وہدے کدیمیں تہذیب، ساز ءُُ اوزاراں گند ئےِ گڈا ارزانی ءَ گشت کنئے کہ تہذیب ءَ گوں زانت ءُُ زانگ ءَ ہچ وڑیں سیادی یے نہ بوتگ۔ بلوچستان ءَ کوہنءُُ کدیمیں انچیں ساز ءُُ ازار دست کپ انت کہ مردم اجب حیران بیت۔ بلوچستان ءِ دریا وردی بند ءُُ دمگاں استیں کدیمیں ساز ءُُ ازبابانی بابت ءَ ہچ وڑیں جست ءُُ پرس پٹ ءُُ پول نہ بوہگ ءِ سوب اے سانانی بابت ءَ زانگ وت یک حیرانی ءِ حبرے پدر کنت۔بیست سال پیسر وہدے من چہ وتی میتگ ءَ لڈا ت ءُُ دیم پہ پسنی ءَ جامنند بوتاں۔ چہ وتی میتگءَ کمو دور یک قبرستانے دیست بلئے کسانی ءَ مارا لوگ ءِ مردماں پمشکہ اے قبر ستان ءِ کش ءُُ کرا روگ نیشت کہ اشانی گمان ءَ اے قبرستان چہ جن ءُُ جاتیگ ءَ پُرانت۔

گوست ءَ کساس لہتیں مردماں گوں اے میتگ نوں ہزارانی کچ ءَ اِنت اے بازار چہ قبرستان کمو گستا اِنت۔ گوں گنجیں مردمانی گیشی ءَ نوں اے قبرستان آوڑ ترسناک نہ انت پرچکہ نو چہ قبرستان ءَ کمو گستا مہلوک جامنند انت۔ برے برے چہ وتا شزار باں،سک ملور باں گڈا دیم پہ ہمے قبرستان ءَ رہادگ باں ءُُ ہمی وسوس ءَ باں کہ باریں اے راجدپتری قبرستان ءَ چون انت کہ وش واب انت۔

پسنی ءِ زرباری روایرنشتی میتگ ببرشور یک مزنیں کوہے کہ جامنندیں مردمانی دپ ءَ دیگان ءِ نام ءَ مشور انت دیگان چہ بلوچی دولبز ءَ درتکگ ”دیھ“ ءُُ ”گان“اشی بزانت جن ءُُ جاتیگانی جاہ۔اے بابت ءَ میتگ ءِ مردمانی گشگ کہ انت اے جنانی جاگہ بوتگ۔ دیگان کوہ ءِ ہمے تلار دیم ءَ اے راجدپتری کوہنین قبرستان انت۔ اے قبرستان ءِ بابت ءَ جست ءُُ پرس پٹ ءُُ لوٹ ءَ چہ زانگ بوت کنت۔ اے میتگ ءِ مردمانی وس ءَ ڈن انت۔

اے قبرستان چہ پسنی ءِ اندیگہ قبرستاناں جدا انت۔ ایشی قبر نقش ءُُ نگار اکتگ ءُُ جوڑ کنگ بوتگ انت۔چہ اے نقش نگاریں قبراں جنین مردین ءُُ چکانی قبر است انت۔ لہتین ءِ گشگ انت اے قبر شانزدہمی کرن ئیگ انت ءُُ کلمتی ٹک ءِ مردمانی ئیگ انت کہ آ وہدا ہمدا جامنند بوتگ انت پرچکہ راجدپتر ءَ چہ اے پدر انت شانزدہمی کرن ءَ پسنی ءَ چہ 70 کلومیٹر دور کلمت ءِ حمل جئیند ءِ گوں پرنگاں جنگ بوتگ۔ میر حمل اے جنگءَ بے سوب بیت۔

پرنگ پہ لوٹ ءُُ پل ءَ مکران ءِ زرباری بند ءَ کاانت۔ پرنگانی دیم ءَ دیمی گوں حمل جئیندءَ بیت۔ بلوچ راجپدتر ءِ جوانیں پٹ ءُُ پولکار واجہ حمید بلوچ ءِ گشگ انت ”دیگان“ ءَ استیں قبرستان شانزدہمی کرن ءِ کلمتی ٹک ءِ بوت کن انت پرچکہ اے وہدا پسنی ءَ بس کلمتی جامنند بنت۔

انگت اے قبرانی بابت ءَ ہرچ وڑیں ہشکتگیں حبر کہ دیما اتکگ اشاں چہ یک جوانیں حبرے ہمش انت کہ شانزدہمی کرن ءِ کلمتی ٹک ءِ بوت کنت۔ اے دابیں یک قبرستانے کراچی ءَ چہ پیسر حب بلوچستان بھوانی ءَ است انت۔ اے بابت ءَ پٹ ءُُ پولکرانی گشگ انت حب ءِ است ایں قبرستان کلمتی ٹک ئیگ انت حبداہمی کرن ئیگ انت۔
پسنی ءِ دمگ ”دیگان“ ءَ ابید دگہ ہچ جاگہ کش ءُُ گوراں چش راجدپتر ی قبر ءَ جاگہ دست نہ کپ ایت۔

پسنی ءِ ”دیگان قبرستان ءِ سنگ نقش ءُُ نگار کتگ ءُُ اڈ کتگ انت۔ اے درائیں سنگ پسنی ءِ ”زرین“ ءُُ چہ پسنی 60 کلو میٹر یک کر ”شمال بندن“ ءِ کوہ ءَ چہ دست کپنت۔ اے اوں گمان کنگ بیت کہ اے سنگ چہ زرین ءُُ شمال بندن ءَ آرگ بوتگ انت ءُُ تراشتگ ءُُ نقش نگار کنگ بوتگ انت۔ چریشی ہمے پدر انت اے سنگ تراشی ءَ سک باز بلد بوتگ انت۔زندگیں راج وتی کوہن ءُُ کدیمی تہذیب ءُُ آثاراں رکین انت ءُُ داں آوکیں پدریچ ءَ وتی کوہن ءُُ کدیمیں آثار ءُُ دود ربیدگ ءَ سرپدبہ بیت چوکہ ”دیدگان“ کوہن ءُُ کدیمیں راجدپتری قبرستانے باہد انت ہرچ وڑا پہر یزگ بہ بیت۔