گوستگیں روچاں دو انچیں حال سر بوت کہ ایشانی سبب ءُُ علتّانی باروا من جیڑ ات بلئے نہ زانت کہ ایش پہ ما نف انت یا کہ تاوان۔ نف اے واسطہ کہ مرچی ٹیکنالوجی دیما روان انت۔ رسانک دری ءِ وسیلہ گیشتر ءُُ نوک تر بوہان انت گڈا ریڈیو وڑیں شنگ کاری وسیلہ ءَ کئے گوشداریت۔ٹی وی، انٹرنیٹ، فیس بُک ءُُ ٹوئیٹروڑیں نوکیں ٹیکنالوجی ءَ ریڈیو ہمنچو پُشت ءَ دور داتگ کہ حال ایش انت۔

مرچی بی بی سی ریڈیو ءَ چہ گیش ویب سائیٹ ءُُ انٹرنیٹ ءِ وسیلہ ءَ گوشدارگ ءُُ چارگ بیت۔ من گپ ءَ اِتاں کہ منی دیما دو حال گوستگ ات، اے دوئیں حال ہم ریڈیو ءِ باروا اتاں۔ اولی حال ایش ات کہ ریڈیو پاکستان ءِ مالی جاور ہمنچو نگیگ ءُُ نزور انت کہ وتی ازباب ءُُ اوزاراں بہا کنگ ءَ انت۔ ایشانی نیلامی ءِ اشتہار دیگ بوتگ ءُُ دومی حال ایش ات کہ دیر انت ریڈیو پاکستان گوادر ءِ بندات کنگ ءِ چن ءُُ لانچ ءِ ارادہے کنگ بوتگ بلے آ واہگ تنیگت ءَ پیلو نہ بوتگ۔ ایش ءِ سبب منی حیال ءَ ہمے مالی نزوری انت یا وَ ایش کہ مرچاں ریڈیو کئے گوشداریت۔

من ءَ یات انت من وہدے کسان اتاں ہر وہد ءَ وتی پت ءِ دست ءَ ریڈیو دیست کہ شپ ءِ ہفت بج ءَ بہ گر تاں نو بج ءَ آئی ءِ توار مئے گوشاں کپت۔ اولی سرا بی بی سی ہندی ءُُ پدا بی بی سی اردو ءَ ہندوستان ءُُ پاکستان ءِ حال ہمک ہلک ءُُ دمگاں ہمے ریڈیو ءِ وسیلہ ءَ سر بوت انت۔ مرچی چوشکہ موبائل ءُُ انٹرنیٹ مئے ہرچ ہلک ءُُ دمگاں سر بوتگ پمشکہ ریڈیو گوشدارگ ءِ دود نزور ترّان انت۔ ایوکا ہما مردم ریڈیو گوشداریت کہ آ مزن عمرءِ مردمے یا ہما ہلک ءَ کہ موبائل نیٹ ورک انگت ءَ سر نہ انت۔

ریڈیو اولی رسانک دری میڈیم (وسیلہ) ات کہ ہژدہمی کرن ءَ دیما اتکگ ات۔ گراہم بل ءِ ٹیلی فون ءُُ پدا مارکونی ءِ 1896ءَ ریڈیو ءِ ایجاد ءَ حال رسانی ءِ نوکیں دَر پچ کت انت۔ اے ریڈیو ءِ کمال ات کہ میان استمانی جنگ ءَ انگلستان ءُُ ایندگہ واکداریں راجاں جنگ ءَ سوب مندی رست ءُُ آ دنیا ءِ حاکمیں ملک بوت انت۔ 1922ءَ برٹش براڈکاسٹنگ کمپنی (بی بی سی) ءَ ریڈیو ءِ مراگش بندات کت انت گڈا ایش ماں ریڈیو ءَ حال رسانی ءِ بنگیج ات ءُُ پدا دنیا ءِ ایندگہ ملکاں ہم ریڈیو اسٹیشن پچ کنگ ءُُ احوالکاری ءِ بندات بوت۔ ریڈیو ءَ چونیں پندے بُرّ یتگ ءُُ مرچی کجا سر انت ایشی ءِ یک مزنیں دپترے کہ ادا بیان کنگ دراج کش بیت بلئے حیر۔۔۔

بلوچی لبزانک ءِ بندات کہ چہ ریڈیو ءَ بیت ءُُ مئے لبزانک ءِ ردوم ءَ ریڈیو ءَ مزنیں کردے پیلو کتگ۔ بلوچی لبزانک کہ 1950ءِ دہک ءَ نوکیں دابے ءَ بندات بیت گڈا ایشی ءِ اولی وسیلہ ریڈیو بیت۔ بلوچی زبان ءَ مراگش چہ 1949ءَ ریڈیو پاکستان کراچی ءَ بندات بنت ءُُ پدا ہمے مراگشانی سبب ءَ تاک ءُُ ماہتاک شنگ بنت۔

اے گپ ءَ خیر محمد ندوی چوش بیان کنت کہ وہدے ما لوٹ ات کہ ریڈیو ءَ بلوچی مراگش ہم بہ بیت گڈا مارا جست کنگ بوت کہ بلوچی ءَ نبشتہی تاک ءُُ ماہتاک است؟ مئے گورا ہچ پسو نیست ات پرچا کہ آ وہدءَ چوشیں تاک ءُُ ماہتاک نیست ات کہ بلوچی چھاپ بہ بیت گڈا ما ہرچیز پہ ریڈیو ءَ پیش کنگ ءَ نبشتہ کت آ ماہتاک اومان ءَ چھاپ کت انت۔ گشگ ءِ مطلب ایش کہ اگاں ریڈیو ءَ بلوچی مراگش بندات مہ بوتین انت گڈا بلکن ءَ بلوچی لبزانک اے وڑیں دروشمے ءَ مئے گورا مہ بوتیں ءُُ نئیکہ چوش دیمروئی بہ کرتیں۔

مرچی مئے ملک ءَ ریڈیو ءِ حال ادا سر بوتگ کہ آئی ءِ واکدار ریڈیو ءِ ازباب ءُُ اوزاراں نیلامی ءَ بزاں کباڑی ءَ بہا کنگ ءَ انت۔ ہمے درگت ءَ روتاک جنگ ءَ حال شنگ انت کہ گوادر ءَ ریڈیو ءِ نوکیں اسٹیشنے پچ کنگ بوئگ ءَ انت بلئے اے دیریگیں کسّہے۔ گوستگیں سرکار ءَ مالی سال 2016-17ءِ بجٹ ءَ گوادر ءَ یک ریڈیو اسٹیشنے ءِ پچ کنگ ءِ جار جتگ ات، پریشی ءَ پی وی ون ءُُ زمین ہم زورگ بوتگ۔

بلئے چو گوادر ماسٹر پلان ءِ وڑا تنی وہدی اے ریڈیو اسٹیشن ءِ ہچّ وڑیں گواہی نیست۔ گوادر یک نیمگے پاکستان ءُُ چائنا ءِ نیام ءَ صنعتی دیمروئی ءِ مزنیں وسیلہے قرار دیگ بوئگ ءَ انت بلئے زمین ءِ سرا چوشیں ہچ وڑیں چیز گندگ ءَ نئیت کہ مردم بہ گوشیت کہ گوادر باندات ءَ یک دیمروئی کنوکیں شہرے جوڑ بیت۔ نزاناں کہ گوادر ءَ ریڈیو اسٹیشن پچ کنگ بیت یا آئی ءَ ساری ملک ءِ جند ءَ ریڈیو پاکستان ءِ نام ءُُ توار گار بیت۔۔۔۔