بلوچی زبان بہ بیت کہ آئی ءِ لبزانک ءُُ زند ءِ اے دگہ وانگی،مارگی ءُُ چارگی جاور درست پہ بلوچءَ اے دور ءَ نہ وش ءُُ نہ گیگ اَنت۔ ہمے جاوراں اگاں چم کپ اَنت داں وتی زانتکاریں رہشون ءُُ پیشی سراں کہ بلکیں ہمیشانی ہم نیادی ءُُ سکین ءَ اے نیم رودیں کشار تاک ءُُ بَر ے بیاریت بلئے حدا ءِ دگہ کانود ءُُ رہبند اَنت کہ چہ بلوچانی اے واہگانی کشار ءِ سبزگ ءَ بَل آئی آپسریں روتگاں چہ بُن ءَ گواجان اِنت۔چمے مزن روتگاں یکے واجہ رحیم بخش آزاد اَت کہ گوستگیں روچ ءَ بزاں ہمے21 مئی 2019 ءَ کراچی ءَ اَچ ماں مدامی گستہ بوت۔

رحیم بخش آزاد ءِ پڑ باز اِتاں آ یک شاعرے،وانندگیں سرے،لبزانتے،سیاسی کارندہ یے،یک قومی سروکے ءُُ کلاں گیش بلوچستان ءَ مارکسٹ ءِ مستریں سراں چہ یکے اَت۔ رحیم بخش آزاد1942 ءَ آ کراچی ءَ ودی بوتگ ءُُ وتی زند ءِ گیشتریں باری آئی ءَ کراچی لیاری ءَ گوازینتگ اِتاں۔باز مردم بلکیں مہ زانت کہ رحیم بخش آزاد ءَ وتی باریگ ءَ کسانیں زہگ پہ مفت وت وانینتگ ءُُ زانت داتگ اَنت۔

آئی ءِ پارٹی ءِ ہمے گپ کلیں جہان ءِ مزدو ر یک بہ بنت ءُُ وتی حق ءَ چہ سرمایہ داراں بہ گر اَنت۔رحیم بخش ءَ اے گپ ءَ را ایوک ءَ پارٹی ءِ جار ءَ نہ زرتگ بلکیں آئی ءَ وتی عملی زند ءَ ہمے کار کتگ۔آئی ءَ ہچبر چہ مزدور ءَ بدیں گپ نہ کتگ، آئیءِ حق جنی ءَ نیشتگ اَنت،مدام چہ آئی ءِ ہید ءِ ہشکی ءَ پیسر آئی ءِ مُز داتگ۔

زند ءِ گڈی روچاں آکراچی ءَ سینیمہ املپلائی یونین ءِ کارمستر اَت۔آئی ءَ ہما دور ءِ پورٹ ورکرز ءُُ ٹرئینری ورکر ءِ یونیناں مزنیں دست ہواری است اَت۔وتی ماہتاک ”جفا کش“ شونکار ءُُ پاکستان فورم ءِ کمک شونکاربوتگ۔ ابید چریشاں آ سندھی ءِ تاک ”تحریک“ ءُُ بلوچی ءِ بازیں تاک چوکہ ”بلوچی،ساچان ءُُ لبزانک“ ءِ چھاپ ءَ مزنیں دست کمکی یے کت۔

آئی ءَ وتی زند ءِ گران نہادیں وہد پہ زبا ن ءُُ لبزانک ءِ ردوم ءَ ندر کتگ اِتاں۔آئی ءَ بلوچی،اردو ءُُ سندھ زباناں شاعری ءُُ نبشتانک ہردو نبشتہ کتگ اَت۔ واجہ رحیم بخش آزاد ءَ را بازیں جوانیں شاگرد اوں رست کہ آہاں زبان ءُ ُ لبزانک ءِ بازیں پڑاں نام درآرتگ۔ابید چریشی ءَ آ یک مزنیں گشتانک دیوک ءُُ رجانکارے اوں است بوتگ اَت۔ بلئے اپسوز ءُُ سد اپسوزکہ بلوچی ءِ نوک باہند چہ واجہ رحیم بخش آزاد ءَ نزانتکار اَنت۔

زی گوں دوستے ءَ ڈک وارت۔گپ گپ ءَ رحیم آزاد ءِ گپ دراتک کہ من گشت کہ واجہ رحیم بخش آزاد ءِ باریں کتابے گوں تو بیت یا نہ بیت پرچکہ آئی ءِ بیرانی ءَ پد آئی سرا من نبشتانکے نبشتہ کناں بلئے منی دوست ءِ پسو اَت کہ ”رحیم بخش آزاد کئے اِنت؟؟؟؟؟ من دگہ گپ نہ کت ءُُ ہاموش بوتاں۔ اگاں جاور ایش اِنت کہ من وتی لبزانت ءُُ شاعر اں ہم مہ زانیں داں مئے لبزانک ءِ نودربری کجام درد ءِ دوا اِنت۔اے جاوراں من واجہ مبارک ءِ اے شعر گیر کیت
دلانی گپ ءُُ حبر گوں مناں نہ بنت معنا
کجام زہم جتگ بیوفائیں پرزنداں
قاضی ءِ اے شعر پہ رحیم بخش آزاد ءِ نزانتکاراں پہ بس اِنت۔
اے پیمیں مردمانی بائد دگہ توسیپ مہ بوتیں بلکیں ہرکس چہ ایشاں آشنا ءُُ زانتکار بوتیں بلئے اے پیمیں کار ءَ زندگیں راج کنت نئے کہ۔۔۔۔۔۔

بوت کنت رحیم بخش آزاد ءِ ہما لیکہ کہ پیش ءَ بوتگ آ زند ءِ گڈی روچاں مہ بیت بلئے آئی ءِ سکیں ءُُ دلبڈی مدام گوں وانو کیں مردماں بوتگ ءُُ آئی ءِ ہدوناکی گوں زانندگیں مردمان اِنت۔ رحیم بخش آزاد ءَ نہ ایوک ءَ پہ زبان ءُ لبزانک ءَ کار کتگ بلکیں آئی ءِ کارانی یک لڑے سوشل ہم بوتگ۔ لیاری کراچی ءِ مردمانی گشگ اِنت کہ مرگ، دیوان،دعوت، جنگ،وشی،ہرپیمیں جاوراں رحیم بخش آزاد گون بوتگ ءُُ مردمانی ہمکوپگی ءَ اوشتاتگ۔

پمشکہ اے پیمیں مردم مرگ ءَ چہ پد گار ءُ بیگواہ نہ بنت بلکیں گیشتر نمیران بنت۔ آوانی یات دائم ءَ ہرمجلس ءُُ دیوان ءَ زندگ بیت۔ آئی ءِ توار دائم ءَ گوشاں جِک وارت ءُُ گیشت کہ من استاں۔ پرچکہ استال وَ درست ظاہر اِنت بلکئے آ استال کہ چہ بند ءَ سدیت،درپشت ءُُ رژنائی ءَ درا بیت ءُُ یک دمانے جہان ءَ رژنہ کنت۔