گوستگیں ماہ ءَ سکریٹری ایجوکیشن ءَ بے جست ءُُ پرسءَ 114 ٹیچراناں چہ وانگ ءُُ زانگ ءِ بہرگ ءَ درکتگ ات۔ ضلعی ایجوکیشن آفیسر ءِ ردا اے ٹیچروتی پوسٹانی سرا حاضر نہ بوتگ انت وہدیکہ وطن ٹیچر ایسوسی ایشن ءِ جہگیرانی گشگ ایش انت کہ 114 ٹیچرانی تہا بیران ءُُ ریٹائرڈبوتگیں ٹیچر ہم ہوار انت اگاں ضلعی ایجوکیشن آفیسر ءَ اے ریٹائرڈ ءُُ بیران بوتگیں ٹیچر نچارتگ ءُُ پولکاری یے ءَ ابید درکنگ ءِ سفارش کتگ ات گڈا بائدیں سکریٹری ایجوکیشن چار ءُُ ٹپاسے بہ کت انت بلئے سکریٹری ایجوکیشن ءَ بید ءِ چارءُُ ٹپاس ءَ یکمشتءَ اے درائیں ٹیچرءِ بیروزگار کتگ انت۔

اے بابت ءَ کیچءَ ٹیچرانی ایسوسی ایشن بہ بنت،سیاسی ءُُ چاگردی پارٹی بہ بنت، درستانی گشگ انت کہ باپ حکومت بلوچستان ءَ سرکاری ملازماں چہ نوکریاں فارغ کنگ ءِ یک منصوبے ءِ سرا کارکنگ ءَ انت تنکہ بلوچستان ءَ پہ حکومت ءَ گیش بجٹ بچارینگ ءُُ سرآرگ بہ بیت تنکہ بلوچستان ءِ اے سال ءِ بجٹ ءِ مستریں بہرے لیپس کنگ بہ بیت ءُُ آ ملک ءِ برزی طاقت ءُُ قوتاں اے باور بکنائین انت۔

کہ حکومت ءِ انوگیں نمائندہ ءُُ جہگیر چہ لس مہلوک ءَ گیش مزنیں واکدارانی منوگر ءُُ پد گیر انت پمشکہ کیچ ءَ114 ٹیچرانی کشگ ءَ پد دومی دست گوادر ءَ جنگ بوتگ کہ اودا جیڈا ءِ 34 ملازماناں درکنگ بوتگ۔اے درگت اپوزیشن پارٹیانی گشگ ایش انت باپ حکومت انگت چہ بازیں محکمہاں بازیں ملازمے درک کنت۔ اے درگت ءَ اگاں گوستگیں ماہ ءَ 114 ٹیچرانی درکنگ ءَ پد حکومتی گامگیج چارگ بہ بنت۔

گڈا مکران ء َ باپ ءِ یک وفاقی ءُُ چار صوبائی وزیر ءُُ ایم پی آنی ہچ کردے گندگ نہ بیت چریشانی گامگیجاں درا بیت کہ اے وہد ءَ بلوچستان نیشنل پارٹی ءُُ این پی راست گش انت کہ پہ باپ ءِ نوکیں حکومت مہلوک ءِ بیروزگار کنگ دلاپ ءُُ دلمانگ انت۔اگاں چو مہ بوت انت گڈا ایجوکیشن وزیز ءَ زلور سکریٹری ایجوکیشن یا ضلعی ایجوکیشن آفیسرانی ہلاپ ءَ گامگیجے زرتگ ات ءُُ مپت ء ناحق ہنچو مہلوک بیروزگار کنگ ءِ سرا برزی یا ضلعی آفیسراناں جست ءُُ پرس کتگ ات کہ آ پرچہ گوں چشیں گامگیجاں باپ ءِ حکومت ءَ رسوا ءُُ بدنام کنگ لوٹ انت اگاں اے درگت ءَ بلوچستان ءِ خزانہ وزیر ءَ اداروکی گامگیج زرتگ ات ءُُ ڈی۔

سی کیچ ءَ گشتگ ات کہ یک کمیٹی جوڑ بہ کنت ءُُ پولکاری بہ کنت کہ اسلیں جیڑہ چی انت؟ بلئے روچ مرچی چہ ایجوکیشن ءِ وزیر ءِ نیمگ ءَ ہچ حال تران ءُ گپے دیم ءَ نہ یتکگ کہ مردم ءَ اوپارے بروت کہ ناں اے گامگیج چہ باپ ءِ حکومت ءِ نیمگ ءَ زورگ نہ بوتگ بلکیں یک کسانیں تعلیمی ضلعی آفیسرے ءِ نادلگوشی ءِ سوب ءَ بوتگ کہ چہ آئی ءَ پد اے وڑیں مردم ءُُ الس دشمنیں گامگیجے ءَ پد ضلعی آفیسر ءَ سزا دئیگ بوتگ۔

کہ آ چدوپد چشیں مہلوک ءُُ چاگرد دشمنیں گامگیجے مہ زورات۔ اے وہد ءَ چوکہ اے جیڑہ گوں وانگ ءُُ زانگ ءِ بہرگ ءَ گوں بندوک انت پمشکہ وانگ ءُُ زانگ ءِ وزیر ذمہ واری انت کہ اے جیڑہ ءِ گش ءُُ گیوار کنگ ءِ حاترا ہنچیں گامگیجے بہ زور ایت کہ چہ آئی ءَ پد لس مہلوک بزانت کہ مہلوک ءِ بے روزگار کنگ باپ ءِ حکومت ءِ پالیسی نہ انت اگاں ناں گڈا مہلوک ءِ گپ راست بیت کہ باپ پارٹی حکومت ءِ بجٹ ءُُ مالیات ءِ محکم کنگ ءِ حاترا چہ محکمہاں مہلوک ءَ بیروزگار کنگ لوٹ ات۔