من وتی کسانی ءَ وہدے پت ءِ گورا نشتگ ءُُ ریڈیو ءَ بی بی سی گوشداشتگ گڈا برے برے چہ کوئٹہ ءَ صدیق بلوچ ءِ بلوچستان ءِ سیاسی ءُُ معاشی جاورانی باروا آئی ءِ لیکہہ ہم گوشداشتگ انت۔پداوہدے پہ وانگ ءَ کوئٹہ ءَ اتکاں گڈا برے برے آساپ ءِ کارگس ءَ راہ رواجی واجہ صدیق بلوچ ءَ گوں سلام علیک ہم بوت۔ اے ہما وہد اَت کہ آساپ چہ واجہ صدیق بلوچ ءِ چھاپ جاہ ءَ چھاپ بوہگ ءَ ات گڈا اودا گوں آصف، طارق ءُُ شہزاد ءَ سنگتی بوت۔ چد ءُُ بعد آزادی ءُُ آساپ ءِ کارگس پہ من ءَ یکیں ہنکین اتنت۔

صدیق بلوچ احوالکاری ءِ پڑ ءَ یک مزنیں نامے اَت بلئے پہ ما آ چو پت ءِ وڑا مہربان اَت۔آ وہد ءَ ما نوک نوک احوالکاری ءِ پڑءَ سر جنان اتیں گڈا گوں ملک سراج، شہزاد، سیف ءُُ شاہد رند ءَ نند ءُُ نیاد بوت اُودا ہر وہد ءَ ہمے گپ ءُُ تران بوت انت کہ واجہ صدیق بلوچ ءَ اگاں مئے وڑیں صداں ورناہیں احوالکارانی دست مہ گپتیں ءُُ ہیل مہ داتیں گڈا اے پڑءِ آہگ ءِ گمان ہم نہ بوتگ ات۔

من ءَ آ وہد ہم گیر کاینت کہ آساپ ءِ سرا گرانیں وہد اتکگ اتنت۔بلئے آ وہد ءَ ہم واجہ صدیق گوں آساپ ءُُ واجہ جان محمد دشتی ءِ ہمراہ ءُُ ہمکار ات۔ وہدے واجہ جان محمد دشتی ءِ سرا اُرش بوت ءُُ آ جنگ بوت گڈا اے واجہ صدیق ات کہ آئی ءَ آساپ ءَ را چورہی ءَ یلہ نہ دات ءُُ بازیں معاملاتاں مارا سر ءُُ سوج کت۔وہدے زوراکاں آساپ گٹ گیر کت گڈا یک روچے من ءَ کالے اتک کہ آزادی ءِ فلاں فلاں روچ ءِ تاک پکار اَنت۔ من گوشت کہ تو بُرو آزادی ءِ کارگس ءَ ترا اے تاک ہمودا دست کپنت گڈا آئی ءَ گوشت کہ ”آساپ“ ءُُ”آزادی“ زاناں شمئے روتاک نہ انت؟ من پسو دات کہ نہ واجہ ”آزادی“ مئے روتاک نہ انت۔ ایشی ءِ مطلب ایش اَت کہ روتاک ”آساپ“ ءُُ”آزادی“ ءِ نظریاتی لیکہہ ءُُ ہمکارانی سیادی ہمنچو محکم اَت کہ مردم ءَ ہمے لیکیتگ کہ اے دوئیں یکیں ادارہ یے روتاک انت۔

2013ءَ من سوشل میڈیا ءِ باروا یک ڈاکومنٹری ءِ جوڑ کنگ ءَ اتاں گڈا من واجہ صدیق ءَ راکال کت کہ واجہ سوشل میڈیا ءِ باروا تئی لیکہہ ءُُ تران ریکارڈ کنگی انت۔ گڈا من ءَ را گوشتے کہ ”تو وا منی کارگس دیستگ ءُُ اے ہم زانے کہ کجام وہد ءَ من کارگس ءَ باں گڈا کال کنگ ءِ مقصد چے انت؟“ من حیران بوتاں کہ من بلوچستان ءِ نامدار تریں احوالکار ءَ گوں تران کنگا آں بلئے اے آئی ءِ مزنی اَت کہ گون من چو چُکی ءِ حساب ءَ تران ءَ اَت۔

مرچی واجہ صدیق ءَ اے دنیا یلہ داتگ بلے آئی ءِ مہروانیں یات مئے مڈی انت کہ ایشانی پہازگ مئے سرا فرض انت۔ ہمے فرض ءِ پیلو کنگ ءَ آصف بلوچ ءَ باج بُرت کہ آئی ءَ واجہ صدیق بلوچ ءِ زند ءُُ ازم ءِ باروا نامی ئیں احوالکار ءُُ لبزانتانی نبشتانک یکجا کتگ ءُُ چھاپ کنائینتگ انت۔ منی حیال ءَ اے یک مزنیں جُہدے کہ بلوچستان ءِ ورنا ءُُ ملک ءُُ در ملک ءِ مردم ہم بہ زاننت کہ بلوچستان ءَ چوشیں مردم ہم پیداک بیت کہ گوں وتی ڈیہہ ءُُ مہلوکانی آسودگی ءُُ وش حالی ءِ باروا جیڑہ انت ءُُ آہانی توار ءَ ماں رسانکی وسیلہاں واک دار ءُُ حاکماں سر کننت۔

سفیر بلوچستان کتاب ایک انچیں سرشونی کتابے کہ چریشی ءَ احوالکاری ءِ پڑءِ نودربر نپ زرت کن انت ءُُ واجہ صدیق ءِ ازم ءُُ احوالکاری ءِ گیشیں جہتاں سرپد بوت کن انت۔