یک نامداریں کولے کہ ” The only thing we have to fear is fear itself “زند گی ءَ چشیں بازیں جاور انسان ءِ دیم ءَ کیت کہ آئی ءَ را ترس ایت آئی ءِ پگر ءُُ سما ءِ درائیں در ءُُ دریگ بند بنت ءُُ آ دست ءَ سرا کنت نند ایت ءُُ بے سوبی ءَ زندگی کنت باز انچیں مردم اوں است کہ چرے جاوراں دلپروش بیت ءُُ وتکشی اوں کنگ ءَ لاچار بیت۔

بلئے چشیں جاوران اگاں مردم وتی ترس ءَ یکر بہ کنت ءُُ ہمے جیڑگ ءِ گیشواری ءَ دیم ءَ بئیت انت گڈاں دنیا ءِ ھچ وڑیں جیڑہ ءُُ جنجال آئی ءِ گاماں داشت نہ کنت آ زند ءِ ہمک تک ءُُ پہنات ءَ سوبمند بیت ۔

دنیا ءِ ہما مردم کہ وتی دیم ءِ اڈانگ ءُُ جنجالاں چہ بہ ترس اِیت ءُُ دستاں سرا بہ کنت آ ھچبر سوب مند نہ بیت بلئے ہما مردم کہ چشیں جاوراں وتی پگر ءُُ سما ءَ کار بہ بندایت ءُُ وتی جیڑاگانی گیشواری ءَ کت کنت ءُُ ہر وڑیں جاورانی دیمپانی ءَ کت کنت ۔

آئی ءِ پگر ءُُ سما مدام چشیں جاورانی گر ءُُ دار ءَ پیش بندی کن اَنت ءُُ آئی ءِ راہ ہانی درائیں اڈ انی گیشوار بیت ءُُ آ زند ءِ ہمک پڑ ءَ سوبمند ءُُ نمیران بیت عہدیگیں مردماں گشتگ کہ نہ ترسی ءُُ جوان مردی سکیں جوانیں ھبرے بلئے تنی وھد ءَ کس چہ نہ ترسی ءُُ جوان مردمی ءِ سیمسراں چہ آ دیم گوست نہ کتگ ہمک مردم ءِ دل ءَ یک نہ یک جاھے ترسے الم دل ءَ است بیت۔

آ چہ وتی ہما ترس آدیم بوت نہ کنت نامداریں پہلوان جے کے ولسن(J,K willson) فرانس ءِ یک نامداریں پہلوانے بوتگ انچو گش اَنت کہ چہ مزن مردی ءُُ زورآوری ءَ کس چہ آئی ءَ گیش نہ بوتگ بلئے آئی ءَ را شپ ءِ سیائی ءَ سک ترس اِتگ آئی ءَ بہہ شپ ءَ ایوک ءَ سفر نہ کتگ آئی ءِ دل ءَ شپ ءِ ترس داں پیراں سری ءُُ داں بیرانی ءَ بوتگ ۔

چشیں کسان ءُُ مزنیں ترس ہمک مردم ءِ دل ءَ است بیت ۔زانتکارانی گشگ اِنت کہ نہ ترسی یے ءِ مانا اے نہ اِنت کہ گوں ہمک مردم ءَ جنگ ءُُ داوا بہ کنت ہمک جنگ ءِ پڑ ءَ وت ءَ دیمی بہ کن ءُُ وتی تمردی ءِ توسیپ ءُُ ستا ءَ ہمک جاہ ءَ بہ کن بلکیں اسل تمردی ہما اِنت کہ ناگیگیں جاوراں قوم ءُُ راج ءِ پہازی ءَ کت بہ کنت ،گٹ ءُُ دورسریں راہاں مردمانی رہشونی ءَ کت بہ کنت اسل تمرد ءُُ زوراک ہما اِنت کہ آئی ءِ تہا اوپار ءُُ سگگ ءِ آٹیگ مان بہ بیت ۔

نامداریں شاہ زانت گوتم بدھ کہ یک نیکرائی کہولے ءِ پیش رو اِنت آئی ءِ کول اِنت کہ’’ جہان ءِ تہا ہما مردم کلاں زوراک اِنت کہ ہرچیز ءَ اوپار کت بہ کنت ‘‘۔ چرے کول ءَ وت زانگ بیت کنت کہ زوراکی ایوک ءَ دومی مردم ءِ جنگ ءُُ چیر دست کنگ نہ اِنت بلکیں اسل زوراکی ءُُ تمردی چہ وتی باتن ءِ ترس ءَ گوں جنگ کنگ اِنت ۔

زندگی ءِ اڈ ءُُ جنجالانی تہا مردمے وھدے دور کنت گڈاں آئی ءِ دل ءَ اے ھبر بائد بہ بیت کہ آ اے پڑ ءَ ایوک نہ اِنت بلکیں بازیں مردمے آئی ءِ گوما انت ءُُ ہرکس وتی سوبمندی ءَ ترا بے سوب کنگ ءِ چک ءُُ پداں اَنت پمشکا ترا ہمک گام گوں پگرءُُ سسا ءَ ایر کنگی اِنت دانکہ سوبمندی تئی بہ بیت ءُُ ترا چہ کس باج بارت مہ کنت ۔

چنائی ءَ مردم ءِ مستریں دژمن آئی ءِ جند اِنت آ مدام گوں وت جیڑایت وت ءَ ملام بار کنت ،وت ءَ شر لیکیت ءُُ دومی ءَ رد ،آ مدام وتی جند ءِ بابت ءَ پگر کنت ءُُ دومی ءِ بابت ءَ بہہ جیڑگ ءِ جہد نہ کنت آئیءِ مستریں ناکامی ہمیش اِنت آوتی تہی دژمن ءَ چہ بے زانت اِنت ءُُ ڈنی دنیا ءَ وتی دژمن ءَ شوہاز کنگ ءِ جہد کنت اگاں آ وتی اندر ءِ دژمن ءَ پجا بیاراِیت گڈاں آئیءِ زندگی دردانی آماچ بیت ۔

پمشکا زندگی ءَ اگاں کسے سوبمندی لوٹیت گڈاں وتی اندر ءِ دژمن ءَ پجا بیارایت ءُُ ہمائی ءَ بے سوب بہ کنت آ دژمن آئی ءِ تہی ترس اِنت کہ آئی ءَ را ترسینگ ءَ اِنت اگاں تو ہما ترس ءَ را دور کت کت رند ءَ جہان ءِ ہچ وڑیں ترس ترا انگیر کت نہ کنت۔