بلوچستان ءِ بنجاہی شہر کوئٹہ اِنت کہ درائیں بنجاہی ادارگ ہمے شہر ءَ جوڑ کنگ بوتگ اَنت ، سرجمیں بلوچستان ءِ درائیں کارگوں ہمے شہر ءَ بندوک اَنت۔ انچو کہ اے دگہ بنجاہی شہراں سرکار گیشتر سہولت دنت ، کمے گیشتر سینگار کنت ،کمے گیشتر دلگوش دنت کہ زانگ بہ بیت یک صوبہ یے بنجاہی شہر اِنت ۔بلئے بلوچستان ءِ بنجاہی شہر ءِ جاور چے اَنت ،نیکہ جوانیں دگ ءُُ سڑکے است ،نیکہ پہ سیل ءُُ سواد ءَ پارکے،نیکہ جوانیں وانگی ادارگ ءُُ نیکہ زندمانی ءِ دگہ آسراتی کہ نام گرگ نہ بیت ۔

اے شہر ءِ آبادی انچو نہ اِنت ہمے اوگان مہاجراں کمے آباتی گیش کتگ اگاں اے در کنگ بہ بنت داں لوکل مردمانی کساس ہنچو نہ اِنت ۔ بلئے ہمے شہر کہ ایشی ءَ را گونڈ پیرس ءِ نام دئیگ بوتگ ،من گشاں گونڈین پیرس وتی جاہ اے پیر س ءِ چارکے اوں نہ کرزیت ۔

پشت ءَ مہ روت زکیں روچ ءَ ہور ءُُ باران کہ بوتگ اَت کہ درائیں راہ ءَ ہور ءِ آپ مچ اَت مردم بیزانی بوتگ اَنت ءُُ کوئٹہ ءِ مستریں ٹریفک جام بوتگ کہ پنچ پنچ گھنٹہ ءَ مردم راہ ءَ اوشتوک ،سردی ءُُ گہری ءَ روڑ ءِ سرا کونڈے کونڈے آپ روڑانی سرا اوشتوک بوتگ ۔اگاں دگہ ڈنی ملکے ءَ اے وئیل بہ بوتیں آمحکمہ ءِ درائیں مردماں استیفیٰ داتگ اَت آوانی ہلاپ ءَ کانودی کاروائی بوتگ اَت بلئے ،آ مال ءِ واجہ کہ للّہ اِنت آئیءِ جست کنوک اللہ اِنت۔

کوئٹہ سٹی ءَ چشیں روچے نہ گوائی کہ روڑانی سرا گٹر ءِ آپ اشتوک نہ اِنت پرچہ؟چرے آپ ءَ باریں چنت بیماری ودی بیت ،ہمے گٹری آپانی سبب ءَ کس پیادگ گشت نہ کنت ۔مردم حیران بیت کہ پکائیں دگانی سرا انچو دنز چہ کجا کیت۔اے دنز ہمے گٹر آپ ءُُ حاکانی ہواری ءَ چہ جوڑ بیت کہ دگانی سرا ہشک بنت ءُُ وہدے گاڑی اِش کہ سرے گوز اَنت داں دنز بیت ۔بلئے حکومت ءِ گوشاں مورے نہ وارت ۔

ہور دیری ہلاس بوتگ مرچی سیمی روچ اِنت بلئے دگانی سرا آپ انگت ءَ اوشتوک انت ،مردم پہ کارے ءَ اگاں موٹر سائیکل ءِ سرا بروت داں دفتر نہ بیت ۔ گاڑی انچو بنت گشئے نوکیں چہ کورے ءِ دراتک چہ آپ ءُُ حاک ءَ شُرچ ءُُ پُرچ بنت ۔

اے حکومت ءِ ذمہ وار اِنت اگاں وتی بزگیں قوم ءَ را دگہ آسراتی دات نہ کن اَنت ، دگہ پارک ءُُ سئیلی جاگہ جوڑ کت ءُُ دات نہ کن اَنت ہمے گٹرانی آپ ءِ دارگ ءِ کار ءَ وَ بائد بہ کن اَنت اگاں اے کار اوں گوں حکومت ءَ نہ بیت داں بائد آچہ وتی وزارتاں دست کش بہ بنت بلئے

’’چمے بہ بیت گندگ ءُُ 
گوشے بہ بیت پہ اِش کنگ‘‘

بلوچستان ءِ بنجاہی شہر ءِ بحت جہل ءَ کپت ءُُ دستِ ناشران اِنت،اگاں جست بہ بیت داں کس اے ذمہ واری ءَ وتی کوپگاں زورگ ءَ ساڑی نہ بیت ہرکس دومی ءِ بڈ ءَ ہمے ذمہ واری ءَ دور دنت،بلئے چوش نزانت کہ ذمہ واری ہرکس بہ بیت آ وت اوں ہمے دگ ءَ چہ روت ءُُ کیت پرآئی ءَ دگہ بالی گرابے نئیت اِنت۔