واجہ اکبر غمشاد ؔ بلوچ، بلوچستان ءُُ بلوچی لبزانک ءِ پجّار اِتگیں ندکاراں زانگ بیت۔واجہ ءِ ند آئی ءِ ندکاری ءِ وت پجّار اِنت۔واجہ ءَ شاعری ءَ ھور رِدانکاری ءِ سرا گیش کار کرتگ کہ چہ بلوچی لبزانک ءِ وانوکاں چیر نہ اَنت۔منا اینچو ھاٹی نیست کہ واجہ اکبر غمشاد ؔ ءِ شاعری ءُُ آئی ندکاری ءِ سرا نبشتہ کرت بہ کنیں، بلے پدا ہم دِل ءَ اھت کہ واجہ ءِ ندکاری ءِ بابت ءَ وتی نِزوریں پِگر ءَ کار بگر ین، کمے وتی ندءِ ارمان ءِ پیلو بہ کنین، واجہ چہ منی پگر ءُُ ھیالاں بازبُرز ءُُ بالا تر اِنت۔

واجہ اکبر غمشاد ؔءِ بلوچی زبان ءِ ھب ءُُ واھگ چہ شاعر ءُُ ندکاراں اندیم نہ اِنت،ہمک بلوچ ندکار ءُُ شاعر زانت کہ اکبرغمشاد ؔ بلوچی لبزانک ءِ یک پُر ارزشتیں نامے،واجہ ءَ چہ نودربری ءِ زمانگءَ بلوچی وانگ ھیل کرتگ،منا یات اِنت کہ جنرل ضیاء الحق ءُُ مزن وزیر محمدخان جونیجو ؔ ءِ زمانگءَ کہ پہ پیرین ءُُ مزن عمریں مردماں ”نئی روشنی اسکول“ ءِ بِندات کنگ بوت تہ واجہ اکبرغمشاد ؔ ہما زمانگءَ اُستاد ات ءُُ وانینت یے ءُُ وتی ماتی زبان ءِ سکینے دات۔بزان کہ واجہ ءَ را چہ زمانگ ءَ گوں ماتی زبان ءَ ھب ءُُ واھگ بوتگءُُ گوں وانگ ءُُ زانگ ءَ باز ہمگرنچی ءُُ نزّیکی بوتگ۔

واجہ اکبر غمشاد ؔ ءِ اولی کتاب ”بلوچی کُہنیں شاعری“ بوتگ کہ مئی 1998ءَ چھاپ ءُُ شنگ بوتگ۔آ کتاب ءِ تہا واجہ ءَ باز جہد ءُُ مہنت کرتگ ءُُ نودربراناں رہشونی داتگ کہ علم ءُُ زانت ءِ سیمسراں سرپدبہ بنت۔ چہ کُہنیں شاعری ءَ زبان دوست ءُُ لبزانکاراناں باز نپ رستگ۔چہ کہنیں شاعری ءَ اسکول ءُُ کالجانی نودربراں باز سِکین زُرتگءُُ نپ حاصل کرتگ۔چہ بلوچی کُہنیں شاعری ءَ پد واجہ ءَ ایم فِل ءِ ھاتر ءَ جُہد بِنا کرت، ءُُ واجہ اے جُہد ءِ تہا کامیاب بوت ءُُ ایم فل یے آسر کرت، کہ آ بلوچی نوکیں نظم ءِ سرا اِنت۔

مزنیں سالے نیام ءَ گوست ءُُ شُت، واجہ گوم ءُُ گیگ بوت، پدا ایم فِل ءِ ہمے نِکان ءُُ سیاھگ کہ واجہ ءَ ایم فل ءِ دؤر ءَ پول اِتگءُُ مُچ ّ کرتگ اِتاں، ایشاناں کتابی دروشمے ءَ آرگ ءِ ھلکٹ ءُُ فیصلہ کرت کہ پہ بلوچی لبزانک ءَ نیکیں پالے زانگ بیت۔الحمدُللہ، مرچی بلوچی نوکیں نظم (نگد ءُُ پولکاری) منی ءُُ شمئے دستاں اِنت۔اے دِگہ یک مزنیں کُمکے بوت پہ بلوچی لبزانک ءُُ بلوچی زبان ءِ نودربر ءُُ وانوک ءُُ ندکاراں،اے کتاب باز پُرارزشتیں کتابے زانگ بیت، اُمیت اِنت کہ بلوچی زبان ءِ وانوک ءُُ ندکار چہ اے کتاب ءَ ”بلوچی نوکیں نظم“ ءَ گیش نپ ءُُ سیتّ چِست کن اَنت۔اے ”بلوچی نوکیں نظم“ واجہ اکبرغمشاد ؔ ءِ دومی کتاب اِنت کہ سال 2017 ءَ چھاپ پءُُ شنگ بوتگ،ایشی شنگکار بلوچی اکیڈمی کوئٹہ اِنت۔

بلوچی نوکیں نظم ءِ تہا واجہ اکبر غمشاد ؔ ءَ باز زھمت کشّی کرتگ ءُُ یک پزّوریں کتابے بلوچی لبزانک ءَ را شکساتگ یے۔(باید اِنت چہ اے کتاب ءِ پزّوری ءَ من ءُُ شُما نپ بہ زوراں)، اے کتاب ءِ تہا واجہ ءَ یک مزنیں پِگرے درشان کرتگ ءُُ دیما آرتگ، کہ زانت ءِ رہشونی کنونیں مردمانی بازبِستار ءُُ قدر درشان کرتگ۔زاہر اِنت وتی کُمک کنوکیں مردماناں مردم ہچ رنگ ءَ مہ شموشیت۔واجہ ءَ وتی استاد ءُُ وتی ہمگام ءُُ ہم پگریں سنگت ءُُ ندکارانی توسیپ ءُُ ستاء کرتگ کہ آہانی حق اِنت،بزان واجہ ھر ءُُ سُرمب ءِ واجہ نہ اِنت،بلکیں ھُشتر اِنت کہ دیدگے سک دُور سکّ اَنت، ءُُ مزن دلی ءِ پدّرائی ءَ کنت۔

بلوچی نوکیں نظم (نگد ءُُ پولکاری) چارسد ءُُ شست تاکدیم اِنت کہ ہر یک تاکدیمے پہ لبزانکار ءُُ نودربر اں چہ استادے ءَ کم تر نہ اِنت، شرط ہمیش اِنت کہ پہ دل ءُُ سِدک ، پہ ھب وانگ بہ بیت۔ ھورکیں سرسری وانگ بیدء وھد زوالی ءَ دگہ ہچ حاصل نہ بیت۔ ’بلوچی نوکیں نظم‘ ءِ تہا اکبرغمشاد ؔ ءَ نظم ءِ بابت ءَ پنچ در کارمرز کرتگ پہ وانوکانی آسانی ءِ ھاتر ءَ تاکہ وانوک گہتر سرپد بہ بنت ءُُ کجام در ءَ کہ وانگ لوٹاں پہ آسانی ونتے بہ کن اَنت۔

اولی در ءِ تہا نوکیں نظم ءِ سرءُُ بُن یا پُشدر ءِ بابت ءَ سرپدی رسیت کہ اے گپّ پہ وانوکاں الّمی اِنت یا کہ پہ لبزانکاراں الّمی اِنت کہ اینکس بزانت کہ نوکیں نظم ءِ سر ءُُ بُن چون ءُُ کدی بوتگ، اے بابت ءَ واجہ اکبرغمشاد ؔ وتی پولکاری ءُُ جکانسری ءِ تہا اے سرپدی ءَ دنت۔(برجاہ)