پاکستان ءِ مزن وزیر عمران خان 21 داں 23جولائیءَ امریکہ ءِ تروتاب ءَ شتگ ات۔ عمران خان ءِ اے تروتا ب امریکہ ءِ کماش ڈونلڈٹرمپ ءِ لوٹکی ءِ سرا بوتگ ات۔ پاکستان ءِ رسانک در ءِ ردا اے یک سوب مندیں تروتابے بوتگ کہ سویت یونین ءِ حلاپ ءَ افغان جنگ ءَ پاکستان ءِ کرد ءُُ امریکہ ءِ نیمگ ءَ طالبانانی حکومت ءِ پروش دئیگ ءَ پد امریکہ ءِ گوں پاکستان ءَ سیادی توسیپی نہ بوتگ انت۔

گوستگیں 5 سالاں کہ پاکستان ءِ مالیات سک پدمنتگی ءِ آماچ بوتگ بلئے امریکہ ءَ یکشل ءَ افغانستان ءَ طالبانانی چست ءُُ ایرانی بہتام پاکستان ءِ سرا مشتگ انت امریکہ ءَ پاکستان ءَ را گشتگ کہ”دلبرے نہ انت“ پاکستان ءَ امریکہ ءَ را شگانے جتگ کہ دلدارے نہ انت“۔ میانی ایشیا ءَ جاورانی بدلی ءَ سعودی عرب ءِ نیمگ ءَ پاکستان ءَ مزنیں دلبڈی رستگ ات۔ اے ساہت ءَ وہدے عمران خان امریکہ ءِ تروتاب ءَ شتگ ات میان ءَ دومزنین جیڑہ ودی بوتگ انت یکے امریکہ ءِ جند ءِ چہ افغانستان ءَ روگ ءُُ دومی امریکہ ءِ دیریگیں دشمن ایران ءَ را سبقے دئیگ۔

گوستگیں دہ سالاں امریکہ ءِ مانگیشگ ءِ پشت ءَ گوریچانی کوریا ءِ گہگیری ءُُ مزن مری ات بلئے گوستگیں سال ءَ امریکہ ءِ گردن ءَ گوریچانی کوریا توک سستگ پمشکہ امریکہ نوں گوں ایران ءَ دیم پہ دیم انت بلئے امریکہ ءِ گشاد ہنچش انت کہ اے رندی امریکہ تچک ءَ گوں ایران ءَ دچار نہ وارت بلکیں وتی یورپی ہم پتاں ساری کنت کہ آئی ءِ کماشی برطانیہءَ دئیگ بیت بلئے چوکہ حاکمی ءُُ حکم امریکہ ئیگ انت پمشکہ ءَ آوت ءَ چرے ارش ساری دمگ ءِ ایندگہ جیڑہاں وت ءَ گیشنگ ات۔ ادا یک گپے گیر آرگی انت کہ اگاں امریکہ ءَ ایران ءَ سبقے دئیگی انت گڈا گنوک انت کہ افغانستان ءَ یلہ دنت ءُُ روت، اگاں افغانستان ءَ نندگ لوٹ ات گڈا چیا؟ اگاں آئی ءَ ایران ءِ سرا ارش کنگی انت گڈا افغانستان ءَ ہوار آئی ءَ پاکستان ءِ سرزمین ہم پکار بیت پرچکہ اے وہدے ایران مستریں سرحد ءُُ سمیسر گوں پاکستان ءَ ہور کپ انت۔

ترکیءِ چہ روس ءِ نیمگ آئی ءِ ڈیفنس سٹم 400 زورگ ءَ پد امریکہ ءُُ ترکہ سیادی دل ءِ تب ءَ نہ انت ءُُ اگاں امریکہ ءُُ ترکی ءِ سیادی دل ءِ تب ءَ نہ انت دومی اگاں امریکہ ءَ ایران ءَ سبقے دئیگ ءِ سوڈگ کتگ گڈا لوٹ ات کہ اے دوران ءَ طالبان آئی ءَ افغانستان ءَ کنتی مکن انت ءُُ طالبانانی دارگ ءِ پشت ءَ مستریں دست پاکستان ءِ بوت کنت۔ ہمے درچ ءَ امریکہ پاکستان ءِ نوکیں مالیاتی جاوراں سہی ءُُ سرپد انت۔

اگاں پاکستان ءِ طالبانانی دارگ ءُُ ایران ءِ بدل ءَ سعودی عرب ءِ مقدسیں جاہ ءُُ دیارانی رکینگ ءِ سوڈگ کت گڈا یکبرے پدا داں دہ سال ءَ پاکستان ءِ مالیات ءَ نواز ءُُ بھٹو کہول ءِ پشنءِ زرانی زلورت نہ بیت بلکیں نوکیں دہ سالاں دگہ دو نوکیں کہول پاکستان ءِ سیاست دیمروئی بکنت ءُُ برو انت۔

نیازی ءُُ ترین،بلئے ادا گپے پاد کیت نوں اے نوکین رودم چو ہالو ہالو نہ بیت پرچکہ ایران افغانستان نہ انت ءُُ پاکستان ءَ شیعہ ٹک چہ پاکستان ءِ کمیونسٹاں گیش زوراو ءُُ محکم ترانت پمشکہ پاکستانی راج ایوک ءَ ڈونلڈ ٹرمپ ءِ توسیپ ءُُ گلاہگاں کروت کہ امریکہ ءَ گپے جتگ کہ کشمیر ءِ جیڑہ ءِ آسلاہ کارے بہ بیت گپ ایش انت کہ امریکہ ءَ گپ مدام جتگ ءُُ مدام بھارت ءَ گشتگ کہ اے بھارت تہی جیڑہ یے، پمشکہ اے نوکیں گپے نہ انت دومی گپ ایش انت کہ مزن وزیر ءِ امریکہ ءِ دورہ ءَ پد پاکستانءِ ماں جہان ءَ ایوکی لیکہ ہلاس بوتگ اے گپ ءِ سرا چارگی انت کہ آ پہ ہمے کار ءُُ کرد ءَ امریکہ ءَ وت پاکستان اے جاوراں نیاورتگ ءُُ سر نہ کتگ؟