بلوچستان ءَ گوستگیں دہ سالاں پد واجہ حدا ءَ وتی رحمتانی گنج پچ کتگ ءُُ جوانی ءَ زمین ءِ تُن پروشتگ۔بلوچستان ءِ چشیں ہندو جاہ یے پشت نہ کپتگ کہ آہوداں ہور ءُُ باران ءَ نہ گورتگ ۔ بلوچستان ءِ بنجاہی شہر بزاں کوئٹہ ءَ مدتے ءَ پد جوانیں برف گواری یے ہم بوتگ ءُُ مردماں چرے برف گواری ءَ تب وشی کتگ۔
زہگاں ہمے برف گواری ءَ لیب ءُُ گوازی بلئے بلوچستان ءِ روبرکتی ءُُ چیزے رودراتکی ہنداں ہمے ہور ءُُ بارانی ءَ وش ءُُ وشحالی ءَ گیش مردمانی زند ءُُ زندمانی ءَ را جوانیں تاوانے داتگ ۔ ہمے ہور ءُُ باران ءَ یک نیمگے کوہانی تہلگ ءُُ بوٹگاں سر چست کتگ بلئے مردمانی کشتگیں کشار ،پراہ ءُُ بزیں مچکدگ ءِ زنڈیں بہرے چہ دہکان ءَ سستگ ءُُ کور ءِ دپار کتگ۔
چرے تاواناں گیش انوں حالانی رداں شش کسان سالیں ورنا کہ ءُُ سے زالبول چرے زند ءَ آجو بوتگ ءُُ وتی ابدی دنیا ءَ شتگ اَنت ۔لہتیں بزہ کارانی حاکی ایں گس ہمے ہور ءَ دور داتگ ءُُ آواناں سارتیں گواتانی میار کتگ ءُُ ڈن ءُُ دراں یل داتگ انت۔
اے ہور ءُُ باران ءَ راستے کہ پہ ساہداراں کنڈ ءُُ کانیگ چہ آپاں پُر کتگ اَنت ،بلئے ہمے کنڈ ءُُ کانیگاں چنت راہ گار ءُُ چنت راہی وئیل بنی آدم ءِ زندمان ءَ ہوار کرتگ اَنت۔مکران ءَ گوادر ءِ مردم پہ ترمپ آپ ءَ تلوسگ ءَ بوتگ اَنت نوں ہور ءُُ بارانی اے درْد ءَ درائیں تُن گون وت برتگ ءُُ میرانی ڈیم ءَ دور داتگ،بلئے دشت ءِ بازار ءُُ میرانی ڈیم ءِ جہلی درائیں دمگانی مردمانی واب برتگ کہ کجام ڈیم مہ سدیت ءُُ آواناں چہ لوگ ءَ بے در مہ کنت۔
ہور ءُُ باران کئے نہ لوٹیت بلئے رحمتانی گوما اگاں جمبرانی دپ پچ بہ بیت داں جوان اِنت بلئے گوں کہریں دروشمے ءَ کہ بئیت اِنت۔۔؟اے گشگ پہکی ءَ نہ بیت کہ سرجمیں رنگ ءَ اے ہور ءُُ باران ءَ مکران ءَ ہوار سرجمیں بلوچستان ءَ چنچو تباہی کتگ ءُُ چنچو وشی داتگ ۔ پرچکہ جمبرانی ہورگواری انگت ءَ برجاہ اِنت ۔۔اے ہور ءُُ باران ءَ را ایوک ءَ مالی نکس ءُُ تاوان نہ داتگ اَت بلکیں جانی اوں نکس داتگ اَت۔
گوستگیں توپانے ءَ مالی تاوان باز داتگ اَت ۔ پمشکا درائیں مردمانی گشگ اِنت کہ اے ہم یک توپانے بوتگ کہ ٹکر ٹکر ءَ اتکگ ءُُ بلوچستان ءَ ہوار سرجمیں پاکستان ءَ راگپتگ۔ چم گوں حکومت ءَ سک اَنت کہ آ باریں مردمانی چے وڑ ءُُ چتوریں کمکے کت کنت۔ اے بری حکومت ءَ را اے پیشدارگی اِنت کہ آ لس مہلوکءِ درد وار انت ،درد بکشوک نہ اِنت۔