زی جمعہ ءِ روچ ءَ پدا قلات ءَ یک دگہ سڑکی ویلے ءَ سے مردم بیران بوت کوئٹہ کراچی یا مکران کراچی پاکستان ءِ ہما دگ ءُُ سڑک انت کہ ادا ماہ یے بازیں مردمے ایوک ءَ سڑکانی ویلاں بیران بیت۔ بلوچستان ءَ بازیں زانتکاریں مردمانی گشگ ایش انت کہ پاکستان ءَ ہنچو ناشری ءَ بیران نہ بوتگ کہ ہنچو ماں بلوچستان ءَ دگانی ویلاں بوتگ انت۔ اے حساب ءَ بلوچستان ءَ سالے سداں مردم ہمے ویلاں بیران بیت اشانی مستریں سوب بلوچستان سڑکانی نہ بوہگ ءُُ حرابیں جاور حال انت۔

اگاں پاکستان ءِ 71 سال ءِ دپتر چارگ ءُُ ٹپاسگ بہ بیت گڈا ہچبر بلوچستان ءَ پاکستان ءِ 44 درسد زمینی ہند ءِ واہند یءُُ تیاب دپی در ءِ نپ ءُُ سیت نہ رستگ انت۔ زر ءُُ مال ءِ بہر ءُُ بانگ بہ بیت یا روزگار ءُُ ایندگہ مادنی رائیلٹی ءِ حساب ءُُ کتاب، بلوچستان مدام ڈلگچار کنگ بوتگ۔اے گپ بلکیں منگی بہ بیت کہ پاکستان ءِ زر ءُُ مالیاتی بہر ءُُ بانگءَ جاہ منندی حساب (آبادی) چارگ ءِ توجیل کنگ بوتگ بلئے اگاں بلوچستان ءِ سڑک، دگ ءُُ کشکانی نوبت ءُُ باریگ ءِ گپ بہ بیت۔

گڑا بنجاہی حکومت ءِ نیمگ ءَ بلوچستان ءِ سرالڈاتگیں اے توجیل باوری نہ بیت کہ سڑک ءُُ دگ ہم جاہ منندی حساب ءَ چارگ ءُُ فنڈدئیگ بہ بنت پرچکہ سڑک ءُُ دگ ہچبر پہ نپری ءُُ جاہ منندی حساب ءَ جوڑ کنگ نہ بنت پرچکہ یک ضلع یے ءَ بلکیں آبادی باز بہ بیت بلئے ہمے ضلع ءِ زمین (رقبہ) کم بوت کنت پمشکا سڑک ءُُ دگ ءِ جوڑ کنگ ءِ حرچ ءُُ درچ پہ نپری حساب ءَ نہ بیت بلکیں اے چارگ بیت کہ ہمے سڑک چہ چے جاہ یے ءَ بندات بیت ءُُ دومی جاہ یے ءَ یا سرے ءَ کہ ہلاس بیت۔

آئی ءِ دراجی چنچک انت؟ ادا اے ہچبر چارگ نہ بیت کہ اے سڑک ءِ سرا روچے چنچو مردم سپر کنت بچار بلوچ ءِ بدبحتی ءُُ بلوچ رہشونانی کورمیمی ءَ کہ ہمے سڑک ءُُ دگانی جوڑ کنگ ءَ ہم بنجاہی حکومت ءِ دیم ءَ گوستگیں 71 سالاں جوانیں توجیلے پیداک کنگ ءَ سوبین نہ بوتگ انت۔

اگاں کہ بازیں بلوچ راج دوستیں رہشون ہم بنجاہی حکومت ءَ سینٹ ءِ سڑک ءُُ دگانی اسٹینڈنگ کمٹیانی چئیرمین بوتگ انت بلئے ہمے رہشوناں دوگزسڑک ءِ جوڑ کنگ ءِ توپیک ہم نہ بوتگ۔ اے وہد ءَ بلوچستان درائیں پاکستان ءَ ایوکیں دمگ انت کہ ادا ہچ سرجمیں سڑک نیست دومی ہمے ناسرجمیں سڑ ک ہنچو تنک ءُُ بے بُرّ جوڑ کنگ بوتگ انت کہ بلوچستانءِ روکپتءَ بگرداں رودراتک ءَ زرگوات ءَ بگر داں گوریچان ءَ ہرچ سڑک ءِ سرا ہپتگے دو دو ویل دیم ءَ کیت ءُُ یکپارگی دہ دہ مردم بیران بیت بلئے نہ بنجاہی حکومت ءِ گوشاں مورے وار ت ءُُ ننکہ دمگی حکومت ءِ۔

دومی نیمگ ءَ بلوچستان ءِ راج دوستیں رہشون گوشارو انت پرچکہ ملکموت ءَ دگر ءِ چک ءِ کُشگ ءَ چے بیت؟ اے درچ ءَ ترسناک تریں سڑک ءُُ دگ مکران کراچی ءُُ کوئٹہ کراچی ئیگ انت کہ اے راہ ءِ سرا ہمک ہپتگ چہ ویلاں بازیں مردمے بیران بیت۔ آر سی ڈی روڑ کہ ایران ءِ کمک ءَ مستونگ داں کراچی 1970 ءَ جوڑ کنگ بوتگ روچء مرچی ایشی ءَ را گہتر کنگ ءِ جہد کنگ نہ بوتگ ءُُ دومی دست ءَ اے بلوچستان داں سندھ ءِ رش تریں سڑک انت۔

کہ ایشی ءِ پرائی ایوک ءَ 12فٹ انت ءُُ یک دیمی انت کہ پہ جنجالے دو گاڑی سپر کت کنت پمشکہ دراہاں چہ گیشتر سڑکی ویل ہمے دگ ءِ سرا بنت اے درچ ءَ اگاں دمگی حکومت بلوچ ءِ مہلوک ءِ مرگ ءُُ بیرانی سک وش نہ انت گڈا بائدیں بنجاہی حکومت ءَ بلوچستان ءَ شرتریں سڑک ءُُ دگ جوڑ کنگ بہ پرماایت ءُُ کوئٹہ کراچی، کوئٹہ جیک آباد ءُُ کوئٹہ گوادر سڑک ءُُ دگاں دو دیمی جوڑ بکنت۔