منا ہما وہد کموکمو یات کیت وہدے مئے ہند و دمگاں گونڈوانی ماہتاک ’’ بزم ء اطفال‘‘ ءُُ دگہ یک ماہتاکے ’’ ساتھی‘‘ ءِ نام ءَ اتک من آ وہد ءَ کہ کسان اتاں منا ہمے ماہتاک باز دوست بوتاں من ایشاں ءَ یکیں نشت ءِ توک ءَ وانت ءُُ ہلاس کرت پدا آوکیں ماہتاک ءِ ودار کت ۔

ہمے ماہتاکانی تہا زہنی آزمائش ہم است اتاں ما وتی دماغ چست ءءُُ ایر کت ءُُ ہمیشانی پسو دئیگ ءِ ہاترا ءَ اے ماہتاک منی تروزتک ءِ کرا اتکاں من پہ وانگ ءَ آئی ءِ لوگ ءَ شتاں ماہتاک ونت گڑاں پاد اتکاں ۔

منا یات کیت کہ من یک رندے سیادے ءِ لوگ ءَ شتاں کہ آئی پیتی چہ زہگانی لبزانک ءِ کتاباں چہ پرات من وہدے دیستاں من گل ءَ چہ بال بوتاں کتاب یک یک ءَ ونتاں ۔ من سہب ءُُ بیگاہ ہمائی لوگ ءَ گوازینت ۔ من پیتی ءِ نیم دو روچ ءَ یک یک کرت ءُُ دنت پدا اجازت گپت پہ وتی نیمگ ءَ شتاں۔

زیکیں روچ ءَ کہ زہگانی لبزانک ءِ سرا کار بوت زہگاں پہ آہانی وانگ ءِ دل دات مرچاں مارا گندگ نہ ایت بلوچ ءَ زہگانی لبزانک ءِ سرا کار سک کم کنگ بوتگ ۔ ماانچش سرپدبیاں کہ مارگ نہ بوت ءَ منا یات انت کہ ’’ درونت‘‘ ءِ نام ءَ زہگانی ماہتاکے چہ کیچ ءَ شنگ بوہگ ءَ ات منا یک رندے دست کپت من سک وش بوتاں کہ اے وڑیں ٹیکی ئے مارا دست کپت ءَ آئی تہا وش وشیں حال است اتاں باز زیبانک ات منا سک دوست بوت دیدگ نذر آئی ہاترا ءَ جہد کنگ ات بلئے لہتیں وہد ءَ رند بند بوت منا سک باز ارمان بوت ۔ لہتیں روچ پیسر کہ وہدے منا بلوچی اکیڈمی ءِ نیمگ ءَ بالاچ حمید نورؔ ءِ کتاب ’’ زہگانی لبزانک‘‘ دست کپت۔ من وانگ بندات کت من ءَ باز وشی بوت کہ زہگانی لبزانک ءِ دروشم مارا دوبر گندگ ءَ پیداک انت ۔ بالاچ حمید ءَ شریں جہدے کتگ۔

اے بابت ءَ مانوں سرپد بیاں کہ مئے لبزانکی چاگرد ءِ تہا زہگ بے حیال نیاں۔ کتاب ءِ اولی بہر ءِ تہا کتاب واجہ ءِ جند ءِ آرتگیں کسہانی اِنت چوکہ شکاری ءِ مرگ،ملنڈ کنگ ءِ آسر،کاردزیں لہداد ،کمک او دگہ باز جوانیں سرحالانی سر ءَ زہگی کسہ نبشتہ کنگ بوتگاں ۔ من انچش سرپد باں کہ زہگانی لبزانک ءِ ہاترا ءَ زہگ بوہگ المی انت ءُُ اے کریڈٹ نبشتہ کار ءَ را روتیں کہ آ وت ءَ ہما گونڈیں کد ءَ کاریت ءُُ کسہاں نبشتہ کنت ۔بلائیں کارے سنجے مشرا بالی ووڈ ءِ تہا بلائیں نامے آ گیشت کہ کجام فلم ءِ یک سین ءِ ہاترا ءَ آرا وتی جند ہما مردم ءِ یم ءَ آرگ کپیت کہ آ حقیقی وڑا ہما جاہ ءَ موجود انت ۔

دومی بہر ہما نبشتہ کارانی نوشتانک انت کہ آ پیسر ءَ باز دگہ ماہتاکاں تہا شنگ بوتگ انت ایشانی نزارگ ءَ بالا چ حمید ءِ جہد ستا کرزیت ۔ سیمی بہر لیب ءُُ گوازیانی بابت ءَ اِنت اے ہما لیب ءُُ گوازی انت کہ انونیں وہد ءَ نایاب انت ۔ ہما لیب کہ ماپیش ءَ گوازی کتگاں مرچاں مئے چماں چہ اندیم انت چوکہ اداں دادلکی،اڈاں کچکی، چوکی ، پوری ، کپگی ءُُ ایندگہ بازیں لیب کہ ما دل ءَ بتگاں مئے نودربر آ لیبانی بابت ءَ سرپد نہ ایں آ لیبانی بابت ءَ سرپدی دات ءَ اوایشان زہگانی لبزانک ءِ بہر جوڑ کتگ ۔

اے کتاب شمارا بلوچی اکیڈمیءَ چہ دست کپیت بزورئے بوان اِت ءُُ وتی زہگاں ہم وانگ ءِ سکین بدئےءُُ چہ نبشتہ کاراں دستبندی اِنت کہ چہ زہگانی لبزانک ءَ بے حال مہ بنت۔