زبان ہرقوم ءُُ راج ءِ ھاترا باز ارشت داریت زبان ایوک ءَ جزبگ ءُُ مارشتانی درشان کنگ ءِ وسیلہ نہ انت بلئے قومانی پجار ہم چہ زبان ءَ بیت۔ہمک ملک ءُُ ہمک قوم ءَ ماتی زبانے است انت ءُُ آ مے زبان ءِ پدا پجار بنت ماگشت کنیں کہ زبان چاگرد ءِ یک سوگاتے کہ وہد ءُُ زمانگ ءِ ہمرائی ءَ یک پدریچے ءُُ چہ دومی پدریچ ءَ سر بیت۔ بقول ءِ یک مردمے ءِ مردم ءِ یاداشت روچ بلئے آئی ءِ زبان بدل نہ بیت۔ آ وتی گواست ءِ درائیں وئیل ءُُ واقہاں شموشیت بحال کنت بلئے وتی زبان ءَ بحال نہ کنت،پمیشکہ زبان انسان ءِ بنکی حقانی تہا ہوار کنگ بوتگ۔

قومانی پجار گران بہائیں تہذیب ءُُ دودمانی میراث ءِ دروشم ءَ زبان دئیگ بوتگ۔ ہمے رنگ ءَ ہرراج وتی ماتی زبان ءُُ دودمان ءِ دیمروئی ءِ حاترا جتا جتائیں کتاب ءُُ ماہتاکانی دروشم ءَ وتی ماتی زبان ءَ دیمروئی ءِ نیمگ ءَ بان انت ءُُ آئی ءِ ارزشت ءُُ بستار ءِ بابت ءَ مہلوک ءُُ اے دگہ راجاں سرپدی دئیگ ءَ انت بلوچی زبان ءِ دیمروئی دئیگ ءُُ مروچی اے جاہ ءَ آرگ ءُُ سرکنگ ءَ ماہتاکان جوانیں کردے ادا کتگ ءُُ کنگ ءَ انت۔ بلوچی اولی ماہتاک اومان ءَ بگرداں مرچگیں تاک ءُُ بلوچ ی زند ءَ ہچبر شموشگ نہ بنت۔

پرچکہ ایشان ہردوئی ہمک وڑیں جارانی تہا جنز مہتل نہ داشتگ، ہچبر پہ اے کار ءِ کنگ ءَ بیزار نہ بوتگ انت۔ مدام پہ نبشتہ کنگ ءَ ورناہاں سکین دئیگ ءُُ ہمک ماہ یک نوکیں سرحالے ءِ سرا وتی ھیال ءُُ لیکہانی درشان کنگ ءِ موہ دئیگ چشیں کرد پہ وتی راج ءُُ زبا ءُُ دود ءُُ ربیدگ ءِ ھاترا ہچبر گار نہ بنت اگان مرچی اے ماہتاکانی واہندان اے گامگیج مہ زرتیں ءُُ مردمان نویسگ ءَ دلبڈی مہ داتیناں اے جہد برجاہ مہ داشتیں گڑا باریں مئے ماتی زبان کجا گار ءُُ بیگواہ بوتگ انت۔

زبانے ءِ دیمروئی دگئی ءُُ آئی ءِ کارانی گیشواری ءَ الم اِنت کہ تاک ءُُ ماہتاک دیم ءَ بیا انت ءُُ آوانی نبشتہ بوہگ الم اِن پرچکہ ہمے تاک ءُُ ماہتاکاں چہ یک عہد ءِ کار وابستگ انت کہ ہچ رنگ ءَ اایش ءِ ارزشت ءَ کس انکار کت نہ کنت۔پرچکہ ماوتی زبان ہمک زبان ءُُ لبزانک ءُُ گالوار ءِ تہا قومانی رسم ءُُ رواج، دودمان،ذہنی ءُُ روحانی تجربگ پیوست انت۔ پمشکہ گشنت اگاں یک قومے تبا کنگ لوٹ انت گڑا درستاں چہ پیش آئی ءِ ماتی زبان ءَ ہلاس کن ۔ گڑا ایش یءِ روایت،ایشی ءِ تہذیب، راجدپتر ءُُ رواجاں ہلاس بہ کن۔

مروچیگیں نوکٰں دور ءَ ماتی زبان ءَ تعلیم دربرگ انسان ءِ بنکی حق انت۔ سرجمین دنیا ءَ بنداتی تعلیم چہ ماتی زبان ءَ دئیگ بیت پرچاکہ چک ءِ ذہن ءِ تہا لبزانی ءُُ تعلیمی نظام ءِ نیام ءَ یک سبک ءُُ ارزانیں پہمے ودی کنت۔بلئے بژں انت کہ مروچی ہم مئے وانگ ءُُ زانگ ءِ نظام،آمیدگسی نظام ءُُ کار گسی نظام درست انگریزی ءُُ اردو زبان ءَ انت۔