بلوچستان ءِ بنجاہی شہر بزاں کوئٹہ ءِ اے دگہ جیڑگاں بل کہ آوانی گیشواری ءَ باریں دگہ چنت سال ءُُ دگہ چنت رہشون ءِ پکاری بیت ۔بلئے یک دگہ مستریں جیڑگے کہ ہورءُُ بارانی موسماں لس مہلوک ءَ دیم ءَ کیت انت آ روڑءُُ دگّانی سرءِ گٹری آپانی اِنت ۔

انوں زیکیں روچ ءَ حدا ءِ رحمتانی گنجیں بہار ءَ لس مہلوک ءَ را یک نیمگے اگاں وشءُُ وشحالی یے بکشاتگ بلئے دومی نیمگ ءَ لس مہلوک ءَ بگر داں ہما درائیں مردماں کہ کوئٹہ ءِ دگّاں کارمرز کنگ ہما درائیں مردماناں واہ ءُُ زاری یے چیر ماں چیر اِنت کہ راہانی گٹری آپاں چہ مہلوک دلسیاہ ءُُ دلرنج انت ۔ اگاں اے دگہ کسان ءُُ مزنیں شہرانی دگّانی آپ اگاں ہما وہد ءَ دور کنگ یاکہ دگّی آپانی ساپ کنگ ءِ دگہ سوڈگے نیست بیت داں حئیر اِنت۔

بلئے بلوچستان ءِ بنجاہی شہر بزاں کوئٹہ اگاں چو ش بہ بیت داں بنجاہی حکومت ءَ بگرداں آئی ءِ کاراندہاں پہ چے پشت کپیت۔اے یکیں رند نہ اِنت بلکیں ہمک ہور ءُُ بارانی روچاں بنجاہی شہر ءِ جاور ہمش اِنت کہ کس ڈن ءُُ درے ءَ پہ سیل ءُُ سوادے ءَ درکپت نہ کنت ۔پرچکہ راہانی اوشتاتگیں آپاں چہ مردم بیزانی اَنت ۔اے آپانی ایوکءَ راہگوزی مردمانی حاترءَ پہ جیڑگے نہ اَنت۔

بلکیں اے آپ داں بازیں ہفتگاں ہمے وڑا دگّانی سرا اوشتوک بیت ءُُ چرے آپ ءَ باریں چنت نادراہی ردوم زوریت ۔تپ ،کلگ،پشانک ءُُ اے دگہ لس نادراہی کہ اے موسم ءَ بنت ایشاں ابید دگہ انچیں نادراہی کہ چرائی ءَ لس مہلوک ءَ را زند ءُُ زندمانی ءِ ہم خطر بوت کنت ۔ بنجاہی شہر ءَ دگّانی دراج ءُُ مزن کنگ ءِ وَ گشتگ اَت بلئے اے بابت ءَ انگت ءَ ہچ وڑیں سوڈگے دیم ءَ نیااتکگ۔

بنجاہی حکومت وہدے ہور ءُُ بارانی نقصاناتاں گندیت ہمے وہد ءَ ایشی ءِ سرا کارے دیم ءَ نیاریت وہدے آپ حُشک بنت راہ صاف بنت نوں آاے کار ءِ جند ءَ چہ بے حال بیت ۔بائد انت اے کار چہ ہور ءُُ باران ءَ ساری کنگ بہ بنت ۔انوگیں نوکتریں حالانی ردءَ تربت ءِ درائیں کسان مزنیں ہند ءُُ دمگاں کور ءُُ ڈیمانی آپاں سستگ ءُُ مردماناں باریں چنت لکھ ءِ نقصان داتگ ءُُ انگت ءَ اے تاوان جاری اِنت ۔حکومت ءِ بائد اِنت کہ انوں برو ءُُ مردمانی گمواری ءَ بہ کنت وہدے ارس حشک بنت مردماناں نکس ءُُ تاوانے رسیت نوں افسوس کنگ ءَ ہچ سیتے نہ بیت ۔

مکران ءَ گوستگیں دہ ءُُ پانزدہ سالانی نیام ءَ ہور نہ بوتگ ءُُ حشک سالی بوہگ ءَ بوتگ چاتانی آپ اوں پنچ ءُُ دہ سر جہل شتگ اَنت بلئے نوں آپ ءِ گیشی ءَ چہ مردماناں چنچو نکش بوتگ اے اوں حکومت ءِ ذمہ داریاں کیت انت کہ آ مہلوک ءَ را اگاں چہ چیزے دات نہ کنت داں حدائی ہمے آفتاں چہ رکینگ ءِ بائدیں چیزے گامگیج بروریت ۔ اگاں میرانی ڈیم ءُُ نہنگ ہردو یکجا بہ سداں داں باریں چنت مہلوک ءَ را نکس ءُُ تاوانے رسیت ۔

انوں مکران ءَ آمین ءِ موسم اِنت ءُُ مچ گش بوہگ ءَ اِنت بلئے اے توپانیں ہور ءَ آواناں نکس داتگ ءُُ اے تاوان داں ہور ءِ آسر ءَ نوں بلکیں آسر بہ بیت پمشکا مہلوک ءِ چارگ ءُُ آوانی تاوانانی حساب ءَ بائد حکومتی ءُُ حاص بنجاہی حکومتی مردم دیم ءَ بیااَنت۔

گپ بوہگ ءَ اَت بلوچستان ءِ بنجاہی شہر ءِ دگّانی آپ گوازی ءِ سرا کہ حکومت ءَ اے بابت ءَ ہچ وڑیں گامگیجے نہ زرتگ پمشکا درائیں راہ گوزی مردم چرے آپ ءَ بہ بیزاری اَنت ۔ یک بہ بیت شہر ،دومی بنجاہی شہر ،پدا راہ ءُُ دگ بہ بنت پکہ پداہم آپ داں ہفتگ ہفتگے ءَ راہانی سرا اوشتوک بہ بیت داں وت یک بلائیں جستے ہمے بنجاہی حکومت ءُُ حکومتی کاردارانی سرا ایر بیت ۔