ءُُ بد کنگ انت بلئے اے زاہ ءُُ بد ایوک ءَ ہما مردم ءِ جند ءِ ذات ءَ گوں بندوک اِنت ،ما مدام چیز ءِ چارگ ءَ ساری اے چاراں کہ کہی اِنت ۔۔۔۔۔کجام مردم ءَ نبشتگ ندکار منی مردم اِنت یانہ اِنت چہ نبشتگیں چیز ءَ منی وابستگی یے است اِنت یاکہ نیست انت ۔۔۔۔۔
اے چیز وَ دائم ءَ چارگ بنت بلئے اے چارگ نہ بیت کہ ہما نبشتگیں چیز باریں لبزانکی کیلواں پیلو کنت ؟ ہما نبشتگیں چیز شر اِنت یاکہ بے سر ءُُ پاد اِنت ۔۔۔۔کریم دشتی ءَ مدام یک گپے جتگ کہ من ءَ آرٹ دوست بیت من ءَ گوں آرٹسٹ ءَ کار نیست من آئی ءِ آرٹ آئی ءَ فن ءَ چاراں آئی ءِ جندءَ گوں من ءَ کار نیست انت ۔ بلئے مئے نوکیں دور ءِ ایوک ءَ ہما ازمکار دیم ءَ کنگ ءُُ تنقید کنگ وَ من گشت نہ کناں توسیپ گشت کناں ایوک ءَ توسیپ کنگ یاکہ ایر جنی ءُُ زاہ ءُُ بد کنگ بیت ۔
توسیپ ہما مردمانی کہ منی دوست ءُُ ہمبل اَنت ءُُ ایرجنی ءُُ زاہ ءُُ بد ہما مردمانی کہ منی دژمن ءُُ بدواہ اَنت ۔نی اے پیمیں یک چاگردے ءَ لبزانکے چون ءُُ چتور دیمروئی کت کنت ،من گشاں ہچبر بوت نہ کنت ۔
دانکہ ہمے درائیں عیب کہ نبشتہ بوتگ اَنت ہمے عیب در کنگ مہ بنت بلوچی لبزانک ءِ دیم کنگ دروگے،ایوک ءَ کتابانی گش کنگ ءَ چہ کس مزن وَ نہ بیت چووَ منیر احمد بادینی ءِ سد ءَ برز من گشاں بلوچی ءِ نہ ایوک ءَ گدار نویسانی بلکیں کسی کتاب سد نہ ینت آئی ءَ نہ ایوک ءَ سد ناول نبشتگ بلکیں سد کتاب ءِ واجہ کار اِنت بلئے آئی ءِ چیزے گداراں یلہ دئے اے دگہ ازمی حساب ءَ شر نہ اَنت من گیش گشگ نہ نلوٹاں پرچکہ مئے چاگرد ءَ گیش گشگ بوت نہ کنت ءُُ ساری فتوا جاری بیت کہ اے وَ آئی ءِ حلاپیں مردمے بلئے ہما کہ گشگ ءِ اصل مول اِنت بائد ہما گپ دیم ءَ کنگ بہ بیت باقی۔۔۔۔۔۔
بلئے مردمءَ ایوک ءَ یک کتابے اوں زندگ کت کنت انچوکہ غالب ءِ یکیں دیوان اِنت کہ سرجمیں اردو ادب ءُُ آئی ءِ یکیں کتاب ہمے رنگ ءَ فاضل ءِ شاعری اِنت آئی اوں یک کتابے شوہازگ بوتگ بلئے ازمی حساب ءَ آ بے عیب اَنت ۔پمشکابلوچی لبزانک ءَ اگاں کتاب چھاپ گیش بوہگ ءَ اِنت وَ راستے بلئے چنچو لائقِ وا نگ اَنت اصل جست ہمیش اِنت ۔