بائینکو کہ یک کسانیں مُرگے اے مرگ ہمک سال تیاب دپی دمگ ہاسیں رنگےءَ پسنی ءُُ اورماڑہءَ مزنیں وڑیےءَ شکارکنگ بیت،پیشی زمانگءَ بائینکوءِ شکار ہشکیں دام ءُُ شیپگی رُگءِ(یک دامے کہ دست ءِ سراشیپگ بیت)سراگرگ بوتگ بلئے رندءَ جدیدسائنسءُُ ٹیکنالوجیءِ دیمرؤئی ءِ سوبءَ اے کسانیں مُرگ بائینکو ءِ شکارکنگءِ تہا اوں بدلی اتکگ،مرچاں بائینکوءِ شکارجدیدیں ٹیکنالوجی آلات ٹیپ،نوارآدگہ نوکیں آلاتانی سرکنگ بیت نوکیں ٹیکنالوجیءَ بائینکوءِ شکارسک آسان کتگ۔

بس بروٹیپءَ چالو کن پدابیاوتی بُندرءَ بوپس سہبءَ آتارگءَ پادبیابرودامءَ بائینکوءَ گیشین،بائینکوءِ شکار اَنچو وش اِنت کہ مروچاں تربت،گوادر،پیشکانءُ ُ جیونی ءَ ہم بائینکو ءِ شکار کنگ بیت،بائینکوءِ شکارءَ چو اولمپک گیمزءِ وڑا اُمبرءِ قیدءُُ بند نیست،بزاں اے مُرگءِ شکارءَ پنچ سالی چُکءَ بگرداں پنجاہ سالی کماشیں مردم ہم کناں،بائینکوءِ موسم اگست،ستمبرءُُ اکتوبرءِ ماہءَ داں کنگ بیت اے کسانیں مُرگ چہ کجا کئیت انت انگہ زانگ نہ بیت ایشیءِ شکارءِ تہا ہر تبکءِ مردم بہر زوراں ہاسیں رنگےءَ اتوارءِ شپءَ آفیسر،سرکاری ملازم،دریاوردءُُ مزدورہم ایشیءِ شکارءِ تہا بہرزورنت۔

چوکہ من وت ہم یک زمانگےءَ بائینکوءِ یک نامداریں شکاری یے بوتگاں 1990دہکءَ من گون وتی سنگتاں ہرسال سرجمیں موسم ءَ پہ شکارءَ وتی ہچ شپ قضاء نہ کتگ،جمعہءُُ اتوارءِ شپءَ مئے کرا لازم دو،سئے سرکاری ملازم ہواربوتگ ات گون،ہمے وڑا یک اتواریےءِ شپءَ مئے چیزیے سنگتاں بائینکوءِ شکارءَ آہگءِ دلمانگی زاہر کت،ماوتی شکارءِ رؤگءِ چن ءُُ لانچءَ کنگااتیں گڈاں ہمے ساہتءَ اناگہ مبارک قاضی گون وتی یک ءُُ دو دگے سنگتءِ ہمراہیءَ اتک،گشت ئے ماراہم بائینکوءِ شکارءَ برئے گون،من گشت قاضی صاحب تئی آہگ پہ مے واستا وشیں ہبرے بلے بیاکہ مئے کراگیشیں سواری (موٹرسائیکل)نیست اِنت،مئے دوموٹرسائیکل اَنت ما شش مردمیں،تو اگہ پہ وت سواری یے شوہازت کن ئے گڈاں وتی ہمراہاں گون مئے شکارجاہ ”جنک کُشءِ کنڈگ“ ءَ بیائے (آوہدءَ من جنک کشءِ کنڈگءَ بائینکوءِ شکار کتگ ات)۔

قاضی مئے مجبوری ءَ سرپد بوت گشت ئے شریں مارا اگہ سواری یے دست کپت گڈاں من الم کائیں،قاضیءِ رخصتیءَ پد ماپہ شکارءِ ہاترا درکپتیں پانزدہ منٹءَ پد ماوتی شکارجاہءَ سربوتیں وتی ٹیپ چالو کت ءُُ پدا اتکیں وتی بُندرءَ دیوان کت،شپءِ نصفءَ یک موٹرسائیکل یےء ِبتی (light)زاہربوتاں، بتیءِ مُزرءَ مئے نیمگا ات مازانت دگہ کس نہ بیت اے ہمے شپ گردیں قاضی بیت،موٹرسائیکل اتک مئے کرااوشتات داں چاراں واقعی اے قاضی انت گون وتی سنگتاں اتکگ،قاضیءِ آہگءِ چہ دیوان ءِ سنگت چہ گلءَ بال بوتاں،ہمے شپءَ منی برات ہم مئے گوما گون ات چوناہا منی برات بائینکوءِ شوقین یے نہ ات بلئے آئیءَ پہ ورگءِ واستا لہتیں مادگیں بائینکوءِ ضلورت ات پمیشکہ آاوں مئے گوما شکارءَ اتکگت،(ہیال بہ بیت کہ مادگیں بائینکو ءِ گوشتءِ تام چہ نریں بائینکوءِ گوشتءِ تامءَ وش تراِنت ہمے ہاترا مردم مادگیں بائینکوءَ گیشترزوراں)۔

قاضیءِ آہگءَ چہ منی براتءِ موڈ کمیں ہراب بوت چیاکہ آئی ءَ زانت کہ بانداہرچ مادگیں بائینکویے گرگ بہ بیت قاضی آہاں بارت منا دانگے نہ رسیت،شپ وتی دومی پاسءَ سر بوت،دیوان ہم ہاموش بوت،سہبءِ آتارگءَ ما چہ وابءَ پاداتکیں،سہتےءَ رندما شتیں بائینکو چہ دامءَ گیشینت آں ما کل پنجاہ بائینکو گپتگ ات،بلئے ایشانی تہا گیشتر نریں بائینکو اتاں ہمے دمان ءَ قاضی ءَ جارجت کہ ہرکسءَ مادگیں بائینکو گون انت گڈاں بیارات منی ہوالہ بکن اتے،ہرکسءَ کہ مادگیں بائینکو گون ات آہاں آقاضیءِ دستءَ داتاں کل شانزدہ مادگیں بائینکو اتاں،

مئے دیمی نیمگا دگے سنگت یے ہم شکار کنگا ات آئیءِ ٹیپءِ آوازپیداک ات،قاضی ءَ گشت منی مادگیں بائینکو کموک انت منی حیالا من برواں دگہ لہتیں مادگ پچ بگراں،قاضی شت بائینکوءِ پچ گرگا،گڈاں منی براتءَ قاضیءِ شانزدہیں مادگیں بائینکوہانی تہا چہ چاربائینکو کشت وتی لانکءَ کت،گشت یے شما قاضیءَ ہال مدی ات،ساہتے ءَ پد قاضی اتک مئے جستءَ چہ پیسر گَل گَلءَ گشت یے نوں شریں منادگہ چاردانگ بائینکو رست بزاں نوں منی 20بائینکو بوتاں منی الکاپیں سبارگے بنت،قاضیءِ گپءَ چہ پد درائیں سنگت بچکندگا لگت اتاں ءُُ درسانی چم منی براتءِ بینڈگءِ بائینکواں سک اتاں۔ لوگءِ رؤگءَ پد منی حیالاقاضی ہم حیران بوتگ کہ آئی ءِ بیستیں بائینکو پدا چے پئیم شانزدہ بوتگاں۔