ما سوشل میڈیا ءِ سر ءَ چنچو وھد فضول ءَ گوازینیں۔ اگاں وھدءِ حساب ءَ بکن آں تو مارءَ وت اپسوس بیت کہ ما وتی وھد چنچوک پہ مفت گوازینتگ۔ ما بائدیں وتی اے بہانگ ءَ ھلاس بکنیں کہ مئے کرءَ وھد نیست ما پمیشکہ نہ نبشتہ نہ کنیں۔ وھد ءَ وتی دست ءَ بکن وھد ترا دست کپیت۔
کدی کدی انچیں نودربر ڈیک ورانت کہ آہانی گشگ ہمیش انت کہ نبشتہ کاری چنچو زر ءُُ کلدار دنت۔ تنے وھدی نبشتہ کاری ءِ پڑءَ دور نہ کتگ ئےِ آئی ءَ چہ پیسر چشیں گال کنگ منی ھیال ءَ یک گنوکی یے، اولی گپ ہمیش انت کہ نبشتہ کاری ءِ پڈ ءَ آ وڑ ءَ زر نیستیں مہلوک سرپد بیت۔ پد ا ایش انت کہ نبشتہ کاری ءِ پڑءَ دور تو بکن بلئے چیزاں سرپد بہ بو۔ جوانیں سرھالانی سرءَ نبشتہ بکن۔ وھدیکہ تئی نبشتانکانی تہا شریں رنگے زاہر بوہگ شروع بوت گڑاں ترا ادارگ وت توار جن انت کہ پمن نبشتہ بہ کن۔
پرچا کہ تو دھدے نبشتہ بندات نہ کتگ ءُُ تو ہمے امیت دارے کہ تئی نبشتانک بلاھیں روتاکانی تہا چھاپ بہ بنت ءُُ ترا زر ء ُ کلدار بہ رسیت۔ منی ھیال ءَ گڑا تو تنے وھدی واب گندگ ءَ ئے۔واب گندگ ءَ او عملی میدان ءَ آھگ کار کنگ دو جتائیں چیزاں۔ عملی میدان ءَ بیا وتی یک ٹارگٹے ایر بکن ءُُ گوں مستقل مزاجی ءَ کار بکن۔ تو وت وتی کارءِ تہا شری گندے۔ ءُُ تو وتی واباں پیلو کت کنے۔
ماگنداں اے دورءِ تہا روتاک، ماہتاک، آن لائن جرنلزم ہر کجا پلیٹ فارم مچ انت۔ تئی نبشتانک یک نہ یک پلیٹ فارمے سرءَ جاگہ لازم کن انت۔ ءُُ کجام زبان ءَ نبشتہ کنگ لوٹے او کجام سرھالءِ سرء َترءَ کمانڈ استیں ہما سرھالانی سرءَ نبشتہ کنگ شروع بکن ئے۔ ما چاریں کہ نیشنل روتاک وتی جاہ ءَ لوکل روتاکانی تہا بلوچستان ءِ نبشتہ کارانی کار گندگ ءَ نہ ایت۔ پدءَ مئے نوجوان گلگ ءُُ گلگ شونی کن انت کہ ماراروتاکانی تہا جاگہ نیست۔ اگاں تو نبشتہ ءِ بندات کت ءَ تو کوشست بکن کہ وتی نبشتہ ءَ اولی سرءَ لوکل اخبارءَ چھاپ بکن۔
بازیں نودربر ڈیک ورانت آہانی جست ہمیش بیت کہ آہانی نبشتانک روتاک جنگ ءُُ ڈان ءَ چون شنگ بنت۔ من آہاں گش آں کہ اول سرءَ نبشتہ ء بندات بکن او وتی نبشتہ ء بوان بچار کہ آئی ءِ کوالٹی چے انت۔ تو وت سرپد بئے کہ تئی نبشتانک چنچو جانداریں او آ کجا چھاپ بوت کنت۔ پدا اے واہشت کہ ما مزنیں روتاکانی تہا چھاپ بہ بئیں گڈاں تو وت بچار کہ جنگ او ڈان ءَ روچ ءِ تہا چنچو نبشتانک چھاپ بیت ءُُ تو گندے کہ نبشتہ کار ٹاپ ءِ نبشتہ کاراں کہ آہاں وتی سر گراستگ پہ نبشتہ ءِ پڑا۔
اگاں شما نبشتہ کاری ءِ پڑءَ گوں ہمگرنچ ءِ گراں اے گپ الم شمئے زہن ءِ تہا بہ بیت کہ نوک نوکیں چیزانی سرءَ نبشتہ بکن ءِ نوک نوکیں چیز دیم ءِ بیارات پہ چیا کہ بلوچستان ءَ نبشتہ کاری ءِ پڑ ھالی انت او سک کم نبشتہ کنگ بوتگ۔ شما چنکس کار کت کنے تحقیق کت بکنے۔ بلوچستان ءِ پٹانی پٹ ھالی انت۔ دومی نبشتہ کنگ ءِ ھاترءَ وانگ المی انت۔
وانگ ءَ چہ ابید نبشتانکانی تہا آ ساہ نہ بیت کہ آئی ءِ سوچ ءُُ شم ءَ دارات۔ تاریخ، سماج، سیاسیات، فلسفہ، ادب ہر رنگ ءِ کتابانی مطالعہ کنگ لازم انت۔ دنیا ءَ تو سرپد بوت کنے۔ تو ہمے چیزءَ سرپد بئے کہ دنیا ءِ ہمنچو نبشتہ کار استاں آہاں چوں کار کت ءَ وتی تخلیق دیم ءَ آرتگاں۔
ہمے چیزشما را راہ شونی دئینت ءُُ نبشتانکانی تہا نوکیں دروشم ءِ کارانت۔ وانگ ءَ گوں ہوار مشاہدہ کنگ ہم المی انت۔ مشاہدہ ترا یک نوکیں تخلیقے دات کنت۔ پدا گوش دارگ ءُُ مباحثہ کنگ کہ دگہ مہلوک اے سرھالانی سرءَ چے ھبر کن انت۔
اے دور ءَ معلوماتاں سر بوہگ انچو گران نہ انت کہ پیش ءَ بوتگ انوں ہر چیز تئی دسترس ءَ انت۔ بلئے اے تئی سرا انت کہ تو چے نبشتہ کنے پرچا نبشتہ کنئے! گڈاں شما وتی راہاں گیشینت کت کنے۔