شہید سکندرآباد سوراب : تحصیل گدر کے علاقہ شانہ میں ٹیوب ویل کے قریب تخریب کاری کی غرض سے نصب بم ناکارہ بنانے کے دوران زوردار دھماکے سے پھٹ گیا جس کے نتیجے میں اسپیشل برانچ کے اے ایس آئی علی حیدر شہید ہو گیا۔

تفصیلات کے مطابق منگل کے روز تحصیل گدر کے علاقہ شانہ کے مقامی افراد نے ایک ٹیوب ویل پر بم نصب ہونے کی اطلاع لیویز کو دی جس پر سوراب انتظامیہ نے سول ڈیفینس اور اسپیشل برانچ کے اہلکاروں کو طلب کر لیا اسپیشل برانچ کے اسسٹنٹ سب انسپیکٹر علی حیدر بم کو ناکارہ بنا رہے تھے کہ زور دار دھماکے سے پھٹ گیا جس میں وہ موقع پر شہید ہو گیا تا ہم وہاں موجود سول ڈفینس اور اسپیشل برانچ کے دیگر اہلکار محفوظ رہے ۔

شہید اہلکار کی نعش کو ڈی ایچ کیو سوراب منتقل کیا گیا جہاں ضروری کاروائی کے بعد نعش ورثاء کے حوالے کر دیا گیا ہے اے ایس آئی علی حیدر کا تعلق خضدار کے علاقہ کھنڈ سے تھا۔