گوستگیں روچاں آئی۔ سی۔ایس۔ آئی۔ ڈی (عالمی بینک ءِ پنچ گروپانی یک گلے) ءِ نیمگ ءَ حکومت ءَ پاکستان ءَ را گوں ٹیتھیان کمپنی ءَ منگ نامہ ءِ مہتل کنگ ءَ 6 ارب ڈالر ءِ ڈوہ دار کنگ بوتگ ریکوڈک ءِ منگ نامہ 1993 ءِ اداروکی حکومت ءَ معین قریشی ءِ کماشی بندات کتگ ات اے ہما دور ات کہ چین گوں عالمی جیڑہاں گستا ءُُ یکر ءُُ وتی تہی گش ءُُ مانگشانی گشواری ءَ دزگٹ ات ءُُ دومی نیمگ ءَ زرباری ایشیا ءَ طالبان نوکی وتی سرءَ چست کنگ ءَ ات انت۔

بلئے وہدے2001 ماں افغانستان ءَ امریکہ ءِ کماشی ءَ طالبانانی حکومت ہلاس کنگ بوت ءُُ امریکہ تچک ءَ افغانستان ءَ جاہ منند بوت ءُُ چین ءَ را ماں دنیا جیڑہاں دزمانجنیءَ ایوک ءَ بیست سال ءِ کسانیں مدتے پکار ات بزاں پہ چین ءَ نوں 2020 بیت دور نہ ات (چین ءَ 1991خلیج ءِ جنگ ءَ وہد ءَ جارپرینتگ ات کہ داں 2020 ءَ دنیا ءِ جیڑہانی تہا دزمانجنی نہ کنت)پدا2006 ءَ وہدے ٹی سی سی کمپنی ءَ وت ءَ را پاکستان ءَ رجسٹرکت گڈا چین چم دراتک انت کہ طالبانانی درکنگ ءَ پدامریکہ افغانستان ءَ نشتگ ءُُ زرباری ایشیا ءِ سیاسی آکبت ءِ واہندی ءِ واب ءَ گندگ ءَ انت ءُُ دومی دست ءَ اے دمگ ءِ مستریں سہر ءُُ نگرہءِ کہن ءِ واہندی ءَ پد معاشی سرشون ءَ معاشی واہندی ءِ واہگ دارانت پمشکہ چین سیندک ءِ پروجیکٹ ءِ وڑا حب ءَ گدر کاپراینڈ گولڈ پروجیکٹ ءُُ ایشی واہندی سوڈگ کت ءُُ پاکستان ءِ حکومت ءَ پہ حیلہ ءُُ بہانہ ریکوڈک ءِ پروجیکٹ ءَ را وتی دست ءَ آرگ ءَ پنت ءُُ شون کت۔

ہمیشی ءِ پشدر ءَ سی پاک ءِ نام پاکستان ءِ یک گچینیں دمگے ءَ دیمروئی ءِ کارانی کنگ اے دمگ ءَ چہ ملک ءِ ایندگہ دمگاں گیشتردیمروئی ءِ دئیگ سوڈگ کنگ بوت۔ ہمے لالچ ءَ بنجاہی حکومت ءِ واکدارکہ آہانی سیادی گوں ہمے گچینی دمگ ءَ ات بلوچستان ءِ مادن ءُُ مال ءُُ ملکتانی سودا جنگ بوت پدا رئیسانی حکومت ءِ زمانگ ءَ اے منگ نامہ ءَ پہ زبردستی چہ ٹیتھیاں کمپنی ءَ پچ گرگ ءِ پندل سازگ بوت ءُُ ایشی ءَ بلوچستان ءِ حکومت ءَ نام ءَ نامینگ بوت۔ریکوڈک ءِ کار اگاں ٹیتھیان کمپنی بہ کرتیں یا چو سیندک ءِ وڑا چین ءَ بلوچ ءِ نان کہ کپے ات، آ یکے نہ بوت اے بابت ءَ مستریں زلم ءُُ ناروائی ءِ اے دیم ءَ اتکگ کہ سیندک پروجیکٹ ءَ بلوچستان ءَ 2درسد ہم رسگ ءَ نہ انت دراہ بنجاہی حکومت ءَ رسگان انت گوستگیں روچاں بنجاہی حکومت ی ءِ نیمگ ءَ اے حال دیم ءَ اتکگ کہ اے 6 ارب ڈالراں بلوچستان حکومت بدنت اے گوں بلوچستان ءِ مہلوک ءَ مزنیں ناروائی یے۔

گپ ایش انت اگان اے وڑیں ڈوہ داری جنگ مہ بوت انت ءُُ ریکوڈک چو سیندک پروجیکٹ ءَ چین دست ءَ دیئگ بوت انت گڈا بلوچستان ءِ بہر2درسد ءَ گیش بوتگ ات؟ اگاں ناں؟ گڈا ڈوہ داری ءِ بلوچستان ءِ بہر 100 درسد پرچہ؟ بژن ءُُ افسوس ءِ گپ انت کہ بلوچستان ءِ اسمبلی نشتگیں پارٹی بہ بنت، قومی اسمبلی ءُُ سنیٹ ءَ نشتگیں راج دوست کسی گوش ءَ مورے نہ وارت کہ اے گپ ءُُ گوں بنجاہی حکومت ءَ بکن انت کہ دئیگ ءِ وہد ءَ بلوچستان ءِ بہر01 درسدے بلئے گرگ ءِ وہد ءَ گوں بلوچستان ءَ ناحقی 100 درسد انت۔