کتاب ءِ نام: بلوچی ویہڑا
رجانکار: شفقت عاصمی
چھاپ کار: پنجاب انسٹیٹیوٹ آف لینگوئج ،آرٹ

’’ بلوچی دیہڑا‘‘ شفقت عاصمی ءِ رجانک کرتگیں کتاب اِنت ۔ اے کتاب ءِ ارزشت داری ایش اِنت کہ اے اولی بلوچی گیدی شاعری ءِ پنجابی رجانک اِنت۔ جی ہو۔۔۔! پنجاب ءِ ندکار ءُُ نبشتہ کاراں نوں بلوچی لبزانک ءِ رجانک بندات کرتگ ۔

اے وت بلوچی لبزانک ءِ زور مندی اِنت کہ آئی ءَ پاکستان ءِ اے دگہ زبان متاثر کرتگ اَنت ۔ اے رجانک اے گپ ءِ ہم پدرائی ءَ کنت کہ بلوچ ندکار وتی لبزانک ءِ دیمروئی ءَ سوبین بوتگ اَنت شفقت عاصمی ءِ گشگ اِنت کہ آئی ءَ را اے کتاب چہ پناہ بلوچ ءِ مدت ءَ دست کپتگ ءُُ اے کتاب عطاشاد ءُُ عین سلامءِ ’’ درین ‘‘ ءِ رجانک انت ۔بلئے شفقت عاصمی ءِ گشگ اِنت کہ اے کتاب ءَ ابید ہم ہرچی کہ گیدی شاعری یے آئی ءَ را دست کپتگ ۔

آئی ءَ آ ہم اے کتاب ءَ ہوار کتگ اَنت چوکہ ازمنہ بلوچ،میر خدا بخش بجارانی ءِ ،بلوچی عشقیہ شاعری ،گل خان نصیر ءِ ،بلوچی لوک ادب ،شاہ محمد مری ءِ ءُُ ثقافت وادی بولان میں ،اے درائیں کتاباں چہ آئی ءَ مواد زرتگ ءُُ پنجابی ءَ رجانک کرتگ اَنت ۔ ۔

کتابءِ سرجم ءَ 224تاکدیم اَنت ۔کتاب ءِ پیشگال بلوچی ءُُ اردو ہردو زباناں نبشتہ بوتگ ءُُ یک پیشگالے واجہ پناہ بلوچ ءَ اے کتاب ءِ نبشتہ کتگ ۔ اے کتاب ءِ دومی شری کہ است اِنت آ ایش کہ آئی ءَ ایوک ءَ پنجابی رجانک نہ داتگ بلکیں آئیءَ بلوچی ءِ اصل مواد ہم ہوار کرتگ اَنت ۔ 

بزاں اولی تاک ءَ بلوچی شعر ءُُ دومی تاک ءَ آئیءِ پنجابی رجانک۔اے گپ ءَ را چہ شک ءُُ گمان نیست اِنت کہ اے واجہ ءِ ہما کہ رجانک اِنت آ آمگ نہ اِنت ، بلکیں باز جاہ ءَ آئیءَ لبزی رجانک کرتگ کہ ہما اصل حیال ءَ را گپتے نہ کتگ ۔بلئے اے بندات اِنت۔یک درورے چہ ہمے کتاب ءَ بچار اِت کہ آئیءَ ہما معنا کہ بلوچی ءَ دئیگ بوتگ آاے واجہ ءَ گپت نہ کتگ ءُُ اچ وت ءَ زیادئیں ءُُ گیشیں بند رجانک ءَ ہوار کتگ اَنت چوشکہ 

بلوچی 
علم دین،پُل گدیں ورنا بیت
بندایت ہرششیں ہتیاراں
ڈھال و توپک ءُُ کاٹاراں
پنجابی 
علم دین میرا کاکا اے
میرا کاکا وڈا ہووے گا
گھبرو سجیلا سوھنا
(تاکدیم36.38)

برز ءُُ جہل ءِ بنداں کسے بچار ایت داں ہردو جتائیں شعرءِ دروشمی ءَ دئیگ اَنت بلئے شکر اِنت کہ رجانکارءَ اے گپ من اِتگ کہ آئی ءَ را وہد ءِ کمی بوتگ پمشکا آئی ءَ اے کتاب ءَ پہ دوار چاریءَ بلوچ ندکاراں روان دئیگ ءِ موہ نہ رستگ ۔

پمشکا ردی یے مان بیت ۔کتاب ءِ تہا گیدی شاعری ءِ درائیں تہرانی رجانک است اَنت ۔بلئے آ بلوچی کہ بلوچے نبشتہ کن اَنت آ رہبند ءَ بلوچی دئیگ نہ بوتگ اَنت بزاں اے کتاب ءَ حمزہ ،زبر،زیر،پیش ہوار کنگ نہ بوتگ اَنت کہ یک بلائیں نزوری ءُُ ردی یے ۔ابید چہ ایشاں اے یک جوانیں کتابے کہ وانگ لوٹیت ءُُ آئیءِ ردی نشان کنگ لوٹ اَنت۔