پاکستان دنیا ءِ ہما ملکاں ہوار انت کہ اودا گراکءُُ چزانی کارمرزکنوکیں مردمانی ارزشت ءُُ بستارے نیست اگاں کہ پاکستان ءِ آئین ءَ اے گپ تچک انت کہ بیپاری مردم ءُُ کمپنی گراکانی زرت ءُُ زور ءِ ذکت ءُُ آٹیگ ءَ ہوار آہانی دلبڈی،سدکی ءُُ دل ایمنی ءِ حیال ءَ بکن انت کہ ہچ کمپنی ءُُ بیپاری ءَ اے حق نسیت انت کہ آ وتی گراکءَ بُدروہ انت ءُُ بہ ریپین انت یاآئی ءَ دگہ چزے ءِ نام ءَ دگہ چزے بہا بدئینت پمشکہ دنیا ءَ ہر چز ءِ سرا آئی ءِ تہا ہواریں چزانی نام نبشتہ کنگ بنت،آئی ءِ سنگ ءُُ ہلاسی ءِ ماہ ہم نبشتہ کنگ بیت بلئے پاکستان ءَ ہچ گراک ءَ را اے حق ءُُ مز دئیگ نہ بنت ہمے حال پاکستان ءَ بازیں کمپنی انت کہ مہلوک یا آہانی ساز ءُُ ساماناں کارمرز کنوکیں مردماں تچک ءُُ راستیں سرپدی نہ دئینت اشانی کار ایوک ءَ مہلوک ءِ لٹ ءُُ پل کنگ انت۔

اگاں کانود برجاہ داروکیں واک دار کہ یک چورہ یے ءَ پہ یک نانے ءِ دزی ءَ سالانی جیل ءُُ ایندگہ سزا دئینت بلئے دوا جوڑ کنوکیں کمپنی بہ بنت یاموبائل سروس دیوکیں کمپنی بہ بنت اے سالے چہ مہلوک ءَ ارباں کلدار دزانتءُُ اے یک شل ءَ مہلوک ءِ لٹ ءُُ پل ءَ دزگلائش انت بلئے حکومت ءِ نیمگ ءَ مہلوک ءِ حال پرسی ءِ ہچ وڑیں گامگیجے زورگ نہ بیت۔ ایشی ءِ مستریں درورکیچ ءَ موبائل سروس ئیگ انت۔اے گپ ءَ وانوک سہی ءُُ سرپد انت کہ کیچءَ موبائل ڈیٹا(انٹرنیٹ) سروس چہ 2011 ئیگ انت کہ بند انت اے بابت ءَ نوں کیچ ءِ مہلوک دل ایکم انت۔

کہ کیچءِ گوستیگں وزیراعلیٰ بہ بیت یا انوگیں نوکیں وزیر ءُُ گزیر کیچ ءِ انٹرنیٹ ءَ پچ کنگ اشانی دست ءُُ وسی گپے نہ انت بلئے نوکیں نوبت ءَ ماہ یے بیت کہ کیچ ءَ موبائل سروساں کاریلہ داتگ۔ کیچ ءِ مہلوک ءِ مزنیں بہرے گلف ءُُ مز ن ہور ءِ ایندگہ ملکاں جہہ منند انت کہ آہان روچے ہزار برا پہ کیچ ءِ جاہ منندیں مردمان کار کپ ایت بلئے موبائل سروس ءِ نہ بوہگ ءِ سوب ءَ آسک تکانسر ءُُ پریشان انت موبائل سروسانی مہربانی ءَ کیچ ءِ مہلوک نوکیں تکانسری یے ءِ آماچ انت، آ ایش انت کہ اودا اگاں تویکے مردمے فون کنئے گڈا تئی فون دگہ مردمے ءِ نمبر ءَ روت ءُُ باز براں تو فون نہ کتگ بلے چہ تئی ٹیلی فون ءَ دومی ءَ فون روت باز براں میسج ہم روت ءُُ اگاں تو یکے ءَ میسج کتگ گڈا میسج آئی ءِ بدل ءَ دگہ مردمے ءَ شتگ، موبائل سروسانی چرے ناشریاں کیچ ءَ باز یں جھگڑا ءُُ داوایے بوتگ ءُُ بازیں مردمانی میان ءَ نارازی ودی بوتگ۔اگاں اے درچ ءَ را دارگ نہ بوت گڈا اے کیچ ءِ مردمانی میان مزنیں ناتپاکی یے ودی کنت۔

دومی گپ ہما پیش ئیگ انت کہ تو درائیں روچ موبائل ءَ نمبر بجن کسی نمبر نہ لگ ایت۔موبائل سروساں گوں مہلوک آسودگی ءُُ سہولتاں گوں ہچ وڑیں سرءُُ کارے نیست پرچکہ آہانی کار مہلوک ءِ لٹ ءُُ پل کنگ نہ انت بلئے کیچ ءَ اے وہد ءَ وفاقی ءُُ صوبائی شش وزیر است انت اے پرچہ ہچ نہ گش انت کہ اشانی پونز ءِ چیر ءَ اشانی مہلوک موبائل کمپنیانی دست ءَ وار ءُُ ذلیل انت۔اگاں مہلوک ءِ اے جہگیراں چہ موبائل کمپنیانی نیمگ ءَ کمیشن رس ایت وت شر انت بلئے اگاں اشاں ہچ نہ رس ایت گڈا بائدیں قومی ءُُ صوبائی اسمبلی ءَ ہوار سنیٹ ءَ توار بہ جمب ایت کہ”اے موبائل کمپنیاں! کیچ ءِ مہلوک ءِ میار ءُُ گناہ ءَ چے انت؟“