بلوچستان ءِ انوگیں حکومت ءَ بلوچستان ءِ ازمکارانی مالی کمک ءِ حاترا حکومت ءِ دود ءُُ ربیدگی بہر گءِ نیمگ ءَ یک گچینی فنڈے نامینتگ کہ آئی ءِ تہا دود ءُُ ربیدگ ءِ سیکریٹری واجہ ظفر بلیدئی ءِ مزنیں جہد ءُُ کوشتے ہوار انت۔ انوں بلوچستان حکومت ءِ حال شون واجہ ظہور بلیدئی ءِ یک ٹویٹے ءِ ردا اے حال دیم ءَ اتکگ کہ انوگیں حکومت ءَ بلوچی اکیڈمی کوئٹہ ءِ سالی گرانٹ ءِ تہا 5 ملین ءِ گیشی کتگ۔

اگاں اے راست ءُُ پکا انت گڈا انوگیں حکومت ءِ پہ بلوچی زبان ءِ دیمروئی ءَ یک سنگینیں گامگیجے کہ گلاہ ءُُ ستا کرزیت اے سدکیں ءُُ پکائیں گپے اے نیکیں کار ءَ میر ظہور بلیدئی ءِ مزنیں دستے ہوار انت۔ ظہور بلیدئی انوگیں حکومت ءِ وانندہ تریں بلوچ ءُُ بلوچی دوزائیں ورنایے کہ انوگیں دور ءِ جیڑہاں سرپد بیت ءُُ اشانی گشواری ءِ حاترا جہد ءَ انت۔

ظہور بلیدئی ءِ نیکیں واہگ ءُُ ارادگ ہما وہد ءَ گندگ بوت انت وہدے لہتیں بلوچ ءُُ بلوچی ءِ بدوائیں مردمانی نیمگ ءَ بلوچی اکیڈمی ءِ گرانٹ کم کنگ بوت انت۔ آ وہد ءَ ظہور بلیدئی حکومت ءِ یکیں مردم ات کہ آئی ءِ اے جیڑہ ءِ سنگینی مار ات ءُُ میر جام کمال ءَ سوجے دات کہ حکومت چرے گامگیج ءَ ملک ءُُ درملکی بلوچ کلمکار، شاعر، لبزانکار ءُُ لس بلوچ سک زہر ءُُ کہر انت پمشکہ میر جام کمال ءَ بلوچی اکیڈمی ءِ گرانٹ ءَ را کم کنگ ءِ حکومت ءِ سوڈگ مہتل داشت، انوگیں بجٹ ءَ بلوچی اکیڈمیءِ گرانٹ ءَ را ودینگ ءِ جار پرینتگ۔

پدریں گپے کہ اے گامگیج ءِ تہا سیکریٹری مالیات واجہ نورالحق بلوچ ءِ ہم مزنیں دستے پرچکہ نورالحق مڑاہ داریں بلوچ ءُُ بلوچی ءِ دوزوایے۔حکومت ءِ چرے گامگیج ءَ بلوچ نبشتکار، لبزانک کار شاعر ءُُ ایندگہ بلوچ سک وش بنت پرچکہ بلوچی اکیڈمی اے وہد ءَ درائیں دنیا ءَ بلوچی ءِ مستریں ادارگ انت کہ بلوچی زبان ءُُ لبزانک ءِ دیمروئی ءَ کار ءَ انت۔ اے درچ ءَ بلوچی اکیڈمی ءَ گوں وتی کسانیں گرانٹے ءَ بلوچی زبان ءُُ لبزانک ءِ دیمروئی ءَ مزنیں کارے کتگ بلئے فنڈ ءِ کمی ءِ سوب ءَ آئی ءَ بازیں کارے کت نہ کتگ کہ کنگی بوتگ انت۔ چوکہ بلوچی انگلش ڈکشنری، بلوچی براہوئی ڈکشنری، انسائیکلوپیڈیا بلوچستانیکا کہ آئی ءِ سرجم کنگ ءَ مزنیں فنڈے درکار بیت۔

اے وہد ءَ بلوچی اکیڈمی نیمگ ءَ بازیں سر ءُُ سوجی کاگدے ماں حکومت ءِ ادارگاں جم کنگ بوتگ انت بلئے تنگا حکومت ءَ اے درچ ءَ ہچ وڑیں گامگیج نہ زرتگ۔ بندر ءَ اے ہنچیں کارے کہ بیدء جتا ءُُ گستائیں فنڈاں بوت نہ بنت اے بابت ءَ ہم بائدیں بلوچستان حکومت جام کمال ءِ کماشی ءَ گامگیج بزور ایت۔

البت دمگی حکومت ءِ نیمگ ءَ اے وہد ءَ بلوچی اکیڈمی ءِ گرانٹ ءَ را گیش کنگ یک جوانیں کارے کہ بائدیں ایشی ءَ را ساڑاہگ بہ بیت اگاں ناں 5ملین چشیں مزنیں فنڈے نہ انت پرچکہ بلوچی زبان ءَ ایندگہ راجانی وڑا دگہ ہند ءُُ ملکاں لبزانکی گل نیست انت ءُُ بلوچی اکیڈمی یکیں ادارگ انت بائدیں اشیءِ گرانٹ اے وہد ءَ 10 کروڑ ءَ گیش بوت انت پرچکہ بلوچی اکیڈمیءَ دنیا ءِ درائیں بلوچانی لبزانکی ذمہ واری کوپگ ءَ انت اے بابت ءَ بلوچستان حکومت بائدیں چہ وفاقی حکومت ءَ لوٹ بکنت کہ آہم چہ وتی ربیدگی ءُُ علمی ءُُ ادبی فنڈ ءَ بلوچی اکیڈمیءَ سالے کم چہ کم 5کروڑ کلدار گرانٹ بدنت تنکہ بلوچی اکیڈمی ءِ کار پہ گیگ ءُُ گوم بہ بنت۔

دومی گپے اے ہم گشگ کرزایت کہ حکومت بائدیں حقی ئیں اکیڈمیانی نیمگ ءَ دلگوش بہ کنت۔ مردمانی ذاتی نپ ءُُ سیتی یا ڈمی اکیڈمیاناں ایر جنگ بہ بیت۔ہما اکیڈمی کہ یک یک مردمے ءِ نام ءَ انت یا آہانان جوڑ بوہگ ءَ 5سال نہ بیت بائدیں آہانی دلبڈی کنگ بہ بیت اے درچ ءَ بائدیں ہما اکیڈمیانی دلبڈی کنگ بہ بیت کہ آہاں 10یا15 سال بیت کار ءَ انت ءُُ گروہی ءُُ ذاتی نپ ءُُ سیتانی بدل ءَ زبانءُُ لبزانک ءِ دیمروئی ءَ کار ءَ انت۔ اے وڑیں اکیڈمی کہ آہاں دیریں کار ءَ انت دمگی حکومت بائدیں اشانی حاترا ہم جوانیں فنڈے ءِ جارءَ بجنت، تنکہ اے اکیڈمی زبان ءُُ لبزانک ءِ دیمروئی ءَ وتی بہر ءَ دات بکن انت۔