یک رندے این جی او ئے پروگرام ءَ یک لاشاری ءِ گو من ڈیک وارت۔ سلام و دروت بوت آں۔۔ آ پنجاب ءِ جاہ منند ات۔ لاشاری ءَ بلوچی نزانت من پنجابی نزانت گوں یک ئے دوھمی ءَ اردو ءَ گپ و تران کنگ کپت۔۔ بازیں ھبر ءُ ھالاں رند من سرپد بوتاں کہ لاشاری وت ءَ بلوچ نہ لیکگ آں۔ من گشت کہ لاشاری آنی تاریخ انت کہ بلوچ انت تو چون گشت کنے کہ تو بلوچ ءِ نہ ئے پنجابی ئے۔

لاشاری ءَ منی گپ گوش نہ داشت او وتی گپ سرءَ کت۔ منی کرءَ بلوچ ءِ تاریخ نیست ات کہ من آورءَ سرپد بکت ایں۔ اے گپ ءَ را دہ سال گوست ءَ بلے اے گپ منی دل ءَ تنے وہدی نہ شت کہ لاشاری پرچیا وت ءَ بلوچ مان نیارگ آں۔ ایشی سبب چے بوت کنت۔ آیا ایشی سبب ہما رند و لاشار ءِ جنگ انت کہ آ جنگ و جدل ءِ آماچ اے مہلوک بوت آں او لڈ و ریچ بوتاں پہ پنجاب او ایندگہ دمگ آں۔۔ آ پہ چیا وت ءَ بلوچ منو گروک نہ انت۔ من جیڑت بلے منی جیڑہ ءَ آسراتی نہ رسیت۔ زند چو ترندیں گوات ءَ بوت منی دیم ءَ گوست۔۔

یک باریگ ءِ مئے سر پہ پنجاب ءِ علاقہ گوجرانوالہ ءَ کپت۔ ما سہی بوتاں کہ یک بلاھیں میتگ ءِ بلوچانی ات۔ مارءَ وہدے کہ ایشاں دیست سک گل ءُ شاداں بوتاں۔ مارءَ شرپ ایش بکشات۔ گند و نند ءَ رند مارا سرپدی رسیت کہ اے وھدءَ اے میتگ ءَ سے سد ءَ چہ زیات بلوچ مہلوک ءِ ھاندان نندوک انت۔ اے مہلوک ءِ سیادی گوں رند ءِ ٹک آ ایں۔

پنجاب ءِ تہا نشتگ آں بلئے ایشاں وتی زبان یلہ نہ دات ءَ ایشانی گشگ ہمیش ات کہ پہ زبان ءِ پہریزگ ءِ ھاترءَ اے دری قوماں گوں سور ءُ سانگ نہ کناں۔ اگاں سانگ او سور بکناں گڈاں زبان ایشانی دست ءَ چہ روت۔ بلئے ایشانی جیڑہ بازتاں۔ اے وتی زندگ دارگ ءَ جہد ءَ کنگ اتاں ایشاناں شناختی کارڑ ءِ جوڑ کنگ ءَ او سرکاری نوکری ءِ گرگ ءَ ھاترءَ سک باز جہد کنگ کپیت۔ ایشانی سیاسی گل نیستیں او نہ ہی بلوچ سیاسی گل ایشانی سروکی ءَ کن انت او ایشانی درداں مارانت۔ پدمنتگ ایں مہلوک ءِ باریں ایشانی آسر چے بیت۔

بلوچانی تہا نادراہی سک باز انت۔ ناتپاکی ایشانی تہا یک بلاھیں جیڑہ ئے۔ اے جیڑہ کدی ھلاس نہ بیت او نہ ہی ایشی ھلاس کنگ ءِ جہد کنگ بوت ءَ۔اگاں بچاراں سیاسی گل بہ باں یا چاگردی گل، وھد ءَ گوں اوار پروشت ءُ پروش ءِ آماچ بنت۔ بہر و بانگ ءِ اے کسہہا را نا ہی سیاسی گل آں مارت ء او نہ ہی چاگردی گل آں۔ رند ءُ لاشارءِ جنگ ءَ یک زمانگ ءِ گوست ءَ بلے ما انوں گنداں کہ ایشانی اثرات مئے چاگردءِ سرءَ گندگ ءَ کاینت۔ مئے دمگ ءِ بازیں مہلوک تنے وہدی چاکرءِ اولاداں گوہرام ءِ دل ءِ بندانت ہمیشی سرءَ پخر کنت بلے آسرپد نہ انت۔

کہ ایشانی چنچوکیں بیمناکیں اثر ءِ مئے چاگردءِ سرء کپت ء چاگرد دست ءُ پاد جنت بلے ایشی چہ در نہ ایت۔ پدا ما گنداں کہ چاگردءِ بہر وبانگ کنگ ءَ ہمیش سیاسی گل آنی یک بلاھیں دست ءَ مان انت۔ بلے مئے چاگرد ءَ تنے وہدی اے گپ نہ مارت ءَ۔مہمند ایجنسی ءَ دو روچ پیسر یک واقعہ ءِ بوت ءَ کہ یک ایف سی ئے کارندہ ءَ یک گس ئے توک ءَ دور کت ات۔ زالبول ءِ آئی سرءَ تیر گوارت ءَ ایشی چہ آ سپاہی ہما جاہ ءَ بیران بوت ءَ۔

اے واقعہ ءَ درگت ءَ آ دمگ ءِ مہلوک سڑکانی سرءَ در اتک ء او زہرشانی کت ءَ سرکارء چہ لوٹ کت ء کہ اے وہیل ءِ تحقیقات بہ بیت۔ سپاہیانی جست و پست کنگ بہ بیت او سپاہی لگام دئیگ بہ بنت۔ بلئے مئے دمگانی توک ءَ چوشیں واقعہ باز بوگ ء انت اے واقعانی ھلاپ ءَ کس زہرشانی نہ کنت۔ آواران ءَ لہتیں روچ پیسرلہتیں زالبول آوار جنگ بوتاں۔ یک سیاسی گل ءِ واقعہ ءِ ھلاپ در نہ یتک او نا ہی زہرشانی کنگ بوت۔ بی این پی ءِ سروک اختر مینگل ایوک ءَ قومی اسمبلی ءَ توک ءَ توار چست کت۔ ہمے آوازءَ چست کنگ ءَ رند ہمے زالبول یلہ کنگ بوتاں۔

2مارچ ءَ ہر سال بلوچ کلچرل روچ دارگ بیت۔ بلے نودربران ءَ کدی سرپد کنگ نہ کپیت کہ کلچر چے ءَ کلچر ایوک ءَ گوں پوشاک ءَ بندوک نہ انت۔ زیکیں روچ ءَ پاگ ضلورت بوت ءَ مردمانی بلے مرچی پاگ مہلوک ءِ ضلورت نہ اانت۔ زیکیں روچ ءَ مزنیں شلوار پادءَ کنگ بوتگاں بلے مرچی مزنیں شلوار زیات مہلوک نہ کنت۔ وخت ءَ گوں اوار دود ءُ ربیدگ بدل بوان انت۔ بلے حقیقی کلچر جو مارءَ مئے جبین ءِ تہا گون بوت ءَ آ مئے لج و میار و ننگ و ناموس بوت ءَ۔ آمئے مہمان داری بوت ءَ۔ آ کس ءِ را باہوٹ کنگ بوت ءَ۔ بلئے مئے چاگرد پروشت ءُ پروش بوت ءَ مئے دستاں چہ بازایں چیزءِ دراتک ءُ شتگ۔

ریاست ءِ یک بلاھیں کوشست ءِ بوت ءَ کہ بلوچ چاگردءَ بہروبانگ پہ کناں آ وتی اے کوشست ءَ چہ کامیاب بوت ءَ او پدءَ مئے سیاسی گل آں ہم آئی ءِ کار ارزاں کت ءَ مروچی مئے ھند ءُ دمگاں بیگانگی صورتحال ءِ۔ مرچی ما سرپد بنت کہ پنجاب ءِ لاشار وت ءَ پہ چیا بلوچ نہ گشیت۔ او تئی سندھ بلوچانی سیادی گوں بلوچستان ءِ بلوچاں سست ءَ او ھلاس بوت ءَ۔ ما پدءَ چارنت کہ مئے سیاسی گل کہ بلوچی قوم پرستی ءِ دعویٰ کن انت۔

آ پروشت پروش ایں چاگرد ءَ اوار پہ چیا نہ کن انت۔ آیا بلوچستان ءِ بلوچ چہ سندھ ئے بلوچاں زیات تراں یا کہ ھما بلوچ کہ آچہ بلوچستان ءَ سستگاں آہاں گوں سیادی دارگ کئے زمہ واری انت۔ آیا بلوچ قوم پرستانی توار پہ ایوکیں زمین ءِ ھاتراایں انچوش کہ ریاست ءَ را پہ بلوچاں کار نیست پہ بلوچ ءِ زمین ءَ کارانت۔

بلوچ سیاسی گل آنی آیا مول و مراد چو ریاست ءِ پیم ءَ انت۔ ما چارانت کہ مئے چاگرد ءِ سرءَ ہر وھد ءَ اڈ و جنجال اتکگ آں یا آہانی سرءَ ارش کنگ بوت ءَ آ لڈ و ریچ بوتگاں پہ در علاقہ ءَ۔ پدءَ مئے کست و کینگ انچوش زیات بوتگاں کہ آ مہلوک واپس نہ یتکگ۔

گڈاں آہاں چہ سیادی ھلاس بوت یا کہ آ بلوچ نہ انت۔ انا چش نہ انت۔ آتنے وہدی بلوچ ءُ بلوچستان ءِ حصہ انت۔۔ اے زمہ واری سیاسی گل آنی انت کہ مہلوک ءَ را اوار بکن انت۔ آہانی گوں رابطہ کاری ءِ بدارنت آہانی درد و دوراں وتی بکن انت۔ آ گڈاں اے بہر و بانگ بوتگ ایں چاگردءَ اوار کت کناں۔