بلوچستانءِ اے دگہ جیڑگانی ہواری ءَ یک مستریں جیڑہ یے لس مہلوک ءِ حیالداری اِنت کہ حکومتی کارندہ اے کار ءَ چہ پہک بے حال ءُُ شموشکار اَنت۔لس مہلوک ءِ کسان کسانیں جیڑہ اَنت ءُُ ہما جیڑہ کہ حکومت ءِ وس ءُُ واک ءَ در ہم نہ اَنت۔
بلئے حکومت ءَ آوانی گیشواری ءِ بدل ءَ گیشتر لس مہلوک ءَ را وار ءُُ بزگ کنگ ءَ اِنت ۔ انچو سما بیت کہ بلوچستان ءِ بنجاہی شہر ایوک ءَ لہتیں زردار ءُُ است مندیں مردمانی جاگیر اِنت ۔لس مردمے ءِ گورا یک سائیکلے نیست اِنت کہ وتی نزیکیں سفرے ءَ شت بہ کنت دور ءُُ دراجیں سفر ءَ پہ گاڑی آوانی یک وابے۔
اے بابت ءَ حکومت ءِ ذمہ واری ات کہ مہلوک ءَ سفر ءِ جوانیں آسراتی بدنت بلئے جہندم چہ حکومت ءِ آسراتی ءَ سریاب ءَ وہدے کراچی ءُُ اے دگہ شہرانی روکیں بسانی چہ شہر ءَ در کنگ ءُُ دور مغربی بائی پاس ءَ دور دئیگ یک بلائیں زلمے اَت کہ لس مہلوک ءَ اے بابت ءَ ایرادگیری کت ،نندانک جت ، زارشانی روانک درکت بلئے حکومت ءِ گوشاں مورے ءَ ہم نہ وارت ۔ہمے رنگ ءَ نوں گوں لوکل بسانی گوما بوہگ ءَ اِنت ۔
کوئٹہ کہ بلوچستان ءِ بنجاہی شہر اِنت ،اِدا اورنج بس ، میٹرو ٹرین ءُُ دگہ آسراتیاں بل ہمے سریاب،سبزل، بروری ، قمبرانی ءُُ اے دگہ بسانی ہما کہ جاور اِنت آوانی اوں چار ءُُ بچار ہچبر کنگ نہ بیت کہ آوانی سفر کنوک لس مہلوک ءُُ ہما نودربر انت کہ رکشہ کرا کت نہ کناں ۔ہمے لوکلانی جاگہ بدلی ءِ بابت ءَ پیسر ءَ اوں حکومت ءِ مردماں گوں لوکل بس والا ءُُ اے دگہ لس مہلوکاں زار شانی کتگ بلئے حکومت ءَ را گوں لس مہلوک ءَ ہچ سروکار نیست۔
،نوں اے چارمی رند اِنت کہ لوکل بس اسٹاف بدل کنگ بوہگ ءَ اِنت نوں ایشی ءِ جاہ بدل کنگ ءُُ اے جی ءِ دفتر ءِ دیمی دگ ءَ کنگ بوتگ اَنت ،یک نیمگے اسمبلی ءِ دیم ،دومی نیمگ ءَ سیکرٹریٹ پدا لوکل بسانی ’’ مچے مونا ایلم‘‘ یک نہ بوتگیں ءُُ وتی کندگی حبرے کہ اگاں مردمے چہ بلوچستان یونیورسٹی ءَ بس ءَ سوار بہ بیت ءُُ اے جی آفیس ءَ ایر بئیت پدا جناح لائیبریری ءِ روگ ءَ دگہ رکشہ یے کرا کنگ لوٹ ایت ،مردم ٹرانسپورٹ ءَ سفر کنت کہ سفر کم بہ بیت بلئے بلوچستان ءَ ٹرانسپورٹ سفر ءَ کنگ ءِ جاہ ءَ سفر ءَ دراج تر ءُُ کرا گیشتر بیت۔ بلئے سرکار ءُُ حکومت ءَ را اے بابت ءَ ہچ چرتے پر نیست اِنت ۔
کہ ڈ ن ءُُ دری مردمے کہ کیت آ ہمے جاگہاں کیت ءُُ آوانی اولی چارگی چیز دگہ باگ ءُُ پارکے ءِ جاہ ءَ ہمے لوکل بس بنت ۔ لس مہلوک حکومتی ہمے بدلی ءُُ سدلیاں سک بے وار ءُُ بے زار کتگ بلئے’’ عرض ءَ برے کئی در ءَ سلطان وت کہ قاتل اِنت ‘‘۔بائد ہمیش اِت کہ حکومت ءَ لوکل بسانی واہنداناں ڈنڈ ءُُ ملام بار بہ کتیں آ انچو زرگری ءَ پد ہم یک کلدارے لوکل بسانی مرمت ءَ حرچ نہ کن اَنت۔
،اسپیت پچیں مردمے ہمے لوکلانی سوار ی ءَ پد وتی سیاہ پچے جوڑ بیت ۔ بل ایشی ءَ اے وتی بساں داں ہما وہد ءَ مانچنی کن اَنت دانکہ پادے ءِ ایر کنگ ءَ جاہ مہ بیت ۔ آواناں گوں مردمانی آسراتی ءَ ہچ سروکارے نیست اِنت آ ہاں ایوک ءَ وتی بیست کلدار ءَ گوں کارنت ۔
حکومت ءِ لوکل بسانی جاگہانی مٹ کنگ ءَ شرتر اِنت کہ آ ہمے لوکل بسانی جاوراں کمے گہتر بہ کن اَنت پرچکہ اے بلوچستان ءِ لس شہرے نہ اِنت بنجاہی شہر اِنت ءُُ بنجاہی شہر ءِ بس بس لائق سفر نہ اَنت۔ اے بابت ءَ گوں حکومتی کارداراں ہمے دزبندی اِنت کہ آ لوکل بسانی جاگہ ءِ مٹ ءُُ بدلی ءِ جاہءَ ہمے بسانی جاوراں مٹ بہ کن انت ءُُ لس مہلوک ءَ را اگاں دگہ عرش ءُُ کرشے چہ حکومت ءِ نیمگ ءَ رست نہ کنت داں اے آسراتی بائد دئیگ بہ بیت ۔